ଯୁଦ୍ଧକ୍ଷେତ୍ରରେ ଅବତୀର୍ଣ୍ଣ ହେଲା ‘ଓପନ୍ଏଆଇ’: ଜୀବନ-ମରଣ ନିଷ୍ପତ୍ତି ନେବ ଏଆଇ!
କୃତ୍ରିମ ବୁଦ୍ଧିମତ୍ତା ପ୍ରଯୁକ୍ତି ପ୍ରତିଦିନ ନିଜର ପତିଆରା ଓ ପ୍ରଭାବ ବଢ଼ାଇବାରେ ଲାଗିଛି। ଖୁବ୍ ଶୀଘ୍ର ଏହା ମଣିଷମାନଙ୍କ ଜୀବନ-ମରଣର ନିର୍ଣ୍ଣାୟକ ନିଷ୍ପତ୍ତି ନେବାକୁ ଯାଉଛି। କୃତ୍ରିମ ବୁଦ୍ଧିମତ୍ତାସଂପନ୍ନ ‘ଚାଟ୍ଜିପିଟି’ ଚାଟ୍ବଟ୍ ନିର୍ମାତା ‘ଓପନ୍ଏଆଇ’ ଆରମ୍ଭରୁ...
କୃତ୍ରିମ ବୁଦ୍ଧିମତ୍ତା ପ୍ରଯୁକ୍ତି ପ୍ରତିଦିନ ନିଜର ପତିଆରା ଓ ପ୍ରଭାବ ବଢ଼ାଇବାରେ ଲାଗିଛି। ଖୁବ୍ ଶୀଘ୍ର ଏହା ମଣିଷମାନଙ୍କ ଜୀବନ-ମରଣର ନିର୍ଣ୍ଣାୟକ ନିଷ୍ପତ୍ତି ନେବାକୁ ଯାଉଛି। କୃତ୍ରିମ ବୁଦ୍ଧିମତ୍ତାସଂପନ୍ନ ‘ଚାଟ୍ଜିପିଟି’ ଚାଟ୍ବଟ୍ ନିର୍ମାତା ‘ଓପନ୍ଏଆଇ’ ଆରମ୍ଭରୁ ଏହି ବୈଷୟିକ ଜ୍ଞାନକୌଶଳର ସାମରିକ ଉପଯୋଗକୁ ବିରୋଧ କରିଆସୁଥିବାବେଳେ କ୍ରମେ ଏହା ତା’ର ପୂର୍ବ ନୈତିକତା ତ୍ୟାଗ କରି ଏକ ପ୍ରତିରକ୍ଷା ପ୍ରଯୁକ୍ତି କମ୍ପାନି ସହ ହାତ ମିଳାଇଛି। ‘ଆଣ୍ଡ୍ୟୁରିଲ୍ ଇଣ୍ଡଷ୍ଟ୍ରିଜ୍’ ନାମକ ଏହି କମ୍ପାନି ‘ଓପନ୍ଏଆଇ’ ସହିତ ମିଶି ଯୁକ୍ତରାଷ୍ଟ୍ର ଆମେରିକାର ସେନାବାହିନୀ ଲାଗି ଏଆଇ ପରିଚାଳିତ ଆକାଶମାର୍ଗୀ ପ୍ରତିରକ୍ଷା ବ୍ୟବସ୍ଥା ବିକଶିତ କରିବ ବୋଲି ଘୋଷଣା କରିଛି।
ମାନବ ଚାପ ହ୍ରାସ କରିବା ଲାଗି ଏହି ଏଆଇ ତଥ୍ୟ ପ୍ରୋସେସିଂ କାର୍ଯ୍ୟ ସମ୍ପାଦନ କରିବ ବୋଲି ଏହି ଦୁଇ କମ୍ପାନି ପକ୍ଷରୁ କୁହାଯାଇଛି। ଉଲ୍ଲେଖନୀୟ ଯେ ୟୁକ୍ରେନ୍ ଭଳି ଆଧୁନିକ ଯୁଦ୍ଧକ୍ଷେତ୍ରରେ ‘ଏଆଇ’ ସମର୍ଥିତ ପ୍ରଯୁକ୍ତିର ବ୍ୟାପକ ଉପଯୋଗ ଆରମ୍ଭ ହୋଇସାରିଛି। କିନ୍ତୁ ଆଣ୍ଡ୍ୟୁରିଲ୍ ଓ ‘ଓପନ୍ଏଆଇ’ ମିଶି ଯେଉଁ ପ୍ରଯୁକ୍ତି ବିକଶିତ କରିବେ ତାହା ମାନବବିହୀନ ଡ୍ରୋନ୍ ସମେତ ମାନବଚାଳିତ ଉଡ଼ାଜାହାଜ ବିରୋଧରେ ମଧ୍ୟ ପ୍ରତିରକ୍ଷା ପ୍ରଦାନ କରିବ ବୋଲି ଉଲ୍ଲେଖ କରାଯାଇଛି। ଏହା ଅତ୍ୟନ୍ତ ଉଦ୍ବେଗଜନକ, କାରଣ ଆଣ୍ଡ୍ୟୁରିଲ୍ ଏବେ ମାନବ ନିପାତକାରୀ ଡ୍ରୋନ୍ ଓ ରକେଟ୍ ମୋଟର୍ ପରି ମାରଣାସ୍ତ୍ର ଉତ୍ପାଦନ କରୁଛି। ଏଥି ସହିତ ସ୍ବୟଂଚାଳିତ ‘ଏଆଇ’ ଯୋଡ଼ିବାର ଅର୍ଥ ହେବ ଯେ କାହାକୁ ମରାଯିବ ସେ ନିଷ୍ପତ୍ତି ମଣିଷ ଠାରୁ ମେସିନ୍ ହାତକୁ ଚାଲିଯିବ।
