ରାଜ୍ୟସଭା ଅଧ୍ୟକ୍ଷଙ୍କ ବିରୋଧରେ ଅନସ୍ଥା ନୋଟିସ୍‌: ସଂସଦୀୟ ଇତିହାସରେ ପ୍ରଥମ

ନୂଆଦିଲ୍ଲୀ: ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼ଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବା ପାଇଁ ବିରୋଧୀଦଳମାନେ ମଙ୍ଗଳବାର ନୋଟିସ୍ ଦେଇଛନ୍ତି। ଏହା ଭାରତର ସଂସଦୀୟ ଇତିହାସରେ ପ୍ରଥମ ଘଟଣା ହୋଇଥିବା ବେଳେ ଏହି ନୋଟିସ୍‌ ପଛରେ ୭୦ ସାଂସଦଙ୍କ ସମର୍ଥନ ରହିଥିବା କୁହାଯାଇଛି। ଅଗଷ୍ଟରେ ବଜେଟ୍ ଅଧିବେଶନ ସମୟରେ ମଧ୍ୟ ବିରୋଧୀ ଦଳମାନେ ସମାନ ପ୍ରସ୍ତାବ ଉପରେ ବିଚାର କରିଥିଲେ, କିନ୍ତୁ ତାହା କାର୍ଯ୍ୟକାରୀ ହୋଇପାରି ନଥିଲା। ସୂଚନାଯୋଗ୍ୟ, ଭାରତୀୟ ସମ୍ବିଧାନର ଧାରା ୬୪ ଅନୁଯାୟୀ ଉପରାଷ୍ଟ୍ରପତି ରାଜ୍ୟ ପରିଷଦର କାର୍ଯ୍ୟନିର୍ବାହୀ ଅଧ୍ୟକ୍ଷ ରହିବେ ।ଯେହେତୁ ଉପରାଷ୍ଟ୍ରପତି ଏବଂ ରାଜ୍ୟସଭା ଅଧ୍ୟକ୍ଷ ସମାନ ବ୍ୟକ୍ତି ହେବା ଆବଶ୍ୟକ, ତେଣୁ ତାଙ୍କୁ ହଟାଇବା ପ୍ରକ୍ରିୟା ମଧ୍ୟ ସମାନ ଏବଂ ଧାରା ୬୭ ଅଧୀନରେ ଏହା ଧାର୍ଯ୍ୟ କରାଯାଇଛି। ଏହି ବ୍ୟବସ୍ଥା ଅନୁଯାୟୀ ଉପରାଷ୍ଟ୍ରପତି ତାଙ୍କ ପଦରେ ଆସୀନ ହେବା ଦିନଠାରୁ ପାଞ୍ଚ ବର୍ଷ ପର୍ଯ୍ୟନ୍ତ ପଦରେ ରହିବେ। ଯଦି ସେ ରାଷ୍ଟ୍ରପତିଙ୍କୁ ଇସ୍ତଫାପତ୍ର ପଠାଇ ଇସ୍ତଫା ଦେବେ କିମ୍ବା ପଦରୁ ତାଙ୍କୁ ହଟାଇ ଦିଆଯିବ ସେ କ୍ଷେତ୍ରରେ ହିଁ ସେ ପଦରୁ ବିଦା ହେବେ। ଧାରା ୬୭(ବି)ରେ ଉପରାଷ୍ଟ୍ରପତିଙ୍କୁ ହଟାଇବା କିମ୍ବା ମହାଭିଯୋଗ ଆଣିବା ପ୍ରାବଧାନ ରହିଛି। ରାଜ୍ୟସଭାରେ ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ଗୃହୀତ ହେବାପରେ ଲୋକସଭାରେ ମଧ୍ୟ ଏହା ଗୃହୀତ ହେବାକୁ ପଡ଼ିବ।

ମହାଭିଯୋଗ ନୋଟିସ୍‌ର ୧୪ ଦିନର ଅବଧି ସରିବା ପରେ ରାଜ୍ୟସଭାରେ ଏହି ସଂକଳ୍ପ ଉପରେ ଆଲୋଚନା ହେବ। ଏହାପରେ ଧାରା ୬୭(ବି)ରେ ଦର୍ଶାଯାଇଥିବା ପ୍ରକ୍ରିୟା ଅନୁସରଣ କରାଯିବ। ବର୍ତ୍ତମାନ ପରିସ୍ଥିତିରେ ଏହି ଅନାସ୍ଥା ପ୍ରସ୍ତାବ ଗୃହରେ ଆଗତ ହେବ କି ନାହିଁ ତାହା ସ୍ପଷ୍ଟ ହୋଇନାହିଁ। କାରଣ ସଂସଦର ଶୀତକାଳୀନ ଅଧିବେଶନ ଡିସେମ୍ବର ୨୦ରେ ଶେଷ ହେବାକୁ ଯାଉଛି, ଯାହାକି ୧୪ ଦିନରୁ କମ୍ ସମୟ ବାକି ଅଛି । ଗୃହର ପରବର୍ତ୍ତୀ ଅଧିବେଶନରେ ଏହି ସମାନ ସଂକଳ୍ପ ଉପରେ ବିଚାର କରାଯାଇପାରିବ କି ନାହିଁ ତାହା ନିର୍ଦ୍ଧାରଣ କରିବାର କୌଣସି ଉଦାହରଣ ନାହିଁ।

