ମହିଳା ନେତ୍ରୀଙ୍କ ବିରୋଧରେ ଅପଶବ୍ଦ ପ୍ରୟୋଗ କରିଥିବା ବିଜେପି ନେତା ଗିରଫ

ବେଙ୍ଗାଲୁରୁ: କର୍ଣ୍ଣାଟକ ବିଧାନ ପରିଷଦର ବିଜେପି ସଦସ୍ୟ ସିଟି ରବିଙ୍କୁ ଜଣେ ମହିଳାଙ୍କ ବିରୋଧରେ ଅପମାନଜନକ ମନ୍ତବ୍ୟ ଦେଇଥିବାରୁ ଗିରଫ କରାଯାଇଛି। ସେ କଂଗ୍ରେସ ନେତ୍ରୀ ତଥା କର୍ଣ୍ଣାଟକ କେନ୍ଦ୍ର ମନ୍ତ୍ରୀ ଲକ୍ଷ୍ମୀ ହେବଲ୍‌କର୍‌ଙ୍କ ସଂପର୍କରେ ଅପମାନଜନକ ଶବ୍ଦ ପ୍ରୟୋଗ କରିବା ପରେ ତାଙ୍କ ବିରୋଧରେ ଏଫ୍ଆଇଆର୍ ଦାଖଲ ହୋଇଥିଲା ଓ ଗୁରୁବାର ତାଙ୍କୁ ଗିରଫ କରାଯାଇଛି। ତାଙ୍କୁ ବେଲଗାଭିର ସୁବର୍ଣ୍ଣା ବିଧାନ ସୌଧ ପରିସରରୁ ଗିରଫ କରାଯାଇଥିବା ସୂଚନା ରହିଛି।

ପୂର୍ବତନ ବିଜେପି ରାଷ୍ଟ୍ରୀୟ ସଚିବଙ୍କ ବିରୋଧରେ ଯୌନ ଉତ୍ପୀଡ଼ନ ତଥା ମହିଳାଙ୍କ ନମ୍ରତାକୁ ଅପମାନିତ କରିବା ଉଦ୍ଦେଶ୍ୟରେ ଶବ୍ଦ ପ୍ରୟୋଗ କରିଥିବା ଅଭିଯୋଗରେ ଏକ ମାମଲା ରୁଜୁ କରାଯାଇଥିଲା। ରବିଙ୍କୁ ଗିରଫ ପରେ ଏବେ ବେଙ୍ଗାଲୁରୁକୁ ଅଣାଯିବ ଏବଂ ଆଜି ଲୋକ ପ୍ରତିନିଧୀଙ୍କ କୋର୍ଟରେ ହାଜର କରାଯିବ ବୋଲି ସରକାରୀ ତଥା ବିଜେପି ସୂତ୍ରରୁ ପ୍ରକାଶ ପାଇଛି।

ଗୁରୁବାର ଦିନ ବେଲାଗାଭିରେ ଥିବା କର୍ଣ୍ଣାଟକ ବିଧାନସଭାର ଶୀତକାଳୀନ ଅଧିବେଶନର ଶେଷ ଦିନରେ ରାଜ୍ୟ ମହିଳା ତଥା ଶିଶୁ ବିକାଶ ମନ୍ତ୍ରୀ ଲକ୍ଷ୍ମୀ ହେବଲକର ରବିଙ୍କ ବିରୋଧରେ ବିଧାନ ପରିଷଦରେ ଅପମାନଜନକ ଶବ୍ଦ ବ୍ୟବହାର କରିଥିବା ଅଭିଯୋଗ କରିଥିଲେ।

ରବି ଏହି ଅଭିଯୋଗକୁ ଅସ୍ୱୀକାର କରି ଏହାକୁ ମିଥ୍ୟା ବୋଲି କହି ବିରୋଧ ପ୍ରଦର୍ଶନ କରିଥିଲେ। ଏପଟେ କଂଗ୍ରେସ ନେତାମାନେ କହିଛନ୍ତି ଯେ  ରବିଙ୍କ ବିରୋଧରେ ଆନୁଷ୍ଠାନିକ ଅଭିଯୋଗ ଦାଖଲ କରିଥିବା ହେବଲକରଙ୍କୁ ରବି ଅପମାନିତ କରିଛନ୍ତି।

କଂଗ୍ରେସ ନେତାଙ୍କ କହିବାନୁସାରେ, ମଙ୍ଗଳବାର ଦିନ ବିଆର ଆମ୍ବେଦକରଙ୍କ ଉପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ମନ୍ତବ୍ୟକୁ ନେଇ ଉତ୍ତେଜନା ପ୍ରକାଶ ପାଇବା ପରେ ରବି ସେମାନଙ୍କ ମଧ୍ୟରେ ବିବାଦ ସମୟରେ ଅନେକ ଥର ହେବଲକରଙ୍କ ବିରୋଧରେ ଅପମାନଜନକ ଶବ୍ଦ ବ୍ୟବହାର କରିଥିଲେ।

ସୌଜନ୍ୟ-ଧରିତ୍ରୀ