ରାଜଧାନୀରେ କୋଟିଏ ଟଙ୍କାର ଟେଣ୍ଡର ଫିକ୍ସିଂ ମାମଲାର ଖୋଲିବ ଗୁମର: ୩ ଅଭିଯୁକ୍ତଙ୍କୁ ୩ ଦିନିଆ ରିମାଣ୍ଡରେ ନେବ ସିବିଆଇ

ଭୁବନେଶ୍ୱର,୦୯/୧୨: କେନ୍ଦ୍ରୀୟ ସରକାରୀ ଉଦ୍ୟୋଗ (ପିଏସ୍‌ୟୁ) ବ୍ରିଜ୍‌ ଆଣ୍ଡ ରୁଫ୍‌ କୋ (ଇଣ୍ଡିଆ) ପ୍ରାଇଭେଟ୍‌ ଲି.ରେ କୋଟିଏ ଟଙ୍କା ମୂଲ୍ୟର ଟେଣ୍ଡର ଫିକ୍ସିଂ ମାମଲାରେ ସିବିଆଇ ରବିବାର ୩ଜଣଙ୍କୁ ଗିରଫ କରିଛି । ସେମାନେ ହେଲେ ବ୍ରିଜ୍‌ ଆଣ୍ଡ ରୁଫ୍‌ କୋ. ସଂସ୍ଥାର ଗ୍ରୁପ୍‌ ଜେନେରାଲ ମ୍ୟାନେଜର (ଜିଜିଏମ୍‌) ଚଞ୍ଚଳ କୁମାର ମୁଖାର୍ଜୀ, ସନ୍ତୋଷ ମହାରଣା ଓ ଦେବଦତ୍ତ ମହାପାତ୍ର । ସନ୍ତୋଷ ହେଉଛନ୍ତି ପେଣ୍ଟା ଏ ଷ୍ଟୁଡିଓ ପ୍ରାଇଭେଟ୍‌ ଲିମିଟେଡ୍‌ର ନାମକ ବିଲ୍ଡର ସଂସ୍ଥାର ପରିଚାଳନା ନିର୍ଦ୍ଦେଶକ । ଦେବଦତ୍ତ ଜଣେ ସୁପରକ୍ଲାସ୍‌ ଠିକାଦାର । ସେ ଏହି ଲାଞ୍ଚ କାରବାରରେ ଦଲାଲ୍‌ ସାଜିଥିଲେ । ସିବିଆଇ ସମସ୍ତ ଅଭିଯୁକ୍ତଙ୍କୁ ୩ ଦିନିଆ ରିମାଣ୍ଡରେ ନେଇଛି । ଶନିବାର ସିବିଆଇ ଏହି ୩ ଜଣଙ୍କୁ ଅଟକ ରଖିଥିଲା ।

ସିବିଆଇ ପକ୍ଷରୁ ଆଜି ପଶ୍ଚିମବଙ୍ଗ ଓ ଓଡିଶାର ୮ଟି ଜାଗାରେ ଚଢ଼ାଉ କରାଯାଇଥିଲା । ରାମମନ୍ଦିର ନିକଟ ଓସିଏଚ୍‌ସି କମ୍ପେ୍ଲକ୍ସର ଦ୍ୱିତୀୟ ମହଲାରେ ଥିବା ବ୍ରିଜ୍‌ ଆଣ୍ଡ ରୁଫ୍‌ କୋ ସଂସ୍ଥାର ଶାଖା କାର୍ଯ୍ୟାଳୟ, କୋଲକାତାରେ ଥିବା ଶ୍ରୀ ମୁଖାର୍ଜୀଙ୍କ ବାସଭବନ, ଭଦ୍ରକସ୍ଥିତ ଦେବଦତ୍ତଙ୍କ ଘର, ପେଣ୍ଟା ଏ ଷ୍ଟୁଡିଓର ଅଫିସରେ ଯାଞ୍ଚ ଚାଲିଥିଲା । ସେଠାରୁ ଗୁରୁତ୍ୱପୂର୍ଣ୍ଣ କାଗଜପତ୍ର ସମେତ ଲକର, ଲାପଟପ୍‌ ଓ ହାର୍ଡଡିସ୍କ ଜବତ କରାଯାଇଛି ।

