ମଖାନା ଏକ ସୁପରଫୁଡ୍: ପ୍ରଧାନମନ୍ତ୍ରୀ

ଭାଗଲପୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଖାନାକୁ ଏକ ସୁପରଫୁଡ୍ ବୋଲି ଅଭିହିତ କରିବା ସହ ବିଶ୍ୱସ୍ତରୀୟ ରପ୍ତାନି ପାଇଁ ଉତ୍ପାଦନ ବୃଦ୍ଧି କରିବାକୁ ଆହ୍ୱାନ ଦେଇଛନ୍ତି। ବିହାରର ଭାଗଲପୁରରେ ଏକ ରାଲିକୁ ସମ୍ବୋଧିତ କରିବା ପୂର୍ବରୁ ପ୍ରଧାନମନ୍ତ୍ରୀଙ୍କୁ ମଖାନାର ମାଳ ପିନ୍ଧାଇ ସମ୍ବର୍ଦ୍ଧିତ କରାଯାଇଥିଲା। ପ୍ରଧାନମନ୍ତ୍ରୀ କହିଥିଲେ, ଆଜି ଦେଶର ସହରଗୁଡ଼ିକରେ ମଖାନା ଜଳଖିଆର ଏକ ଗୁରୁତ୍ୱପୂର୍ଣ୍ଣ ଅଂଶ ପାଲଟିଛି। ୩୬୫ ଦିନ ମଧ୍ୟରୁ ମୁଁ ୩୦୦ ଦିନ ମଖାନା ଖାଇଥାଏ। କେନ୍ଦ୍ର ବଜେଟରେ ବିହାରରେ ମଖାନା ବୋର୍ଡ ଗଠନ ନେଇ ଘୋଷଣା କରାଯାଇଛି। ମଖାନାକୁ ଏବେ ସାରା ବିଶ୍ୱର ବଜାରରେ ପହଞ୍ଚିବାକୁ ପଡ଼ିବ।ଫେବ୍ରୁଆରି ୧ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ମଖାନାର ଉତ୍ପାଦନ, ପ୍ରକ୍ରିୟାକରଣ, ମୂଲ୍ୟ ବୃଦ୍ଧି ଓ ବିପଣନ ବୃଦ୍ଧି କରିବା ଉଦ୍ଦେଶ୍ୟରେ ବିହାରରେ ଏକ ମଖାନା ବୋର୍ଡ ଗଠନ କରିବାକୁ ପ୍ରସ୍ତାବ ଦେଇଥିଲେ। ନୀତୀଶ କୁମାରଙ୍କ ନେତୃତ୍ୱାଧୀନ ଜେଡିୟୁ ଓ ବିଜେପି ଶାସିତ ବିହାରରେ ଚଳିତ ବର୍ଷ ଅକ୍ଟୋବର-ନଭେମ୍ବରରେ ନିର୍ବାଚନ ହେବାର ସମ୍ଭାବନା ଥିବାରୁ ସୀତାରମଣ ଏହି ଘୋଷଣା କରିଛନ୍ତି। ବିହାର ହେଉଛି ଭାରତର ସବୁଠାରୁ ବଡ଼ ମଖାନା ଉତ୍ପାଦନକାରୀ ଦେଶ, ଯାହା ଦେଶର ଯୋଗାଣରେ ୮୦ ପ୍ରତିଶତ ଯୋଗଦାନ ଦେଇଥାଏ। ତେବେ ଏହି ସୁପରଫୁଡ୍‌ର ବଢୁଥିବା ବିଶ୍ୱସ୍ତରୀୟ ଚାହିଦାରୁ ଫାଇଦା ଉଠାଇବା ପାଇଁ ରାଜ୍ୟ ସଂଘର୍ଷ କରୁଛି। ମଖାନା (କଇଁଫୁଲର ମଞ୍ଜି)ରେ ଅତ୍ୟାବଶ୍ୟକ ପୋଷକ ତତ୍ତ୍ୱ ରହିଛି, ଯାହା ଏହାକୁ ସନ୍ତୁଳିତ ଖାଦ୍ୟରେ ପରିଣତ କରିଥାଏ।

ସୌଜନ୍ୟ-ସମ୍ୱାଦ