ଵକଫ୍ ସଂଶୋଧନ ବିଲ୍ ଆଗତ ଆଜି: ବିରୋଧ ପାଇଁ ଇଣ୍ଡି ମେଣ୍ଟର ନିଷ୍ପତ୍ତି

ନୂଆଦିଲ୍ଲୀ: ଲୋକସଭାରେ ୱକଫ୍ ସଂଶୋଧନ ବିଲ୍  ଆସନ୍ତାକାଲି ପ୍ରଶ୍ନକାଳ ପରେ  ମଧ୍ୟାହ୍ନ ୧୨ଟାରେ ଉପସ୍ଥାପନ କରାଯିବ। ବାଚସ୍ପତି ଓମ୍ ବିର୍ଲା ଏ ନେଇ ୮ ଘଣ୍ଟା ଆଲୋଚନା ପାଇଁ ସମୟ ଧାର୍ଯ୍ୟ କରିଛନ୍ତି।  ତେବେ ବିଲ୍‌ ବାବଦ  ଆଲୋଚନା ଏହି ସମୟ ପର୍ଯ୍ୟାପ୍ତ ନୁହେଁ, ଏହି  ଆଲୋଚନା ୧୨ ଘଣ୍ଟା ହେବା ଦରକାର ବୋଳି ବିରୋଧୀ ଦଳମାନେ ଦାବି କରିଛନ୍ତି। ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି ଯେ ଏହି ବିଲ୍ ଉପରେ ଆଲୋଚନା ସମୟ ବୃଦ୍ଧି କରାଯାଇପାରେ।  ବରିଷ୍ଠ କଂଗ୍ରେସ ନେତା କେସି ବେଣୁଗୋପାଳ କହିଛନ୍ତି ଯେ, ସରକାର ଏହି ପ୍ରସଙ୍ଗରେ ନିଜର ଏଜେଣ୍ଡା ଲାଗୁ କରୁଛନ୍ତି ଏବଂ ଇଣ୍ଡି ମେଣ୍ଟ ବିଲ୍‌କୁ ବିରାଧ କରିବାକୁ ସର୍ବସମ୍ମତିକ୍ରମେ ନିଷ୍ପତ୍ତି ନେଇଛି।  ସମାଜବାଦୀ ପାର୍ଟି ସୁପ୍ରିମୋ ତଥା ସାଂସଦ ଅଖିଳେଶ ଯାଦବ କହିଛନ୍ତି ଯେ ଆମେ ବିଲ୍‌କୁ ଜୋର୍‌ଦାର ବିରୋଧ କରିବୁ ଏବଂ ଏଥିରେ କୌଣସି ସାଲିସ୍‌ ହେବନାହିଁ। ଅନ୍ୟପକ୍ଷରେ ଵକଫ୍‌ରେ ସଂସ୍କାର ସମୟର ଆବଶ୍ୟକତା ଏବଂ ଦେଶ ପାଇଁ ଜରୁରୀ ବୋଲି ବିଜେପି ନେତାମାନେ କହିଛନ୍ତି।

ଜେଡିୟୁ, ଟିଡିପିର ପରାମର୍ଶ ମାନିଲେ ସରକାର
ମିଳିଥିବା ସୂଚନା ଅନୁଯାୟୀ, ୱକଫ୍ ସଂଶୋଧନ ବିଲ୍ ଉପରେ ଜେଡିୟୁ ଓ ଟିଡିପି ୩ଟି ପରାମର୍ଶ ଦେଇଥିଲେ। ସରକାର ସବୁ କିଛି ସ୍ୱୀକାର କରିଥିବାରୁ ଉଭୟ ଦଳର ସମର୍ଥନ ବିଲ୍‌ ପ୍ରତି ରହିବ ବୋଲି କୁହାଯାଉଛି। ସେହି ତିନୋଟି ପରାମର୍ଶ ହେଉଛି: ୧) ଆଇନକୁ ପିଛିଲା ତାରିଖରୁ ଲାଗୁ କରାଯିବା ଉଚିତ ନୁହେଁ। ୨) ପୁରୁଣା ମସଜିଦ, ଦରଘା କିମ୍ବା ଅନ୍ୟ ମୁସଲମାନ ଧାର୍ମିକ ସ୍ଥଳରେ କୌଣସି ପ୍ରକାର ଭଙ୍ଗାରୁଜା କରାଯିବ ନାହିଁ। ୩) ଜମି ଏକ ରାଜ୍ୟ ବିଷୟ। ଜମି ଉପରେ ରାଜ୍ୟଗୁଡ଼ିକର ସ୍ପଷ୍ଟ ମତାମତ ମଧ୍ୟ ନିଆଯିବା ଦରକାର।

ଦେଶ ଜାଣୁ କାହାର ଆଭିମୁଖ୍ୟ କ’ଣ: ରିଜିଜୁ
ବିଜେପି ନିଜ ସାଂସଦମାନଙ୍କୁ  ଆସନ୍ତାକାଲି ପୂରା ସମୟ ଗୃହରେ ଉପସ୍ଥିତ ରହିବାକୁ ହ୍ୱିପ୍ ଜାରି କରିଛି। ଏଥିସହିତ ବଜେଟ୍ ଅଧିବେଶନର ଅବଶିଷ୍ଟ ୩ ଦିନ ଗୃହରେ ଉପସ୍ଥିତ ରହିବାକୁ କଂଗ୍ରେସ ମଧ୍ୟ ତା’ର ସମସ୍ତ ସାଂସଦଙ୍କୁ ହ୍ୱିପ୍ ଜାରି କରିଛି। ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି, ଆମେ ବିଲ୍ ଉପରେ ଆଲୋଚନା ଚାହୁଛୁ। ଏ ନେଇ ସବୁ ରାଜନୈତିକ ଦଳର କହିବାର ଅଧିକାର ରହିଛି। କେଉଁ ଦଳର ଆଭିମୁଖ୍ୟ କ’ଣ ତାହା ମଧ୍ୟ ଦେଶ ଜାଣିବାକୁ ଚାହୁଛି। ଯଦି ବିରୋଧୀ ବିତର୍କରେ ଭାଗ ନେବାକୁ ଚାହୁନାହାନ୍ତି, ତେବେ ଆମେ ସେମାନଙ୍କୁ ଅଟକାଇ ପାରିବୁ ନାହିଁ। ୱକଫ୍‌ ବିଲ୍‌ ଉପରେ ଆଜି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି, ପ୍ରତ୍ୟେକ ଭଲ କାମକୁ  ଏବେ ବିରୋଧ କରାଯାଉଛି।   ସରକାରୀ ସମ୍ପତ୍ତିକୁ ବଳପୂର୍ବକ ଦଖଲ କରିବା ପାଇଁ ଵକଫ୍ ଏକ ମାଧ୍ୟମ ପାଲଟିଛି। ଅନ୍ୟପକ୍ଷରେ ଏଆଇଏମ୍‌ଆଇଏମ୍ ମୁଖ୍ୟ ଅସଦୁଦ୍ଦିନ ଅୱେସି ଏହି  ବିଲ୍‌କୁ ‘ଵକଫ୍ ବରବାଦ ବିଲ୍’ ବୋଲି କହିଛନ୍ତି। ମୁସଲମାନମାନଙ୍କ ପ୍ରତି ଘୃଣା ସୃଷ୍ଟି କରିବା  ସରକାରଙ୍କ ଏକମାତ୍ର ଲକ୍ଷ୍ୟ ବୋଲି ସେ ଅଭିଯୋଗ କରିଛନ୍ତି।

ସୌଜନ୍ୟ-ସମ୍ୱାଦ