ରୁଷ୍‌ ଆଣିଲା କ୍ୟାନ୍‌ସର ଟିକା: ମାଗଣାରେ ବଣ୍ଟନ କରିବ

ମସ୍କୋ: କ୍ୟାନସର ବିରୋଧରେ ରୁଷ୍ ଏକ ଏମ୍ଆର୍‌ଏନ୍ଏ ଟିକା ବିକଶିତ କରିଛି। କର୍କଟ ରୋଗୀଙ୍କୁ ମାଗଣାରେ ଏହି ଟିକା ବଣ୍ଟନ କରାଯିବ ବୋଲି ରୁଷ୍ ସ୍ୱାସ୍ଥ୍ୟ ମନ୍ତ୍ରଣାଳୟର ରେଡିଓ ମେଡିକାଲ ରିସର୍ଚ୍ଚ ସେଣ୍ଟରର ଜେନେରାଲ ଡାଇରେକ୍ଟର ଆନ୍ଦ୍ରେ କାପ୍ରିନ  କହିଛନ୍ତି। ଅନେକ ଗବେଷଣା କେନ୍ଦ୍ରର ସହଯୋଗରେ ଏହି ଟିକା ବିକଶିତ ହୋଇଛି ଏବଂ ୨୦୨୫ ପ୍ରାରମ୍ଭ ସୁଦ୍ଧା ଏହା ସର୍ବସାଧାରଣଙ୍କ ବ୍ୟବହାର ପାଇଁ ଉପଲବ୍ଧ ହେବ ବୋଲି ଆଶା କରାଯାଉଛି। ଗାମାଲେୟା ନ୍ୟାସନାଲ ରିସର୍ଚ୍ଚ ସେଣ୍ଟର ଫର ଏପିଡେମିଓଲୋଜି ଆଣ୍ଡ ମାଇକ୍ରୋବାୟୋଲୋଜିର ନିର୍ଦ୍ଦେଶକ ଆଲେକଜାଣ୍ଡର ଗିଣ୍ଟସବର୍ଗ କହିଛନ୍ତି ଯେ ଏହି ଟିକାର ପ୍ରି-କ୍ଲିନିକାଲ ପରୀକ୍ଷଣରୁ ଜଣାପଡିଛି, ଏହା ଟ୍ୟୁମରର ବିକାଶ ଓ ସମ୍ଭାବ୍ୟ ମେଟାଷ୍ଟାସିସକୁ ରୋକିଥାଏ।

ଏମ୍‌ଆର୍‌ଏନ୍‌ଏ ବା ମେସେଞ୍ଜର-ଆର୍‌ଏନ୍‌ଏ ଟିକାରେ ସଂକ୍ରାମକ ଏଜେଣ୍ଟର ନିର୍ଦ୍ଦିଷ୍ଟ ଅଂଶର ପ୍ରୋଟିନ, ଶର୍କରା କିମ୍ବା କୋଟିଂ ଭଳି ଜିନିଷ ବ୍ୟବାହାର କରାଯାଏ। ଏହି ଟିକା ଆମ କୋଷଗୁଡ଼ିକୁ ଏକ ପ୍ରୋଟିନ୍ କିମ୍ବା କେବଳ ଏକ ପ୍ରୋଟିନର ଏକ ଅଂଶ ତିଆରି କରିବାକୁ ବାର୍ତ୍ତା ଦେଇଥାଏ ଯାହା ଭୂତାଣୁ ପରି ଅଟେ। ଏହାପରେ ପ୍ରୋଟିନ୍ ଆମ ଶରୀରରେ ରୋଗ ପ୍ରତିରୋଧକ ଶକ୍ତି ସୃଷ୍ଟି କରିଥାଏ। ଗିଣ୍ଟସବର୍ଗ କହିଛନ୍ତି, ଏଆଇ ମାଧ୍ୟମରେ କୃତ୍ରିମ ନ୍ୟୁରାଲ୍ ନେଟୱର୍କର ବ୍ୟବହାର ଦ୍ୱାରା କର୍କଟ ଟିକା ତିଆରି ପାଇଁ ଆବଶ୍ୟକ କମ୍ପ୍ୟୁଟିଂ ଅବଧି ଏକ ଘଣ୍ଟାରୁ କମ୍ ହୋଇପାରେ। ବର୍ତ୍ତମାନ ଏକ ଟିକା ତିଆରି କରିବାକୁ ବହୁତ ସମୟ ଲାଗୁଛି। ଆମେ ଇଭାନିକୋଭ ଇନଷ୍ଟିଚ୍ୟୁଟକୁ ସାମିଲ କରିଛୁ, ଯିଏ କି ଏହି ପ୍ରକ୍ରିୟାକୁ ସହଜ କରିବା ପାଇଁ ଏଆଇର ସାହାଯ୍ୟ ନେଉଛି। ଏହା ଦ୍ବାରା ନ୍ୟୁରାଲ ନେଟୱାର୍କ କମ୍ପ୍ୟୁଟିଂ କାମ ପ୍ରାୟ ଅଧ ଘଣ୍ଟାରୁ ଏକ ଘଣ୍ଟା ଭିତରେ ହୋଇଯାଉଛି।

ସୌଜନ୍ୟ-ସମ୍ୱାଦ