ଭାରତରେ ବାଂଲାଦେଶ ବିରୋଧୀ ରାଜନୀତି ଯୋଗୁ କ୍ଷତି ହେବ: ସୂଚନା ପରାମର୍ଶଦାତା

ଢାକା: ବାଂଲାଦେଶ ଏବଂ ଭାରତ ମଧ୍ୟରେ ସମ୍ପର୍କକୁ ନେଇ ତିକ୍ତତା ଦେଖାଯାଉଛି। ଏହି ସମୟରେ, ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ଭାରତର ରାଜନୈତିକ ନେତୃତ୍ୱ ବାଂଲାଦେଶ ସହ ଜଡିତ ପ୍ରସଙ୍ଗକୁ ଘରୋଇ ରାଜନୈତିକ ଲାଭ ପାଇଁ ବ୍ୟବହାର କରୁଥିବା ଅଭିଯୋଗ କରିଛନ୍ତି।

ଶେଖ ହସିନାଙ୍କ ବିରୋଧରେ ବିରୋଧର ନେତୃତ୍ୱ ନେଇଥିବା ନାହିଦ ଇସଲାମ ଜଣେ ଛାତ୍ର ନେତା। ନାହିଦ ବାଂଲାଦେଶରେ ହିନ୍ଦୁ ସଂଖ୍ୟାଲଘୁଙ୍କ ଉପରେ ହୋଇଥିବା ଅତ୍ୟାଚାର ବିଷୟରେ ଉଲ୍ଲେଖ କରି ନାହାନ୍ତି। ତେବେ ତାଙ୍କ ବିବୃତିରୁ ଏହା ସ୍ପଷ୍ଟ ହୋଇଛି ଯେ ସେ ଚାହୁଁ ନାହାନ୍ତି ଯେ ଭାରତରେ ଏହା ବିଷୟରେ ଆଲୋଚନା କରାଯାଉ। ଦୁଇ ଦେଶ ମଧ୍ୟରେ ଐତିହାସିକ ଏବଂ ସାଂସ୍କୃତିକ ସମ୍ପର୍କର ଗୁରୁତ୍ୱକୁ ପ୍ରାଧାନ୍ୟ ଦେଇ ନାହିଦ ବାଂଲାଦେଶ ବିରୋଧରେ ମିଥ୍ୟା ପ୍ରଚାର ବନ୍ଦ କରିବାକୁ ଭାରତକୁ ଅନୁରୋଧ କରିଛନ୍ତି।

ସୂଚନା ପରାମର୍ଶଦାତା ନହିଦ ଇସଲାମ କହିଛନ୍ତି, ଯଦି ଏଭଳି ଜାରିରହେ ତେବେ ଏହା ଭାରତର ଘରୋଇ ରାଜନୀତି ପାଇଁ କ୍ଷତିକାରକ ହେବ। ବାଂଲାଦେଶ ବିରୋଧୀ ଏବଂ ମୁସଲମାନ ବିରୋଧୀ ରାଜନୀତି ଭାରତର ଜାତୀୟ ସ୍ୱାର୍ଥରେ ସାହାଯ୍ୟ କରିବ ନାହିଁ କିମ୍ବା ଏହାର ଏକତା ପାଇଁ ସହାୟକ ହେବ ନାହିଁ।
ନାହିଦ ଇସଲାମ କହିଛନ୍ତି, ବାଂଲାଦେଶ ସହିତ ଭାରତର ପଶ୍ଚିମବଙ୍ଗ, ତ୍ରିପୁରା ଏବଂ ଆସାମ ଭଳି ରାଜ୍ୟର ସୀମା ରହିଛି। ସେ କହିଛନ୍ତି ଯେ ଆମର ଆନ୍ଦୋଳନ ସମୟରେ କୋଲକାତା ଏବଂ ଦିଲ୍ଲୀର ଛାତ୍ରମାନେ ଶେଖ ହସିନାଙ୍କ ଶାସନର ଅତ୍ୟାଚାରକୁ ବିରୋଧ କରି ଆମ ସମର୍ଥନରେ ଏକତା ଭାବ ପ୍ରଦର୍ଶନ କରି ଛିଡ଼ା ହୋଇଥିଲେ।

ଭାରତର ଗଣତନ୍ତ୍ର ପ୍ରେମୀ ଲୋକ ଆମର ବନ୍ଧୁ। ସେ ଦାବି କରିଛନ୍ତି ଯେ ହିନ୍ଦୁ ସମେତ ସମସ୍ତ ଅଳ୍ପସଂଖ୍ୟକ ସମ୍ପ୍ରଦାୟ ପାଇଁ ସମ୍ପୂର୍ଣ୍ଣ ନାଗରିକତ୍ୱ ଅଧିକାର, ସମ୍ମାନ ଏବଂ ସୁରକ୍ଷା ସୁନିଶ୍ଚିତ କରିବା ପାଇଁ ବାଂଲାଦେଶ ପ୍ରତିଶ୍ରୁତିବଦ୍ଧ।ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରର ମୁଖ୍ୟ ମହମ୍ମଦ ୟୁନୁସ ବୁଧବାର ଦିନ ଶେଖ ହସିନା ସରକାରଙ୍କ ବିଦ୍ରୋହକୁ ବଦନାମ କରିବା ପାଇଁ ପ୍ରମୁଖ ଦେଶର ଯୋଗଦାନ ସହିତ ଅଭିଯାନକୁ ପ୍ରତିହତ କରିବା ଲାଗି ରାଜନୈତିକସ୍ତରରେ ଜାତୀୟ ଏକତା ଆହ୍ବାନ ଦେଇଥିଲେ। ଭାରତ ସହ ତିକ୍ତତା ମଧ୍ୟରେ ରାଜନୈତିକ ଦଳର ପ୍ରତିନିଧୀଙ୍କୁ ସମ୍ବୋଧିତ କରୁଥିବାବେଳେ ୟୁନୁସ କୌଣସି ଦେଶର ନାମ ନେଇ ନ ଥିଲେ।

ତେବେ ସୂତ୍ରରୁ ପ୍ରକାଶ, ଭାରତ ତଥା ବିଶ୍ବର ଅନ୍ୟାନ୍ୟ ଅଞ୍ଚଳରେ ବାଂଲାଦେଶ ବିରୁଦ୍ଧରେ ଚାଲିଥିବା ପ୍ରଚାର, ଅଗରତାଲାରେ ବାଂଲାଦେଶ ମିଶନ ଉପରେ ଆକ୍ରମଣ ଏବଂ ନିକଟ ଅତୀତରେ ସଂଖ୍ୟାଲଘୁଙ୍କ ଉପରେ ଆକ୍ରମଣ ଅଭିଯୋଗ ସମେତ ୟୁନୁସ ତିନିଟି ପ୍ରସଙ୍ଗରେ ରାଜନୈତିକ ନେତାଙ୍କ ମତାମତ ଲୋଡିଥିଲେ।
ସୌଜନ୍ୟ-ସମ୍ୱାଦ