ରଣଜୀ ଟ୍ରଫିର ଷଷ୍ଠ ରାଉଣ୍ଡ୍: ଓଡ଼ିଶାର ବଡ଼ ବିଜୟ

ଭୁବନେଶ୍ବର: ଶିଲଂରେ ଆୟୋଜିତ ରଣଜୀ ଟ୍ରଫିର ଷଷ୍ଠ ରାଉଣ୍ଡ୍ ମୁକାବିଲାରେ ଓଡ଼ିଶା ଜବରଦସ୍ତ ବିଜୟ ହାସଲ କରିଛି। ଘରୋଇ ମେଘାଳୟକୁ ଗୋଟିଏ ପାଳି ଓ ୫୬ ରନ୍‌ରେ ହରାଇ ଚଳିତ ଋତୁରେ ଦ୍ବିତୀୟ ବିଜୟ ହାସଲ କରିବା ସହ ପଏଣ୍ଟ୍‌ ତାଲିକାର ଚତୁର୍ଥ ସ୍ଥାନକୁ ଉନ୍ନୀତ ‌ହୋଇଛି। ଓଡ଼ିଶା ଏବେ ଦୁଇଟି ଲେଖାଏଁ ଜୟ-ପରାଜୟ ସହ ଗୋଟିଏ ଲେଖାଏଁ ଅମୀମାଂସିତ ଓ ଫଳାଫଳ ହୀନ ମ୍ୟାଚ୍‌ରୁ ମୋଟ ୧୭ ପଏଣ୍ଟ୍‌ ପାଇ କେବଳ ଜମ୍ମୁ କଶ୍ମୀର, ବରୋଦା ଓ ମୁମ୍ବାଇ ପଛକୁ ରହିଛି। ସେହିଭଳି ଦ୍ରୁତ ବୋଲର ତାପସ ଦାସ ଉଭୟ ପାଳି (୬/୬୭, ୧/୫୭)ରେ ଚମତ୍କାର ବୋଲିଂ କରି ପଦାର୍ପଣରେ ମ୍ୟାଚ୍‌ର ଶ୍ରେଷ୍ଠ ଖେଳାଳି ପୁରସ୍କାର ଲାଭ କରିଥିବା ହାତଗଣତି ଓଡ଼ିଶା ଖେଳାଳିଙ୍କ ମଧ୍ୟରେ ସ୍ଥାନ ପାଇଛନ୍ତି।

