ନୂଆଦିଲ୍ଲୀ: ମା’କ୍ଷୀର ମିଳୁନଥିବା ଶିଶୁଙ୍କ ପାଇଁ ଭାରତର ପୂର୍ବତନ ବ୍ୟାଡମିଣ୍ଟନ ଷ୍ଟାର୍ ଜ୍ୱାଲା ଗୁଟ୍ଟା ଯାହା କରିଛନ୍ତି, ତାହା ଦୁନିଆ ପାଇଁ ପ୍ରେରଣା । ଜ୍ୱାଲା ଗୁଟ୍ଟା (Jwala Gutta) ନିଜର ଏହି ମହତ କାର୍ଯ୍ୟ ପାଇଁ ଚର୍ଚ୍ଚାକୁ ଆସିଛନ୍ତି । ସେ ମା’ ହେବାର ପ୍ରଥମ ବର୍ଷରେ ହାଇଦ୍ରାବାଦ ଏବଂ ଚେନ୍ନାଇର ବିଭିନ୍ନ ସରକାରୀ ହସ୍ପିଟାଲକୁ ପ୍ରାୟ ୬୦ ଲିଟର ମା’ କ୍ଷୀର (Breast Milk)ଦାନ କରିଛନ୍ତି । ଏନେଇ ସୋସିଆଲ ମିଡିଆ ପ୍ଲାଟଫର୍ମ X (ପୂର୍ବରୁ ଟ୍ୱିଟର) ରେ ଏକ ଭାବପ୍ରବଣ ପୋଷ୍ଟ ଶେୟାର କରି ନିଜର ଅନୁଭୂତି ବର୍ଣ୍ଣନା କରିଛନ୍ତି।

ଜ୍ୱାଲା ଗୁଟ୍ଟାଙ୍କ ପୋଷ୍ଟ

ଜ୍ୱାଲା ଲେଖିଛନ୍ତି ଯେ, ‘ମାତ୍ର ୧୦୦ ମିଲିଲିଟର ଦାନ କରାଯାଇଥିବା କ୍ଷୀର ଜଣେ ୧ କେଜି ଓଜନର କୁନି ଶିଶୁକୁ ଅନେକ ଦିନ ପର୍ଯ୍ୟନ୍ତ ବଞ୍ଚାଇ ରଖିପାରିବ । ଏହି ଦାନ NICU (ନବଜାତ ଶିଶୁ ସେବା କେନ୍ଦ୍ର) ରେ ଥିବା ଅନେକ ଶିଶୁଙ୍କୁ ସାହାଯ୍ୟ କରିପାରିବ। ଅନେକ ସମୟରେ ଚିକିତ୍ସାଧୀନ ଜଟିଳତା ଯୋଗୁଁ NICU ରେ ଥିବା ଶିଶୁମାନେ ନିଜ ମା’ଙ୍କ କ୍ଷୀର ପାଇପାରନ୍ତି ନାହିଁ। ଏଭଳି ପରିସ୍ଥିତିରେ ‘ଡୋନର୍ ମିଲ୍କ’ (ଦାନ କରାଯାଇଥିବା କ୍ଷୀର) ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ । ଏହି କ୍ଷୀର ଶିଶୁମାନଙ୍କୁ ସେମାନଙ୍କର ପ୍ରଥମ କିଛି ଦିନ ମଧ୍ୟରେ ଆବଶ୍ୟକ ପୋଷକ ତତ୍ତ୍ୱ ଏବଂ ରୋଗ ପ୍ରତିରୋଧକ ଶକ୍ତି (Immunity) ପ୍ରଦାନ କରିଥାଏ। ବ୍ରେଷ୍ଟ ମିଲ୍କ ଡୋନେସନ୍ ସମ୍ପୂର୍ଣ୍ଣ ସୁରକ୍ଷିତ ଏବଂ ଏହାକୁ ସଠିକ ଯାଞ୍ଚ ପରେ ହିଁ ଡାକ୍ତରଖାନାରେ ଗ୍ରହଣ କରାଯାଇଥାଏ ।’

ସେ ଆହୁରି ଲେଖିଛନ୍ତି, ‘ଏହା ମା’ମାନଙ୍କ ପାଇଁ ଏକ ସେତୁ ଭାବରେ କାର୍ଯ୍ୟ କରେ । ଯେଉଁମାନଙ୍କର ଚାପ, ଅସୁସ୍ଥତା, କୁପୋଷଣ କିମ୍ବା ଅକାଳ ଜନ୍ମ ହେତୁ କ୍ଷୀର ବିଳମ୍ବରେ ହୁଏ । ଦାତାଙ୍କ କ୍ଷୀର ପାନ କରିବା ପରେ ଅପରିପକ୍ବ ଶିଶୁଙ୍କ ଅନ୍ତନଳୀରେ ଥିବା ସମସ୍ୟା ଦୂର ହୋଇପାରେ ।’ ଜ୍ୱାଲା ଗୁଟ୍ଟା ଅନ୍ୟମାନଙ୍କୁ ସ୍ଥାନୀୟ ସରକାରୀ କର୍ତ୍ତୃପକ୍ଷ ଏବଂ ହସ୍ପିଟାଲଗୁଡ଼ିକ ସହିତ ଯୋଗାଯୋଗ କରି ମା’ କ୍ଷୀର ଦାନ କାର୍ଯ୍ୟକ୍ରମରେ କିପରି ଯୋଗଦାନ ଦେଇପାରିବେ ତାହା ଜାଣିବାକୁ ଅନୁରୋଧ କରିଛନ୍ତି।

ବ୍ରେଷ୍ଟ ମିଲ୍କ ଦାନର ଗୁରୁତ୍ୱ (Human Milk Banking)

ଅପରିପକ୍ୱ ଶିଶୁଙ୍କ ପାଇଁ ବରଦାନ । ସମୟ ପୂର୍ବରୁ ଜନ୍ମ ହୋଇଥିବା (Premature) ଶିଶୁଙ୍କ ପାଇଁ ଏହା ଅମୃତ ସମାନ। ମା’ କ୍ଷୀରରେ ଥିବା ଆଣ୍ଟିବଡି ଶିଶୁଙ୍କୁ ଅନ୍ତନଳୀ ସଂକ୍ରମଣ ଭଳି ମାରାତ୍ମକ ରୋଗରୁ ବଞ୍ଚାଇଥାଏ। ଜ୍ୱାଲା ଗୁଟ୍ଟାଙ୍କ ଭଳି ଜଣେ ଜଣାଶୁଣା ବ୍ୟକ୍ତିତ୍ୱ ଏହି ବିଷୟରେ ସୂଚନା ଦେବା ଦ୍ୱାରା ସମାଜରେ Milk Donationକୁ ନେଇ ଥିବା ଦ୍ୱନ୍ଦ୍ୱ ଦୂର ହେବ ଏବଂ ଅନ୍ୟ ମା’ମାନେ ମଧ୍ୟ ଏଥିପାଇଁ ଉତ୍ସାହିତ ହେବେ।

ସୌଜନ୍ୟ Prameya News7