ରାଜ୍ୟସଭାରେ ଵକଫ୍ ବିତର୍କ: ‘ସମସ୍ତ ସମ୍ପତ୍ତି କେବଳ ମୁସଲମାନଙ୍କ ପାଇଁ’

ନୂଆଦିଲ୍ଲୀ: ବୁଧବାର ଲୋକସଭାରେ ୱକଫ୍ (ସଂଶୋଧନ) ବିଲ୍ ୨୦୨୪ ବହୁମତରେ ଗୃହୀତ ହେବା ପରେ କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜିଜୁ ଗୁରୁବାର ରାଜ୍ୟସଭାରେ ଏହାକୁ ଉପସ୍ଥାପନ କରିଛନ୍ତି। ରାଜ୍ୟସଭାରେ ଭାଷଣ ଦେଇ ମନ୍ତ୍ରୀ ଏହି ବିଲ୍‌କୁ ବେଆଇନ କହୁଥିବା ବିରୋଧୀଙ୍କୁ ସମାଲୋଚନା କରିବା ସହ ଅଣମୁସଲମାନଙ୍କ ହସ୍ତକ୍ଷେପର ପ୍ରଶ୍ନ ଉଠୁନାହିଁ ବୋଲି ପ୍ରତିଶ୍ରୁତି ଦେଇଥିଲେ। ରିଜିଜୁ କହିଥିଲେ, ସଂସଦରେ ଏହି ବିଲ୍ ଆଗତ କରିବା ପୂର୍ବରୁ ଆମେ ରାଜ୍ୟ ସରକାର, ସଂଖ୍ୟାଲଘୁ କମିସନ ଓ ଵକଫ୍ ବୋର୍ଡ ସହ ପରାମର୍ଶ କରିଥିଲୁ। ଉଭୟ ରାଜ୍ୟସଭା ଓ ଲୋକସଭାର ପ୍ରତିନିଧିଙ୍କୁ ନେଇ ଏକ ଯୁଗ୍ମ ସଂସଦୀୟ କମିଟି (ଜେପିସି) ଗଠନ କରାଯାଇଥିଲା। ଜେପିସିର ପରାମର୍ଶକୁ ସମାଲୋଚନା ସତ୍ତ୍ୱେ ବ୍ୟାପକ ଆଲୋଚନା ପରେ ଗତକାଲି ଲୋକସଭାରେ ଏହି ବିଲ୍ ପାରିତ ହୋଇଥିଲା। ବୁଧବାର ଲୋକସଭାରେ ୧୨ ଘଣ୍ଟିଆ ମାରାଥନ ବିତର୍କ ହୋଇଥିବା ବେଳେ ବିରୋଧୀ ଏହି ବିଲ୍‌କୁ ବେଆଇନ ଓ ଭେଦଭାବପୂର୍ଣ୍ଣ ବୋଲି କହିଛନ୍ତି।

ସରକାର ସାଂପ୍ରଦାୟିକ ଧ୍ରୁବୀକରଣ କରୁଛନ୍ତି: ବିରୋଧୀ
କଳା ସାର୍ଟ ପିନ୍ଧି ଡିଏମ୍‌କେ ସାଂସଦଙ୍କ ବିକ୍ଷୋଭ