ନୂଆ ଅଧିନାୟକ ସନ୍ଦୀପ ପଟ୍ଟନାୟକଙ୍କ ନେତୃତ୍ବରେ ପଡ଼ିଆକୁ ଓହ୍ଲାଇଥିବା ଓଡ଼ିଶା ଏହି ମ୍ୟାଚ୍‌ର ପ୍ରଥମ ଦିନରେ ହିଁ ବଡ଼ ବିଜୟ ପାଇଁ ମୂଳଦୁଆ ପକାଇଥିଲା। ତାପସଙ୍କ କ୍ୟାରିୟର୍ ଶ୍ରେଷ୍ଠ ବୋଲିଂ ଚିତ୍ର ବଳରେ ଘରୋଇ ମେଘାଳୟକୁ ମାତ୍ର ୧୯୮ ରନ୍‌ରେ ଅଲ୍‌ଆଉଟ୍ କରି ଦେଇଥିଲା। ଏହା ପରେ ପୂର୍ବତନ ଅଧିନାୟକ ଗୋବିନ୍ଦ ପୋଦ୍ଦାର (୧୨୧) ଏବଂ ମଧ୍ୟକ୍ରମ ବ୍ୟାଟର୍‌ ରାଜେଶ ଧୂପର (୧୦୨*)ଙ୍କ ଶତକ ସହ କାର୍ତ୍ତିକ ବିଶ୍ବାଳ (୬୮) ଓ ସ୍ବସ୍ତିକ ସାମଲ (୮୦)ଙ୍କ ଅର୍ଦ୍ଧଶତକ ବଳରେ ୫୪୮/୭ରେ ପାଳି ଘୋଷଣା କରି ୩୫୦ ରନ୍‌ର ଅଗ୍ରଣୀ ଲାଭ କରିଥିଲା। ପ୍ରଥମ ପାଳି ଭଳି ଦ୍ବିତୀୟ ପାଳିରେ ମଧ୍ୟ ଓଡ଼ିଶା ବୋଲରମାନେ ନିଜ କମାଲ ଜାରି ରଖିଥିଲେ। ରାଜେଶ ମହାନ୍ତି (୩/୪୯) ଓ ସୁନୀଲ ରାଉଳ (୪/୬୧)ଙ୍କ ଶାଣିତ ବୋଲିଂର ସମ୍ମୁଖୀନ ହୋଇ ନପାରି ମାତ୍ର ୯୭ ରନ୍‌ରେ ଅଧାଦଳ ହରାଇଥିଲା ମେଘାଳୟ। ଏହା ପରେ କ୍ରିଜ୍‌ରେ ଏକାଠି ହୋଇଥିବା ଯଶକିରଟ୍ ସିଂହ ସଚଦେବା (୮୨)  ଓ ସୁମିତ କୁମାର (୫୨) କିନ୍ତୁ ଷଷ୍ଠ ୱିକେଟ୍‌ରେ ୮୯ ରନ୍ ଯୋଡ଼ି ଓଡ଼ିଶା ବିଜୟକୁ ବିଳମ୍ବିତ କରିଥିଲେ। ଅବଶ୍ୟ ଶନିବାର ତୃତୀୟ ଦିନର ‌ଖେଳ ଶେଷ ହେବାର ଠିକ୍ ପୂର୍ବରୁ ସୁମିତଙ୍କୁ ଶିକାର କରି ସୁନୀଲ ରାଉଳ ମେଘାଳୟର ସବୁ ଆଶାରେ ପାଣି ପକାଇ ଦେଇଥିଲେ। ଷ୍ଟମ୍ପ୍ସ ବେଳକୁ ଓଡ଼ିଶା ୨୨୧ ରନ୍‌ରେ ମେଘାଳୟର ୬ ୱିକେଟ୍ ନେଇ ବଡ଼ ବିଜୟ ଆଡ଼କୁ ମୁହାଁଇଥିଲା। ରବିବାର ଘରୋଇ ଦଳର ଅବଶିଷ୍ଟ ୪ ୱିକେଟ୍‌କୁ ୭୩ ରନ୍ ଭିତରେ ନେଇ ପବିତ୍ର ଗଣତନ୍ତ୍ରଦିବସରେ ଓଡ଼ିଶା ବିଜୟର ଔପଚାରିକତା ପୂରଣ କରିଥିଲା। ଅନ୍ୟପକ୍ଷରେ ମେଘାଳୟ ୬ ମ୍ୟାଚ୍‌ରୁ ୬ ପରାଜୟ ବରଣ କରିବାର ଅପଯଶ ମୁଣ୍ଡାଇଥିଲା।

ସଂକ୍ଷିପ୍ତ ସ୍କୋର: ମେଘାଳୟ ପ୍ରଥମ ପାଳି-୧୯୮। ଓଡ଼ିଶା ପ୍ରଥମ ପାଳି-୫୪୮/୭, ଘୋଷଣା। ମେଘାଳୟ ଦ୍ବିତୀୟ ପାଳି: ୯୨.୨ ଓଭରରେ ୨୯୪ (ଯଶକିରଟ ସିଂହ ସଚଦେବା ୮୨, ସୁମିତ କୁମାର-୫୧, ୱାନାମ୍ବୋକ ନଙ୍ଗକ୍ଲାଓ-୨୭, ସୁନୀଲ ରାଉଳ-୪/୬୧, ରାଜେଶ ମହାନ୍ତି ୩/୪୯, ଗୋବିନ୍ଦ ପୋଦ୍ଦାର ୨/୫୪, ତାପସ ଦାସ ୧/୫୭)।

ସୌଜନ୍ୟ-ସମ୍ୱାଦ