ଶାରୋନ ହତ୍ୟା ମାମଲା ପ୍ରେମିକା ଗ୍ରୀଷ୍ମାଙ୍କୁ ଫାଶୀ ଦଣ୍ଡାଦେଶ ଶୁଣାଇଲେ କେରଳ କୋର୍ଟ

ତିରୁଅନନ୍ତପୁରମ୍: ତିରୁଅନନ୍ତପୁରମ୍‌ର ଅତିରିକ୍ତ ଜିଲ୍ଲା ସେସନ୍ସ କୋର୍ଟ ୨୦୨୨ରେ ୨୩ ବର୍ଷୀୟ ଶାରୋନ ରାଜ ହତ୍ୟା ମାମଲାରେ ଅଭିଯୁକ୍ତ ପ୍ରେମିକା ଗ୍ରୀଷ୍ମାଙ୍କୁ ମୃତ୍ୟୁଦଣ୍ଡାଦେଶ ଶୁଣାଇଛନ୍ତି। ଶୁକ୍ରବାର ୨୪ ବର୍ଷୀୟା ଗ୍ରୀଷ୍ମାଙ୍କୁ ହତ୍ୟା ମାମଲାରେ ଦୋଷୀ ସାବ୍ୟସ୍ତ କରିଥିବା ଅଦାଲତ ଆଜି ଦଣ୍ଡାଦେଶ ଶୁଣାଇଛନ୍ତି। ସହଯୋଗୀ ଭୂମିକା ଓ ପ୍ରମାଣ ନଷ୍ଟ କରିବା ଅଭିଯୋଗରେ ତାଙ୍କ ମାମୁ ନିର୍ମଳ କୁମାରଙ୍କୁ ୩ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରାଯାଇଛି। ତେବେ ତାଙ୍କ ମା’ ସିନ୍ଧୁଙ୍କୁ କୋର୍ଟ ଦୋଷମୁକ୍ତ କରିଛନ୍ତି।

ନେୟାତିଙ୍କରା ଅତିରିକ୍ତ ସେସନ୍ସ କୋର୍ଟ ଏହା ଏକ ବିରଳତମ ମାମଲା, ତେଣୁ ଗ୍ରୀଷ୍ମାଙ୍କ ବୟସକୁ ବିଚାରକୁ ନିଆଯାଇ ପାରିବ ନାହିଁ ବୋଲି ଦର୍ଶାଇ ମୃତ୍ୟୁଦଣ୍ଡାଦେଶ ଦେଇଛନ୍ତି। ପୂର୍ବରୁ ପ୍ରତିପକ୍ଷ ନିଜ ଯୁକ୍ତିରେ ଦର୍ଶାଇଥିଲେ ଯେ ସେ ଜଣେ ଯୁବତୀ, ଯାହାର ଶିକ୍ଷାଗତ ରେକର୍ଡ ଆଶାଜନକ ଥିଲା ଏବଂ ସେ ସଂସ୍କାର ପାଇଁ ସୁଯୋଗ ପାଇବାକୁ ଯୋଗ୍ୟ। ୨୦୨୨ ମସିହା ଅକ୍ଟୋବର ୨୫ ତାରିଖରେ ଆଭ୍ୟନ୍ତରୀଣ ଅଙ୍ଗ ବିଫଳ ହେବା ପରେ ତିରୁଅନନ୍ତପୁରମ୍ ଉପକଣ୍ଠ ପାରାସଲାରେ ରହୁଥିବା ଶାରୋନ ରାଜଙ୍କର ମୃତ୍ୟୁ ହୋଇଥିଲା। ତଦନ୍ତ ପରେ ତାଙ୍କୁ ବିଷ ଦିଆଯାଇଥିବା ଜଣାପଡ଼ିଥିଲା। ଗ୍ରୀଷ୍ମାଙ୍କ ପ୍ରେମିକ ଶାରୋନ ତାଙ୍କ ସହ ସମ୍ପର୍କ ଶେଷ କରିବାକୁ ମନା କରିବା ପରେ ଗ୍ରୀଷ୍ମା ତାଙ୍କୁ ଆୟୁର୍ବେଦୀୟ ପାନୀୟରେ ବିଷ ମିଶାଇ ପିଇବାକୁ ଦେଇଥିଲେ। ଗ୍ରୀଷ୍ମାଙ୍କ ପିତାମାତା ତାଙ୍କୁ ଅନ୍ୟତ୍ର ବିବାହ ଦେବାକୁ ଠିକ୍ କରିଥିବାରୁ ସେ ଶାରୋନଙ୍କଠାରୁ ମୁକ୍ତି ପାଇବା ପାଇଁ ଏପରି କରିଥିଲେ।

ସୌଜନ୍ୟ-ସମ୍ୱାଦ