କିରଣ ରିଜିଜୁ କହିଛନ୍ତି ଯେ ଆଜି ସୁଦ୍ଧା ୮.୭୨ ଲକ୍ଷ ୱକଫ୍ ସମ୍ପତ୍ତି ରହିଛି। ଯଦି ୨୦୦୬ରେ ସଚ୍ଚର କମିଟି ୪.୯ ଲକ୍ଷ ୱକଫ ସମ୍ପତ୍ତିରୁ ୧୨,୦୦୦ କୋଟି ଟଙ୍କାର ଆୟ ଆକଳନ କରିଥିଲା, ତେବେ ଆପଣ କଳ୍ପନା କରିପାରିବେ ଏହି ସମ୍ପତ୍ତିଗୁଡିକ ବର୍ତ୍ତମାନ କେତେ ଆୟ କରୁଛି । ମନ୍ତ୍ରୀ ଦୋହରାଇଛନ୍ତି ଯେ ଵକଫ୍ ବୋର୍ଡ କେବଳ ୱକଫ୍ ସମ୍ପତ୍ତିର ତଦାରଖ କରିବ, ପରିଚାଳନା କରିବ ନାହିଁ। ବିଲ୍ ଆଗତ କରିବା ପରେ ରିଜିଜୁ କହିଛନ୍ତି, ୱକଫ୍ ସଂଶୋଧନ ବିଲ୍‌କୁ ନେଇ ସଂସଦରେ ହୋଇଥିବା ବିତର୍କରୁ ଗୋଟିଏ କଥା ସ୍ପଷ୍ଟ ହେଉଛି ଯେ ୱକଫ୍‌ର କୋଟି କୋଟି ଟଙ୍କାର ସମ୍ପତ୍ତି ବେଆଇନ ଭାବେ ଦଖଲ କରାଯାଇଛି। ଵକଫ୍ ବୋର୍ଡର ଅବ୍ୟବସ୍ଥାକୁ ଦୂର କରିବା ପାଇଁ ଏହି ବିଲ୍ ଅଣାଯାଇଛି। ଵକଫ୍ ଅଧୀନରେ ଥିବା ସମ୍ପତ୍ତିଗୁଡ଼ିକ ହେଉଛି ଆମର ମୁସଲମାନ ଭାଇମାନଙ୍କ କଲ୍ୟାଣ ପାଇଁ ଉଦ୍ଦିଷ୍ଟ ସାମାଜିକ ଓ ଧାର୍ମିକ କାର୍ଯ୍ୟ ପାଇଁ ଦାନ କରାଯାଇଥିବା ସମ୍ପତ୍ତି ଏବଂ ସେଗୁଡ଼ିକୁ ପରିଚାଳନା କରିବା ପାଇଁ ଏହି ଆଇନ ପ୍ରଣୟନ କରାଯାଇଛି।

ଦୁଇ ଜେଡିୟୁ ନେତାଙ୍କ ଇସ୍ତଫା
ପାଟନା‌: ଜେଡିୟୁର ଦୁଇ ଜଣ ବରିଷ୍ଠ ‌ନେତା ମହମ୍ମଦ କ୍ବାସିମ ଅନ୍‌ସାରି ଏବଂ ମହମ୍ମଦ ନୱାଜ ମଲିକ ଆଜି ଦଳରୁ ଇସ୍ତଫା ଦେଇଛନ୍ତି।  ଜେଡିୟୁ   ୱକଫ୍‌ ସଂଶୋଧନ ବିଲ୍‌କୁ ସମର୍ଥନ କରିବା  ଘଟଣାକୁ ବିରୋଧ କରି ଉକ୍ତ ୨ ନେତା ଆଜି ଦଳର ସମସ୍ତ ପଦରୁ ଇସ୍ତଫା ଦେଇଛନ୍ତି।   ଜେଡିୟୁ ସଭାପତି  ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଏକ ଚିଠି ଲେଖି କ୍ବାସିମ ଅନ୍‌ସାରି ଦଳର ନିଷ୍ପତ୍ତିକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।  ଦଳର ଧର୍ମନିରପେକ୍ଷ ନୀତିକୁ ସମଗ୍ର ଦେଶରେ ଲକ୍ଷ ଲକ୍ଷ ମୁସଲମାନ ସମର୍ଥନ କରୁଥିଲେ ଏବଂ ଏବେ ଏହି ନୀତି ବଦଳିଯାଇଥିବାରୁ ମୁସଲମାନ ସମ୍ପ୍ରଦାୟ ନିରାଶ ହୋଇଛନ୍ତି ବୋଲି ସେ କହିଛନ୍ତି।  ଗତକାଲି ଲୋକସଭାରେ ଦଳର ନେତା ଲଲନ ସିଂହ ‌ଯେଉଁଭଳି ଭାବେ ବିଲ୍‌କୁ ସମର୍ଥନ କରି ବକ୍ତବ୍ୟ ରଖିଥିଲେ ତାହା ମୁସଲମାନ ସମ୍ପ୍ରଦାୟକୁ ହତୋତ୍ସାହିତ କରିଛି ବୋଲି ଅନ୍‌ସାରି ତାଙ୍କ ଇସ୍ତଫାପତ୍ର‌ରେ ଦର୍ଶାଇଛନ୍ତି।  ଅନ୍‌ସାରି କହିଛନ୍ତି, ୱକଫ୍‌ ବିଲ୍‌ ଭାରତୀୟ ମୁସଲମାନଙ୍କ ବିରୋଧରେ ଏବଂ ଏହାକୁ କୌଣସି ପରିସ୍ଥିତିରେ ଗ୍ରହଣ କରାଯିବନି।

