ଶକ୍ତିକାନ୍ତଙ୍କ ତିନି ଚିନ୍ତା‌: ବିକାଶ, ଦରଦାମ୍, ଟଙ୍କା

ମୁମ୍ବାଇ: ଭାରତୀୟ ରିଜର୍ଭ ବ୍ୟାଙ୍କର ଗଭର୍ଣ୍ଣର ଶକ୍ତିକାନ୍ତ ଦାସ ତାଙ୍କ ଦ୍ବିତୀୟ ପାଳି କାର୍ଯ୍ୟକାଳର ଶେଷ ମୁଦ୍ରାନୀତି ସମୀକ୍ଷାରେ ସାହସିକ ପଦକ୍ଷେପ ଗ୍ରହଣ କରିଛନ୍ତି। ସରକାରଙ୍କ ଚାପ ଆଗରେ ମୁଣ୍ଡ ନ ନୁଆଁଇ ଦରଦାମ୍‌ ନିୟନ୍ତ୍ରଣକୁ ଦେଇଛନ୍ତି ପ୍ରାଥମିକତା। ତାଙ୍କ କାର୍ଯ୍ୟକାଳ ୧୦ ତାରିଖରେ ଶେଷ ହେଉଥିବା ବେଳେ ତୃତୀୟ ସୁଯୋଗ ନିଷ୍ପତ୍ତିକୁ ସରକାର ଝୁଲାଇ ରଖିଛନ୍ତି। ଏହା ସତ୍ତ୍ବେ ଶକ୍ତିକାନ୍ତ ସୁଧ ନ ବଦଳାଇବା ଭଳି ନିଷ୍ପତ୍ତି ନେଇଛନ୍ତି। ଲଗାତାର ଏକାଦଶ ଥର ପାଇଁ ୬.୫ ପ୍ରତିଶତରେ ରେପୋ ହାରକୁ ଅପରିବର୍ତ୍ତିତ ରଖିଛନ୍ତି। ମୁଦ୍ରାନୀତି ରିପୋର୍ଟକୁ ନିରେଖି ଦେଖିଲେ ଶକ୍ତିକାନ୍ତ ତିନିଟି ବିଷୟକୁ ପ୍ରାଥମିକତା ଦେଇଥିବା ଜଣାପଡ଼ୁଛି। ତାହା ହେଉଛି ଦରଦାମ୍ ନିୟନ୍ତ୍ରଣ, ଦେଶର ବିକାଶ ଓ ଦୁର୍ବଳ ଟଙ୍କା।

ଦରଦାମ୍‌ ନିୟନ୍ତ୍ରଣ ଲାଗି ସେ ରେପୋ ହାରକୁ ୬.୫ ପ୍ରତିଶତରେ ଅପରିବର୍ତ୍ତିତ ରଖିଛନ୍ତି। ସେଥିପାଇଁ ଋଣ ନେଇଥିବା କିମ୍ବା ନୂଆ ଋଣ ନେବାକୁ ଚାହୁଥିବା ଗ୍ରାହକମାନଙ୍କୁ କୌଣସି ପ୍ରକାର ଆଶ୍ବସ୍ତି ମିଳିବ ନାହିଁ। ସେମାନଙ୍କ ମାସିକିଆ କିସ୍ତି ବା ଇଏମ୍‌ଆଇ କମିବନି। କିନ୍ତୁ ମିଆଦୀ ଜମା (ଏଫ୍‌ଡି) ଉପରେ ଭଲ ସୁଧ ମିଳିବ। ତେବେ ବଜାରରେ ଦେଖାଦେଇଥିବା ନଗଦ ରାଶିର ଅଭାବକୁ ଦୂର କରିବା ଲାଗି ନଗଦ ଜମା ଅନୁପାତ (ସିଆର୍‌ଆର୍‌)କୁ ୪ ପ୍ରତିଶତକୁ ହ୍ରାସ କରାଯାଇଛି। ତାହାର ପ୍ରଭାବରେ ବ୍ୟାଙ୍କଗୁଡ଼ିକ ହାତରେ ୧.୧୬ ଲକ୍ଷ କୋଟି ଟଙ୍କା ପହଞ୍ଚିବ। ସେହି ଟଙ୍କାକୁ ସେମାନେ ଦେଶର ବିକାଶ ପ୍ରକ୍ରିୟାକୁ ତ୍ବରାନ୍ବିତ କରିବାରେ ଉପଯୋଗ କରିପାରିବେ। ଏଥି ସହିତ ୟୁପିଆଇ ଜରିଆରେ ପ୍ରାକ୍ ମଞ୍ଜୁର ଋଣ ପ୍ରଦାନ କରିବା ଲାଗି ସ୍ମଲ ଫାଇନାନ୍ସ ବ୍ୟାଙ୍କଗୁଡ଼ିକୁ ଅନୁମତି ପ୍ରଦାନ କରାଯାଇଛି।

