ଭାରତ କାହା ବାପାର ନୁହେଁ; ଜାଣନ୍ତୁ କାହିଁକି ଏଭଳି କହିଲେ ଦିଲଜିତ୍

ଇନ୍ଦୋର: ଏବେ ଦିଲଜିତ ଦୋସାଞ୍ଜ ଦେଶର ବିଭିନ୍ନ ସହରରେ କନସର୍ଟ କରିବାରେ ବ୍ୟସ୍ତ ଅଛନ୍ତି। ଏପର୍ଯ୍ୟନ୍ତ ସେ ମୁମ୍ବାଇ, ଲକ୍ଷ୍ନୌ, ବେଙ୍ଗାଲୁରୁ ଭଳି ସହରରେ କନସର୍ଟ କରିସାରିଛନ୍ତି। ଆଗକୁ ସେ ଅନ୍ୟ ସହରକୁ ଯାଇ କନସର୍ଟ କରିବାର ଯୋଜନା ରହିଛି। ପ୍ରତି କନସର୍ଟରେ ଦିଲଜିତ୍ କିଛି ଏଭଳି କରନ୍ତି, ଯାହା ପରେ ଭାଇରାଲ ହୁଏ। ଅନେକ ସମୟରେ ତାଙ୍କ କନସର୍ଟକୁ ଅଟକାଇବାକୁ ‌ଚେଷ୍ଟା କରାଯାଉଥିବା ଜାଣି ସେ ମଞ୍ଚ ଉପରୁ ବିରୋଧୀଙ୍କୁ ଯେଉଁଭଳି ଭାବେ ଜବାବ ଦିଅନ୍ତି, ତାକୁ ନେଇ ମଧ୍ୟ ଚର୍ଚ୍ଚା ହୁଏ। ଏବେ ଇନ୍ଦୋରରେ ମଧ୍ୟ ସମାନ ଘଟଣା ଘଟିଛି। କନସର୍ଟକୁ ବଜରଙ୍ଗ ଦଳ ବିରୋଧ କରୁଥିବା ଜାଣି ସେ ମଞ୍ଚରେ ଏକ ଗଜଲ ମାଧ୍ୟମରେ ସେମାନଙ୍କୁ ଜବାବ ଦେଇଥିବା ଦେଖାଯାଇଛି।

ପଞ୍ଜାବୀ ଗାୟକ-ଅଭିନେତା ତାଙ୍କର କନସର୍ଟକୁ ଉର୍ଦ୍ଦୁ କବି ରାହତ ଇନ୍ଦୋରୀଙ୍କୁ ଉତ୍ସର୍ଗ କରିଥିଲେ, ଯିଏ ଇନ୍ଦୋରର ବାସିନ୍ଦା ଥିଲେ ଏବଂ ଅଗଷ୍ଟ ୨୦୨୨ରେ ତାଙ୍କର ଦେହାନ୍ତ ହୋଇଥିଲା। ତାଙ୍କର ଏକ କବିତା ଦିଲଜିତ୍ କନସର୍ଟରେ କହିଥିବା ବେଳେ ଏହା ବଜରଙ୍ଗ ଦଳକୁ ଜବାବ ଥିଲା ବୋଲି ଲୋକେ ଦାବି କରିଛନ୍ତି। କବିତାଟି ଥିଲା, “ଅଗର୍ ଖିଲାଫ୍ ହେଁ ହୋନେ ଦୋ, ଜାନ୍ ଥୋଡି ହେ। ୟେ ସବ୍ ଧୁଆଁ ହେଁ, ଆସମାନ ଥୋଡି ହେ। ସଭି କା ଖୁନ୍ ହେ ସାମିଲ ୟାହାଁ କି ମିଟି ମେଁ, କିସି କେ ବାପ କା ହିନ୍ଦୁସ୍ତାନ ଥୋଡି ହେ”।

ଉଲ୍ଲେଖଯୋଗ୍ୟ, ଦିଲଜିତ ଦୋସାଞ୍ଜଙ୍କ କନସର୍ଟକୁ ରୋକିବାକୁ ବଜରଙ୍ଗ ଦଳ ଇନ୍ଦୋର ପୁଲିସ ନିକଟରେ ପହଞ୍ଚିଥିଲେ। ବଜରଙ୍ଗ ଦଳର ନେତା ଅବିନାଶ କୌଶଲ କହିଥିଲେ, “କୃଷକଙ୍କ ବିରୋଧ ସମୟରେ ଦିଲଜିତ ଅନେକ ଥର ଜାତୀୟ ବିରୋଧୀ ମନ୍ତବ୍ୟ ଦେଇଛନ୍ତି। ସେ ଖଲିସ୍ତାନର ଜଣେ ସମର୍ଥକ ମଧ୍ୟ। ଆମେ ଏପରି ବ୍ୟକ୍ତିଙ୍କୁ ମାତା ଅହଲ୍ୟ‌ାଙ୍କ ସହରରେ କାର୍ଯ୍ୟକ୍ରମ ଆୟୋଜନ କରିବାକୁ ଦେବୁ ନାହିଁ | ସୋ’କୁ ବାତିଲ କରିବାକୁ ଆମେ ପ୍ରଶାସନକୁ ଆବେଦନ କରିଛୁ। ଯଦି କନସର୍ଟ ହୁଏ, ତେବେ ଆମେ ନିଜ ହିସାବରେ ବିରୋଧ କରିବୁ। ”

ସୌଜନ୍ୟ-ସମ୍ୱାଦ