ମୋଦୀ ଅଜମେର ସରିଫରେ ଚାଦର ଚଢ଼ାଇବା ଉଚିତ୍ ନୁହେଁ: ହିନ୍ଦୁ ସେନା ପକ୍ଷରୁ ଅନୁରୋଧ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ  ପ୍ରତିବର୍ଷ ଅଜମେର ସରିଫ ଦରଘାକୁ ଏକ ଚାଦର ପ୍ରଦାନ କରିଥାନ୍ତି। ଏଥର ମଧ୍ୟ ପ୍ରଧାନମନ୍ତ୍ରୀଙ୍କ ଦ୍ୱାରା ଚାଦର ଚଢ଼ାଯିବ। କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରେନ ରିଜିଜୁ ଏହି ଚାଦର ନେଇ ଯି‌ବେ। ଏହାପୂର୍ବରୁ ମୋଦୀଙ୍କ ପ୍ରଥମ କାର୍ଯ୍ୟକାଳରେ ତତ୍କାଳୀନ କେନ୍ଦ୍ର ମନ୍ତ୍ରୀ ମୁଖତାର ଅବ୍ବାସ ନାକଭି ଏକ ଚାଦର ନେଇ ଯାଇଥିଲେ। ଅଜମେର ଦରଘା ସରିଫ ଭାରତ ସରକାରଙ୍କ କେନ୍ଦ୍ରୀୟ ସଂଖ୍ୟାଲଘୁ ମନ୍ତ୍ରଣାଳୟ ଅଧୀନରେ ରହିଛି। ଏଥର ବାର୍ଷିକ ଉର୍ସ ୨୮ ଡିସେମ୍ବରରୁ ଆରମ୍ଭ ହୋଇଛି।

ବର୍ତ୍ତମାନ ଦେଶରେ ଅଜମର୍ ଦରଘାକୁ ନେଇ ବିବାଦ ଦେଖାଦେଇଛି।  ହିନ୍ଦୁ ସେନା ସଭାପତି ବିଷ୍ଣୁ ଗୁପ୍ତା ଅଜମେର ଦରଘାକୁ ମହାଦେବ ମନ୍ଦିର ବୋଲି ବର୍ଣ୍ଣନା କରିଛନ୍ତି। ବିଷ୍ଣୁ ଗୁପ୍ତା ୨୫ ସେପ୍ଟେମ୍ବର ୨୦୨୪ ରେ ଅଜମେର ସିଭିଲ କୋର୍ଟରେ ଏକ ପିଟିସନ ଦାଖଲ କରିଥିଲେ ଯେଉଁଥିରେ ସେ ଦାବି କରିଥିଲେ ଯେ, ଖ୍ୱାଜା ମୋଇନୁଦ୍ଦିନ ଚିସ୍ତିଙ୍କର ଦରଘା ଭିତରେ ଏକ ଶିବ ମନ୍ଦିର ଅଛି। ତେବେ ୨୭ ନଭେମ୍ବରରେ କୋର୍ଟ ଏହି ଆବେଦନକୁ ଗ୍ରହଣ କରିଥିଲେ ଏବଂ ୨୦ ଡିସେମ୍ବରରେ ଶୁଣାଣି ତାରିଖ ସ୍ଥିର କରିଥିଲେ।

ଏହି ବିବାଦ ମଧ୍ୟରେ ପ୍ରଧାନମନ୍ତ୍ରୀ ମୋଦୀଙ୍କ ଏହି ପଦକ୍ଷେପକୁ ସ୍ୱତନ୍ତ୍ର ବିବେଚନା କରାଯାଉଛି। ଏହି ପଦକ୍ଷେପ ହିନ୍ଦୁ ସେନା ଭଳି ସଂଗଠନ ପାଇଁ ଏକ ଝଟକା ହୋଇପାରେ। କାରଣ ହିନ୍ଦୁସେନା ଦରଘା ସରିଫଙ୍କୁ ସଙ୍କଟ ମୋଚକ ମନ୍ଦିର ବୋଲି ଦାବି କରୁଛନ୍ତି। ଏହି ସମୟରେ ହିନ୍ଦୁ ସେନା ସଭାପତି ବିଷ୍ଣୁ ଗୁପ୍ତା ପ୍ରଧାନମନ୍ତ୍ରୀ ମୋଦୀଙ୍କୁ ଉର୍ସର ଅବସରରେ ଚାଦର ନ ପଠାଇବାକୁ ନିବେଦନ କରିଛନ୍ତି।

ଗୁପ୍ତାଙ୍କ ବିରୋଧ ସତ୍ତ୍ବେ ପ୍ରଧାନମନ୍ତ୍ରୀଙ୍କ ତରଫରୁ ଜାଦର ପଠାଇବାକୁ ନିଷ୍ପତ୍ତି ନିଆଯାଇଛି। ଏହା ବ୍ୟତୀତ, ଏଥର ଉର୍ସ ସମୟରେ କଡା ସୁରକ୍ଷା ବ୍ୟବସ୍ଥା କରାଯାଇଛି। ଗତ ବର୍ଷ ତୁଳନାରେ ଦେଢ଼ ଗୁଣା ଅଧିକ ଫୋର୍ସ ମୁତୟନ କରାଯାଇଛି। ୬୦୦ ଯବାନଙ୍କ ରାପିଡ୍ ଆକ୍ସନ୍ ଫୋର୍ସ ଏବଂ ସିଆରପିଏଫ ବାହିନୀଙ୍କୁ ରିଜର୍ଭରେ ରଖାଯାଇଛି। ଏହା ସହିତ ୭୦ ଯବାନଙ୍କୁ ଜନଗହଳି ପୂର୍ଣ୍ଣ ଅଞ୍ଚଳରେ ଶରୀରରେ ପିନ୍ଧିଥିବା କ୍ୟାମେରା ସହିତ ସଜ୍ଜିତ ହୋଇଛନ୍ତି।ହିନ୍ଦୁ ସେନା ସଭାପତି ବିଷ୍ଣୁ ଗୁପ୍ତାଙ୍କ ବିବୃତି ଏବଂ ଅଜମେର ଦରଘାଙ୍କ ସମ୍ପର୍କରେ ତାଙ୍କ ଦାବି ସମଗ୍ର ଦେଶରେ ଆଲୋଚନାର ବାତାବରଣ ସୃଷ୍ଟି କରିଛି। ସେ ଦରଘାକୁ ସଙ୍କଟ ମୋଚକ ମହାଦେବ ମନ୍ଦିର ବୋଲି ଘୋଷଣା କରିବାକୁ ଦାବି କରିଛନ୍ତି ଏବଂ ଦରଘାର ପଞ୍ଜୀକରଣ ବାତିଲ କରିବାକୁ ମଧ୍ୟ ନିବେଦନ କରିଛନ୍ତି। ଗୁପ୍ତା କହିଛନ୍ତି ଯେ, ଗାଜିଆବାଦର ସମାଧି ପରି ଅଜମେର ସରିଫ ମଧ୍ୟ ଏକ ଶିବ ମନ୍ଦିର ଥିଲା। ଗୁପ୍ତାଙ୍କ ଏହି ବିବାଦ ବର୍ତ୍ତମାନ କୋର୍ଟରେ ଚାଲିଛି ଏବଂ ପରବର୍ତ୍ତୀ ଶୁଣାଣି ଜାନୁଆରୀ ୨୪ରେ ହେବ।

ସୌଜନ୍ୟ-ସମ୍ୱାଦ