ସୁଧରେ ହାତ ମାରିଲେନି
ସିଆର୍‌ଆର୍‌ କମିଲା
ମୁଦ୍ରାସ୍ଫୀତି ବଢ଼ିବ, ଅଭିବୃଦ୍ଧି କମିବ
କାର୍ଯ୍ୟକାଳ ବୃଦ୍ଧି ସମ୍ପର୍କରେ କିଛି କହିଲେନି

ଡଲାର ତୁଳନାରେ ଦିନକୁ ଦିନ ଦୁର୍ବଳ ହୋଇପଡ଼ୁଥିବା ଟଙ୍କାକୁ ଆହୁରି ସବଳ କରିବା ଲାଗି ଶକ୍ତିକାନ୍ତ ପଦକ୍ଷେପ ନେଇଛନ୍ତି। ଦେଶକୁ ଯେଭଳି ଅଧିକ ବିଦେଶୀ ମୁଦ୍ରା ଆସିବ ସେଥିପାଇଁ ପ୍ରବାସୀଙ୍କ ଲାଗି ବୈଦେଶିକ ମୁଦ୍ରା ଜମା ଉପରେ ସୁଧ ହାରକୁ ବୃଦ୍ଧି କରାଯାଇଛି। ତେ‌ବେ ଏହି ସୁବିଧା କେବଳ ଆସନ୍ତା ବର୍ଷ ମାର୍ଚ୍ଚ ପର୍ଯ୍ୟନ୍ତ ଉପଲବ୍ଧ ହେବ। ଅଧିକ ବିଦେଶୀ ମୁଦ୍ରା ଆସିଲେ ଡଲାର ତୁଳନାରେ ୮୫ ଟଙ୍କା ସ୍ତର ଆଡ଼କୁ ଖସିଯାଉଥିବା ଟଙ୍କା ପୁଣି ସବଳ ହୋଇପାରିବ ବୋଲି ଆଶା କରାଯାଉଛି। ଦରଦାମ୍‌ ବିରୋଧ ଲଢ଼େଇରେ ପଛଘୁଞ୍ଚା ଦେବାର କୌଣସି ଯୋଜନା ନ ଥିବା ଆଭିମୁଖ୍ୟକୁ ଶକ୍ତିକାନ୍ତ ସ୍ପଷ୍ଟ କରିଛନ୍ତି। ଆର୍ଥିକ ବର୍ଷ ସାରା ଦରଦାମ୍‌ ଚିନ୍ତା ଲାଗି ରହିବ ବୋଲି ସେ ସଙ୍କେତ ଦେଇଛନ୍ତି। ଖୁଚୁରା ମୁଦ୍ରାସ୍ଫୀତି ହାର ୪ ପ୍ରତିଶତରେ ରହିବ ବୋଲି ପୂର୍ବରୁ ଯେଉଁ ପୂର୍ବାନୁମାନ କରାଯାଇଥିଲା ତାହାକୁ ବଢ଼ାଇ ୪.୮ ପ୍ରତିଶତ କରାଯାଇଛି। ସେହିପରି, ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧିର ପୂର୍ବାନୁମାନକୁ ମଧ୍ୟ ରିଜର୍ଭ ବ୍ୟାଙ୍କ ବଦଳାଇଛି। ପୂର୍ବରୁ ୭.୨ ପ୍ରତିଶତ ହାରରେ ଦେଶର ବିକାଶ ହେବ ବୋଲି କହିଥିବା ରିଜର୍ଭ ବ୍ୟାଙ୍କ ନିଜ ମତ ବଦଳାଇ ତାହା ୬.୮ ପ୍ରତିଶତକୁ ଖସିଆସିବ ବୋଲି କହିଛି। ମୁଦ୍ରାନୀତି ସମୀକ୍ଷା ବିଷୟରେ ଜଣାଇବା ବେଳେ ଶକ୍ତିକାନ୍ତଙ୍କୁ ତାଙ୍କ କାର୍ଯ୍ୟକାଳ ବଢ଼ିବ ନାହିଁ ପ୍ରଶ୍ନ କରାଯାଇଥିଲା। ତାହାର ଉତ୍ତରରେ ସେ କିଛି କହିନଥିଲେ। ଖାଲି ଏତିକି କହିଥିଲେ ଯେ ମୁଁ ଆପଣମାନଙ୍କୁ କୌଣସି ଶିରୋନାମା ଦେବାକୁ ଚାହୁନାହିଁ।

