ଶିମିଳିପାଳରେ ବାଘ ଗଣନା ଆରମ୍ଭ: ୮ ଦଳରେ ସାମିଲ ୮୫ କର୍ମଚାରୀ, ୨୦୨୬ରେ ଆସିବ ଗଣନା ରିପୋର୍ଟ

ବାରିପଦା: ଆଜିଠାରୁ ସର୍ବଭାରତୀୟ ସ୍ତରରେ ବାଘ ଗଣନା ଆରମ୍ଭ ହୋଇଥିବା ବେଳେ ଶିମିଳିପାଳରେ ମଧ୍ୟ ଏହି ପ୍ରକ୍ରିୟା ଆରମ୍ଭ ହୋଇଛି। ବନ ବିଭାଗ ପକ୍ଷରୁ ଏଥିପାଇଁ ୮ଟି ଦଳରେ ୮୫ ଜଣ କର୍ମଚାରୀଙ୍କୁ ନିୟୋଜିତ କରାଯାଇଛି। ସେମାନେ ଜଙ୍ଗଲରେ ବାଘର ପାଦଚିହ୍ନ, ଆମ୍ପୁଡ଼ା ଚିହ୍ନ ଓ ମଳମୂତ୍ରର ନମୁନାରୁ ବାଘ ଗଣତି କରିବେ। ଏଥିସହ ଶିମିଳିପାଳରେ ଲାଗିଥିବା ୩୦୦ରୁ ଅଧିକ ଟ୍ରାପ୍‌ କ୍ୟାମେରା ଓ ଏଆଇ କ୍ୟାମେରାର ମଧ୍ୟ ଉପଯୋଗ ହେବ। ଏହି ପ୍ରକ୍ରିୟା ବିଭିନ୍ନ ପର୍ଯ୍ୟାୟ ଦେଇ ବର୍ଷତମାମ ଚାଲିବ। ଏହା ପରେ ଏନ୍‌ଟିସିଏକୁ ରିପୋର୍ଟ ଦିଆଯିବ ଏବଂ ୨୦୨୬ରେ ଗଣନା ରିପୋର୍ଟ ପ୍ରକାଶ ପାଇବ ବୋଲି ଶିମିଳିପାଳ ଟାଇଗର ରିଜର୍ଭ (ଏସ୍‌ଟିଆର୍‌) କର୍ତ୍ତୃପକ୍ଷ ସୂଚନା ଦେଇଛନ୍ତି। ପ୍ରତି ୪ ବର୍ଷରେ ଜାତୀୟ ବାଘ ଗଣନା ରିପୋର୍ଟ ପ୍ରକାଶ ପାଇଥାଏ। ଗତଥର ରିପୋର୍ଟ ଅନୁଯାୟୀ; ଶିମିଳିପାଳରେ ଏବେ ୨୪ଟି ବୟସ୍କ ମହାବଳ ଥିବାବେଳେ ୮ଟି ଶାବକ ରହିଛନ୍ତି। ଏହି ସଂଖ୍ୟାରେ ବୃଦ୍ଧି ଘଟିଛି ନା ବାଘବଂଶ ହ୍ରାସ ପାଉଛି, ତାହା ଗଣନା ରିପୋର୍ଟ ଆସିଲେ ଜଣାପଡ଼ିବ। ତେବେ ଅଭୟାରଣ୍ୟର ‌କୋର୍‌ ଏରିଆରେ ଲାଗିଥିବା କ୍ୟାମେରା ଚିତ୍ରକୁ ଗ୍ରହଣ କଲେ ବାଘସଂଖ୍ୟା ବୃଦ୍ଧି ପାଇଛି ବୋଲି ଏସ୍‌ଟିଆର୍‌ କର୍ତ୍ତୃପକ୍ଷ ଜୋର୍‌ ଦେଉଛନ୍ତି।

୮ ଦଳରେ ସାମିଲ ୮୫ କର୍ମଚାରୀ
୨୦୨୬ରେ ଆସିବ ଗଣନା ରିପୋର୍ଟ
‘ଜୀନତ୍‌’ର ଭବିଷ୍ୟତକୁ ନେଇ ଅନିଶ୍ଚିତତା
ଶିମିଳିପାଳକୁ ନିଜର କରି ପାରିଲାନି ‘ଯମୁନା’