ଏନ୍‌ଡିଏର ସଂଖ୍ୟାଗରିଷ୍ଠତା ଅଛି: କିରଣ ରିଜିଜୁ

ନୂଆଦିଲ୍ଲ: ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼ଙ୍କ ବିରୋଧରେ ୫୦ରୁ ଅଧିକ ବିରୋଧୀ ଦଳ ସାଂସଦଙ୍କ ଦସ୍ତଖତ ସମ୍ବଳିତ ଅନାସ୍ଥା ପ୍ରସ୍ତାବ ଉପରେ କେନ୍ଦ୍ରମନ୍ତ୍ରୀ କିରଣ ରିଜିଜୁ ତାଙ୍କ ପ୍ରତିକ୍ରିୟା ରଖିଛନ୍ତି। ବିରୋଧୀ ଦଳମାନେ ବାସ୍ତବତାଠାରୁ ବହୁତ ଦୂରରେ ଅଛନ୍ତି ଏବଂ ଏନ୍‌ଡିଏର ସଂଖ୍ୟାଗରିଷ୍ଠତା ଥିବାରୁ ଏଭଳି ଅନାବଶ୍ୟକ ଅନାସ୍ଥା ପ୍ରସ୍ତାବ ବିଫଳ ହେବ ବୋଲି ରିଜିଜୁ କହିଛନ୍ତି। ରାଜ୍ୟସଭା ଅଧ୍ୟକ୍ଷଙ୍କୁ ବିରୋଧୀ ଦଳ ସାଂସଦମାନେ ଯଥୋଚିତ ସମ୍ମାନ ଦେବା ବଦଳରେ ପକ୍ଷପାତିତା ଅଭିଯୋଗ ଆଣି କେବଳ ବିଭ୍ରାନ୍ତି ସୃଷ୍ଟି କରିବାକୁ ଚାହୁଛନ୍ତି ବୋଲି ରିଜିଜୁ କହିଛନ୍ତି।

ରାଜ୍ୟସଭାରେ ଏନ୍‌ଡିଏର ସଂଖ୍ୟାଗରିଷ୍ଠତା ରହିଛି ଏବଂ ବିରୋଧୀ ଦଳଙ୍କ ଏଭଳି ନୋଟିସକୁ ପ୍ରତ୍ୟାଖ୍ୟାନ କରାଯିବ ବୋଲି ମନ୍ତବ୍ୟ ଦେଇ ରିଜିଜୁ କହିଛନ୍ତି, ଆମେ ସୁନିଶ୍ଚିତ କରିବୁ ଯେ ବିରୋଧୀ ଦଳଙ୍କ ଏଭଳି ପଦକ୍ଷେପ ଯେଭଳି ଗ୍ରହଣୀୟ ହେବନାହିଁ। ଏହି ଅନାସ୍ଥା ନୋଟିସରେ ମମତା ବାନାର୍ଜୀଙ୍କ ଟିଏମ୍‌ସି, ଅରବିନ୍ଦ କେଜ୍ରିୱାଲଙ୍କ ଆମ୍ ଆଦମୀ ପାର୍ଟି ଏବଂ ଅଖିଳେଶ ଯାଦବଙ୍କ ସମାଜବାଦୀ ପାର୍ଟିର ସାଂସଦମାନେ ମଧ୍ୟ ଦସ୍ତଖତ କରିଛନ୍ତି। ତାମିଲନାଡୁର ଡିଏମ୍‌କେ ଏବଂ ଲାଲୁ ଯାଦବଙ୍କ ଆର୍‌ଜେଡି ନେତାମାନେ ମଧ୍ୟ ରାଜ୍ୟସଭା ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ନୋଟିସ୍‌ରେ ସ୍ୱାକ୍ଷର କରିଛନ୍ତି।
ଆମେରିକୀୟ ବିଲିୟନେୟାର ନିବେଶକ ଜର୍ଜ ସୋରୋସଙ୍କ ସହ କଂଗ୍ରେସ ନେତୃତ୍ୱର ସମ୍ପର୍କ ଉପରେ ବିଜେପିକୁ ଆଲୋଚନା ପାଇଁ ଅନୁମତି ଦେବାକୁ ଧନଖଡ଼ ରାଜି ହେବା ପରେ ବିରୋଧୀ ଦଳମାନେ ଗତକାଲି ଅନାସ୍ଥା ପ୍ରସ୍ତାବ ଉପରେ ନିଷ୍ପତ୍ତି ନେଇଥିଲେ। ଦେଶକୁ ଅସ୍ଥିର କରିବା ପାଇଁ କଂଗ୍ରେସ ସୋରୋସ୍ ସହ ମିଶିଛି ବୋଲି ବିଜେପି ଅଭିଯୋଗ କରିଛି। ଅନ୍ୟ ପ୍ରସଙ୍ଗରେ ଆଲୋଚନା ପାଇଁ ଦିଆଯାଇଥିବା ନୋଟିସକୁ ଅଧ୍ୟକ୍ଷ ପ୍ରତ୍ୟାଖ୍ୟାନ କରିଥିବା ବେଳେ ଶାସକ ଦଳର ସଦସ୍ୟମାନଙ୍କୁ କିଭଳି ସୋରୋସ ପ୍ରସଙ୍ଗ ଉଠାଇବାକୁ ଅନୁମତି ଦେଉଛନ୍ତି ବୋଲି ବିରୋଧୀ କଂଗ୍ରେସ ପ୍ରଶ୍ନ କରିଛି।

ସୌଜନ୍ୟ-ସମ୍ୱାଦ