ସିବିଆଇ ସୂଚନା ମୁତାବକ, ବିଭିନ୍ନ ସରକାରୀ ପ୍ରକଳ୍ପରେ ବେଆଇନ୍‌ ଭାବେ ବିଲ୍‌ ପାସ୍‌ କରାଇବା ଓ ଟେଣ୍ଡର ଦେବାରେ ଶ୍ରୀ ମୁଖାର୍ଜୀ ଢ଼େର୍‌ ଲାଞ୍ଚ ନେଉଥିବା ନେଇ ଅଭିଯୋଗ ଉଠିଥିଲା । ଅଭିଯୋଗକ୍ରମେ ସିବିଆଇର ଏକ ଟିମ୍‌ ତାଙ୍କ ଗତିବିଧି ଉପରେ ତୀକ୍ଷ୍ଣ ନଜର ରଖିଥିଲା । ଗତକାଲି ସେ ୩ଟି ଗାଡି଼ ବଦଳାଇ ଭୁବନେଶ୍ୱରର ଏକ ତାରକା ହୋଟେଲରେ ପହଞ୍ଚିଥିଲେ । ପୂର୍ବରୁ ସେଠାରେ ସନ୍ତୋଷ ଓ ଦେବଦତ୍ତଙ୍କ ସମେତ ଅନ୍ୟଜଣେ ବ୍ୟକ୍ତି ଉପସ୍ଥିତ ଥିଲେ । ସମସ୍ତେ ହୋଟେଲ ଭିତରକୁ ଗଲେ । ହୋଟେଲରେ ଡିଲ୍‌ ହେବା ପରେ ଦେବଦତ୍ତଙ୍କ ମର୍ସିଡିଜ୍‌ କାର (ଓଡି୦୫ବିଭି ୯୯୯୯) ନିକଟକୁ ଗଲେ । ଶ୍ରୀ ମୁଖାର୍ଜୀ ଏହି ଦାମୀ କାରରୁ ୧୦ଲକ୍ଷ ଟଙ୍କା ଭର୍ତ୍ତି ବ୍ୟାଗ ନେଉଥିବା ବେଳେ ସିବିଆଇ ଟିମ୍‌ ମାଡି଼ ବସିଥିଲା । ସିବିଆଇ ଏହି କାରକୁ ଜବତ କରିଥିଲା ।

ଆଜି ୩ ଅଭିଯୁକ୍ତଙ୍କୁ ଭୁବନେଶ୍ୱରର ସିବିଆଇ ସ୍ୱତନ୍ତ୍ର ଅଦାଲତରେ ହାଜର କରାଯାଇଥିଲା । ୩ଜଣଙ୍କୁ ସପ୍ତାହେ ପାଇଁ ରିମାଣ୍ଡରେ ନେବାକୁ ସିବିଆଇ ପକ୍ଷରୁ ଆବେଦନ କରାଯାଇଥିଲା । କିନ୍ତୁ ଅଦାଲତ ୩ ଦିନ ରିମାଣ୍ଡ ପାଇଁ ଅନୁମତି ଦେଇଥିଲେ । ଏହାପରେ ସେମାନଙ୍କୁ ୟୁନିଟ୍‌-୮ସ୍ଥିତ ସିବିଆଇ ଶାଖା କାର୍ଯ୍ୟାଳୟକୁ ନେଇ ଜେରା କରାଯାଉଛି ।

ପେଣ୍ଟା ଏ ଷ୍ଟୁଡିଓ ସଂସ୍ଥାର ଅନ୍ୟ ଜଣେ ଉଚ୍ଚପଦସ୍ଥ ଅଧିକାରୀ ମନମୋହନ ମହାରଣାଙ୍କ ସମେତ ବ୍ରିଜ୍‌ ଆଣ୍ଡ ରୁଫ୍‌ କୋ. ସଂସ୍ଥାର କିଛି ଅଧିକାରୀଙ୍କ ଏହି ମାମଲାରେ ସମ୍ପୃକ୍ତି ରହିଛି । ସେମାନଙ୍କୁ ଖୋଜା ଚାଲିଛି । ଲାଞ୍ଚ ଦିଆନିଆ କାରବାରରେ ସମ୍ପୃକ୍ତ ମୁଖ୍ୟ ଦଲାଲକୁ ସିବିଆଇ ଗତକାଲିଠୁ ଅଟକ ରଖିଥିଲା । ତାଙ୍କୁ ଗିରଫ ନ କରି ଛାଡି଼ ଦେଇଥିବା ସୂଚନା ମିଳିଛି।

ସୌଜନ୍ୟ-ପ୍ରମେୟ