ଏଥର ମୁଦ୍ରାନୀତିକୁ ନେଇ ହୋଇଥିବା ମାନସମନ୍ଥନରେ କମିଟିର ସଦସ୍ୟମାନଙ୍କ ବିଭାଜିତ ମତ ଦେଖିବାକୁ ମିଳିଥିଲା। ଛଅ ଜଣିଆ କମିଟିରୁ ଚାରି ଜଣ ସଦସ୍ୟ ସୁଧ ଅପରିବର୍ତ୍ତିତ ରଖିବା ଉପରେ ମତ ଦେଇଥିଲେ। ସେମାନେ ହେଉଛନ୍ତି ଶକ୍ତିକାନ୍ତ, ସୌଗତ ଭଟ୍ଟାଚାର୍ଯ୍ୟ, ଡକ୍ଟର ରାଜୀବ ରଞ୍ଜନ ଓ ଡକ୍ଟର ମାଇକେଲ୍ ଦେବବ୍ରତ ପାତ୍ର। ଏହି ନିଷ୍ପତ୍ତିରେ ଦୁଇ ସଦସ୍ୟ ଡକ୍ଟର ନାଗେଶ କୁମାର ଓ ପ୍ରଫେସର ରାମ ସିଂହ ସହମତ ହୋଇନଥିଲେ। ସୁଧରେ ୦.୨୫ ପ୍ରତିଶତ ହ୍ରାସ କରିବାକୁ ସେମାନେ ଚାହୁଥିଲେ। କିନ୍ତୁ ସଂଖ୍ୟା ଗରିଷ୍ଠତା ନଥିବାରୁ ସେମାନଙ୍କ ପ୍ରସ୍ତାବ କାର୍ଯ୍ୟକାରୀ ହୋଇପାରିନଥିଲା।