ତେବେ ବାଘ ଗଣନା ଆରମ୍ଭ ହୋଇଥିବା ବେଳେ ଗତବର୍ଷ ମହାରାଷ୍ଟ୍ରରୁ ଶିମିଳିପାଳକୁ ଅଣାଯାଇଥିବା ଦୁଇ ବାଘୁଣୀ; ଜୀନତ୍‌ ଓ ଯମୁନାର ଭବିଷ୍ୟତକୁ ନେଇ କିନ୍ତୁ ପୂର୍ବଭଳି ଅନିଶ୍ଚିତତା ଲାଗିରହିଛି। ଯେଉଁ ଲକ୍ଷ୍ୟ ନେଇ ୨ ବାଘୁଣୀଙ୍କୁ ଏଠାକୁ ଅଣାଯାଇଥିଲା ତାହା ଏଯାଏଁ କାଣିଚାଏ ବି ସଫଳ ହୋଇନି। ଶିମିଳିପାଳର ମହାବଳ ବାଘଙ୍କ ଦେହର ରଙ୍ଗ ଦିନକୁ ଦିନ କଳା ପଡ଼ୁଛି। ତେଣୁ ଏହି ଅନୁବଂଶୀୟ ବିବିଧତା ଓ ଗୁଣବତ୍ତାରେ ଉନ୍ନତି ଆଣିବା ସହ ଲିଙ୍ଗଗତ ଅସଙ୍ଗତିକୁ ଦୂର କରିବା ପାଇଁ ଗତବର୍ଷ ଆସିଥିଲେ ଯମୁନା ଓ ଜୀନତ୍‌। ଆସିବା ପରଠୁ ଯମୁନା ଶିମଳିପାଳ ଜଙ୍ଗଲରେ କମ୍‌, କେନ୍ଦୁଝରର ହଦଗଡ଼ ଓ ବାଲେଶ୍ବରର କୁଲଡ଼ିହା ଅଭୟାରଣ୍ୟରେ ଅଧିକ ସମୟ ରହୁଛି। ଏପଟେ ଶିମଳିପାଳରୁ ଖସିଯାଇ ଝାଡ଼ଖଣ୍ଡ ଓ ପଶ୍ଚିମବଙ୍ଗର ବିଭିନ୍ନ ଜଙ୍ଗଲରେ ୨୧ ଦିନ ବୁଲିବା ପରେ ୨୦୨୪ ଡିସେମ୍ବର ୨୯ରେ ଧରାପଡ଼ିଥିବା ବାଘୁଣୀ ଜୀନତ୍‌କୁ ଶିମିଳିପାଳର ଜେନାବିଲଠାରେ ଏନ୍‌କ୍ଲୋଜର୍‌ରେ ରଖାଯାଇଛି। ଯେଉଁ ବୟସରେ ଜୀନତ୍‌ ଜଙ୍ଗଲରେ ବୁଲିବା ସହ ବଂଶବୃଦ୍ଧି କରିବା କଥା ସେହି ସମୟରେ ୩ ମାସ ହେଲା ସେ ଏକପ୍ରକାର ବନ୍ଦୀ ଜୀବନ ବିତାଉଛି। କେବେ ତାକୁ ମୁକ୍ତ ଜଙ୍ଗଲରେ ଛଡ଼ାଯିବ, ସେ କଥା ଖୋଦ୍‌ ଏସ୍‌ଟିଆର୍‌ କର୍ତ୍ତୃପକ୍ଷ ବି ଜାଣନ୍ତିନି।

ଏ ସଂପର୍କରେ ଆର୍‌ସିସିଏଫ ପ୍ରକାଶ ଚାନ୍ଦ ଗୋଗିନାନୀ କହିଛନ୍ତି, ଏବେ ବର୍ଦ୍ଧିତ ଖୁଆଡ଼ରେ ରହିଥିବା ଜୀନତ୍‌ର ଆଚରଣ ଉପରେ ତୀକ୍ଷ୍ଣ ନଜର ରଖାଯାଇଛି। ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣର ନିର୍ଦ୍ଦେଶ ଆସିବା ପରେ ଭବିଷ୍ୟତ କାର୍ଯ୍ୟପନ୍ଥା ସ୍ଥିର କରାଯିବ। ସେହିପରି ବାଘୁଣୀ ଯମୁନା ଏବେ ହଦଗଡ଼ ଓ କୁଳଡ଼ିହା ଅଭୟାରଣ୍ୟରେ ମଧ୍ୟରେ ଯାଆସ କରୁଛି। ଶିମିଳିପାଳ ପରିବର୍ତ୍ତେ ସେହି ଅଞ୍ଚଳକୁ ସେ ନିଜ ଅଞ୍ଚଳ ଭାବେ ବାଛି ସାରିଥିବା ଆମେ ଅନୁମାନ କରୁଛୁ। ତେବେ ଯମୁନା ପାଇଁ ଚିନ୍ତା କରିବାର ବିଶେଷ କାରଣ ନାହିଁ।

ସୌଜନ୍ୟ-ସମ୍ୱାଦ