‘ଓପନ୍ଏଆଇ’ କମ୍ପାନି ଯୁଦ୍ଧରେ ଏହାର ବୈଷୟିକ ଜ୍ଞାନର ପ୍ରୟୋଗକୁ ପୂର୍ବରୁ ନିଷେଧ କରିଥିବାବେଳେ ଏବେ ଆମେରିକୀୟ ସୈନ୍ୟଙ୍କ ନିରାପତ୍ତା ଆଳରେ ଏହା ସେହି ନୈତିକତାକୁ ତ୍ୟାଗ କରିବାକୁ ପ୍ରସ୍ତୁତ ହୋଇଯାଇଛି
କୃତ୍ରିମ ବୁଦ୍ଧିମତ୍ତାର ବିପଦକୁ ଦୃଷ୍ଟି ରଖି ‘ଓପନ୍ଏଆଇ’ ଅତୀତରେ ଯୁଦ୍ଧରେ ଏହାର ଜ୍ଞାନକୌଶଳ ପ୍ରୟୋଗକୁ ସଂପୂର୍ଣ୍ଣ ନିଷେଧ କରିଥିଲା ଏବଂ ଏହା ଏବେ ମଧ୍ୟ ମାନବ ସଭ୍ୟତାର ହିତ ପାଇଁ ଉତ୍ସର୍ଗୀକୃତ ବୋଲି ଦାବି କରିଥାଏ। ତେବେ ବର୍ତ୍ତମାନ ଆମେରିକାର ସୈନ୍ୟବଳକୁ ସୁରକ୍ଷିତ କରିବା ଆଳରେ ଏହାର ଉପଯୋଗ କରି ‘ଓପନ୍ଏଆଇ’ ବିପଜ୍ଜନକ କ୍ଷେତ୍ରରେ ପାଦ ଦେଉଛି ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ କରୁଛନ୍ତି। ଏହାକୁ ଅଧିକ ଆକର୍ଷଣୀୟ କରୁଛି ଅତ୍ୟନ୍ତ ଲୋଭନୀୟ ଆର୍ଥିକ ଲାଭର ସମ୍ଭାବନା। ଏହି କାରଣରୁ ‘ଆନ୍ଥ୍ରୋପିକ୍’ ସମେତ ମେଟା ଦ୍ବାରା ବିକଶିତ ‘ଲାମା’ ମଡେଲ୍ ମଧ୍ୟ ବିଭିନ୍ନ ଉପାୟରେ ପ୍ରତିରକ୍ଷା କ୍ଷେତ୍ରକୁ ପ୍ରବେଶ କଲେଣି।
‘ଓପନ୍ଆଏଇ’ ଯେଉଁ ଏଆଇ ପ୍ରଯୁକ୍ତି ଉପରେ ନିର୍ଭର କରେ ତାହା ହେଉଛି ‘ଲାର୍ଜ ଲାଙ୍ଗୁଏଜ୍ ମଡେଲ୍’ (ଏଲ୍ଏଲ୍ଏମ୍)। ଏଲ୍ଏଲ୍ଏମ୍ଗୁଡ଼ିକୁ ବିପୁଳ ତଥ୍ୟ ସହିତ ପ୍ରଶିକ୍ଷିତ କରାଯାଉଥିଲେ ହେଁ ବଡ଼ ସମସ୍ୟା ହେଲା ଏଗୁଡ଼ିକ ଅତ୍ୟନ୍ତ ତ୍ରୁଟିପୂର୍ଣ୍ଣ। ତେଣୁ ସାମରିକ କ୍ଷେତ୍ରରେ ତଥ୍ୟ ପ୍ରକ୍ରିୟାକରଣ ଅଥବା ଟାର୍ଗେଟ୍ ସ୍ଥିର ଭଳି କାର୍ଯ୍ୟ ଏହା ଦ୍ବାରା କରାଇଲେ ଅନେକ ଭୁଲ୍ ହୋଇପାରେ। ଦୁଃଖର ବିଷୟ, ଏହି ପ୍ରକ୍ରିୟାକୁ ଅଟକାଇବା ଏବେ ସମ୍ଭବ ନୁହେଁ। ଆମେରିକା ସହ ତାଳ ଦେଇ ଅନ୍ୟ ଦେଶମାନେ ବି କୃତ୍ରିମ ବୁଦ୍ଧିମତ୍ତା ହାତରେ ମଣିଷ ଜୀବନ ନେବାର କ୍ଷମତା ଦେବାକୁ ପ୍ରାୟ ନିଧାର୍ଯ୍ୟ କରିସାରିଲେଣି।
ସୌଜନ୍ୟ -ସମ୍ୱାଦ
Comments are closed.