ମ୍ୟୁଲ ଖାତା ଖୋଜିବ ଏଆଇ
ଡିଜିଟାଲ୍ ଠକେଇର ଏକ ପ୍ରମୁଖ ମାଧ୍ୟମ ପାଲଟିଥିବା ମ୍ୟୁଲ ଖାତାଗୁଡ଼ିକୁ ଖୋଜି ବାହାର କରିବା ଲାଗି ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ଶକ୍ତିକୁ ବ୍ୟବହାର କରିବା ଲାଗି ରିଜର୍ଭ ବ୍ୟାଙ୍କ ନିଷ୍ପତ୍ତି ନେଇଛି। ମ୍ୟୁଲ ଖାତା ହେଉଛି ସେହି ଖାତା ‌ଯାହାକୁ ଠିକ୍ କାଗଜପତ୍ର ଦେଇ ଖୋଲାଯାଇଥାଏ, କିନ୍ତୁ ସେଥିରେ ବେଆଇନ ଉପାୟରେ ଉପାର୍ଜନ ହେଉଥିବା ଅର୍ଥର କାରବାର ହୋଇଥାଏ। ପ୍ରତି ବଦଳରେ ମ୍ୟୁଲ ଖାତା ଖୋଲିଥିବା ଲୋକଙ୍କୁ କମିସନ ମିଳିଥାଏ। ସେଭଳି ଖାତାକୁ ଖୋଜିବା ଲାଗି ଏଆଇ ଓ ମେସିନ ଲର୍ଣ୍ଣିଂର ଶକ୍ତି ଥିବା ସମାଧାନ ‘ମ୍ୟୁଲହଣ୍ଟର ଡଟ୍‌ ଏଆଇ’ର ପରୀକ୍ଷଣ ଆରମ୍ଭ କରାଯାଇଛି। ଆର୍ଥିକ କ୍ଷେତ୍ରରେ ଏଆଇର ନୈତିକ ଓ ଦାୟିତ୍ବପୂର୍ଣ୍ଣ ବ୍ୟବହାର ଲାଗି ଏକ କମିଟି ଗଠନ କରିବାକୁ ନିଷ୍ପତ୍ତି ହୋଇଛି।
ପଡ୍‌କାଷ୍ଟ ଆରମ୍ଭ କରିବ ରିଜର୍ଭ ବ୍ୟାଙ୍କ
ସୂଚନା ପ୍ରଦାନ ବ୍ୟବସ୍ଥାକୁ ଆହୁରି ଦୃଢ଼ ଓ ବ୍ୟାପକ କରିବା ଲାଗି ପଡ୍‌କାଷ୍ଟ ଆରମ୍ଭ କରିବାକୁ ରିଜର୍ଭ ବ୍ୟାଙ୍କ ନିଷ୍ପତ୍ତି ନେଇଛି। ଗୁରୁତ୍ବପୂର୍ଣ୍ଣ ନିଷ୍ପତ୍ତି ସହିତ ବିଭିନ୍ନ ପ୍ରକାର ସଚେତନତା ବାର୍ତ୍ତାକୁ ଏହା ଜରିଆରେ ପ୍ରଦାନ କରାଯିବ। ଫଳରେ ଅଧିକରୁ ଅଧିକ ଲୋକଙ୍କ ପାଖରେ ତାହା ପହଞ୍ଚିପାରିବ ବୋଲି ରିଜର୍ଭ ବ୍ୟାଙ୍କ ଆଶା କରୁଛି।
ଚାଷୀଙ୍କୁ ବିନା ଗ୍ୟାରେଣ୍ଟିରେ ୨ ଲକ୍ଷ ଋଣ
ଚାଷୀମାନେ ବିନା ଗ୍ୟାରେଣ୍ଟିରେ ୨ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ନେଇପାରିବେ। ପୂର୍ବରୁ ଉକ୍ତ ସୀମା ୧ ଲକ୍ଷ ୬୦ ହଜାର ଟଙ୍କା ରହିଥିଲା। ଦେଶରେ ବର୍ଦ୍ଧିତ ମୁଦ୍ରାସ୍ଫୀତି ଏବଂ ଚାଷ ଖର୍ଚ୍ଚ ବୃଦ୍ଧିକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି। ଏହି ନିଷ୍ପତ୍ତି ଦ୍ବାରା ‌କ୍ଷୁଦ୍ର ଏବଂ ନାମମାତ୍ର ଚାଷୀମାନେ ଉପକୃତ ହେ‌ବେ। ରିଜର୍ଭ ବ୍ୟାଙ୍କ ଶୀଘ୍ର ଏ ନେଇ ଏକ ନିର୍ଦ୍ଦେଶନାମା ଜାରି କରିବ।

ସୌଜନ୍ୟ-ସମ୍ୱାଦ