ଏହାକୁ ନେଇ କାହାର ସନ୍ଦେହ ରହିବା ଉଚିତ ନୁହେଁ। ମିଥ୍ୟା ପ୍ରଚାର ପାଇଁ ବିରୋଧୀ ଦଳଗୁଡ଼ିକୁ କଡ଼ା ସମାଲୋଚନା କରିବା ସହ ସମସ୍ତ ଵକଫ୍ ସମ୍ପତ୍ତି କେବଳ ମୁସଲମାନଙ୍କ ପାଇଁ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି। ରିଜିଜୁ କହିଛନ୍ତି, ସଂଖ୍ୟାଲଘୁ ବ୍ୟାପାର ମନ୍ତ୍ରଣାଳୟ ଦେଶର ଅନେକ ଅଂଶୀଦାରଙ୍କୁ ବିଶ୍ୱାସକୁ ନେବା ପରେ ଏହି ବିଲ୍ ପ୍ରସ୍ତୁତ କରିଛି। ସମୁଦାୟ ୨୮୪ଟି ସଂଗଠନ ଏହି ବିଲ୍ ଉପରେ ନିଜର ମତାମତ ଦେଇଥିବା ବେଳେ ଏକ କୋଟିରୁ ଅଧିକ ଲୋକ ଏ ସଂକ୍ରାନ୍ତରେ ନିଜର ମତାମତ ରଖିଛନ୍ତି। ଵକଫ୍ ବିଲ୍ ଉପରେ ରାଜ୍ୟସଭାରେ କଂଗ୍ରେସ ସାଂସଦ ସୟଦ ନସିର ହୁସେନ୍ ସରକାରଙ୍କୁ ତୀବ୍ର ସମାଲୋଚନା କରିବା ସହ ସାମ୍ପ୍ରଦାୟିକ ଧ୍ରୁବୀକରଣ ଅଭିଯୋଗ ଆଣିଛନ୍ତି। ସେ ଦାବି କରିଛନ୍ତି ଯେ ଏହି ବିଲ୍ ମିଥ୍ୟା ତଥା ଉପରେ ଆଧାରିତ। ଆପଣ ମୁସଲମାନମାନଙ୍କୁ ଦ୍ବିତୀୟ ଶ୍ରେଣୀ ନାଗରିକରେ ପରିଣତ କରିବାକୁ ଚାହୁଛନ୍ତି କି ‌ବୋଲି ହୁସେନ ପଚାରିଥିଲେ। ଡିଏମ୍‌କେ ନେତାମାନେ ସଂସଦ ପରିସରରେ ବିଲ୍‌କୁ ବିରୋଧ କରି କଳା ସାର୍ଟ ପିନ୍ଧି ବିକ୍ଷୋଭ ପ୍ରଦର୍ଶନ କରିଥିଲେ। ଟିଏମ୍‌ସି ସାଂସଦ ନାଦିମୁଲ ହକ୍ କହିଛନ୍ତି ଯେ ୱକଫ୍ କରିବା ପୂର୍ବରୁ ଜଣେ ବ୍ୟକ୍ତି ସର୍ବନିମ୍ନ ପାଞ୍ଚ ବର୍ଷ ପର୍ଯ୍ୟନ୍ତ ଇସଲାମ ଧର୍ମ ପାଳନ କରିବାର ବ୍ୟବସ୍ଥା ରହିଛି। ଏହି ଆବଶ୍ୟକତା ଅସାମ୍ବିଧାନିକ ଓ ଧାରା ୧୪ର ଉଲ୍ଲଂଘନ।

ସୌଜନ୍ୟ-ସମ୍ୱାଦ