ସବୁଜ ମୋହରୁ ମୁକୁଳିବାକୁ ଚାହୁଁଛନ୍ତି କି ସସ୍ମିତ ? ଓ୍ୱାକଫ୍ ବିଲକୁ ସମର୍ଥନ ପଛରେ ରହିଛି କି ସ୍ବାର୍ଥ ?

ନୂଆଦିଲ୍ଲୀ: ରାଜ୍ୟ ରାଜନୀତି ହେଉ କି ଜାତୀୟ ରାଜନୀତି, ବିଜେଡି ସାଂସଦ ସସ୍ମିତ ପାତ୍ର ଜଣେ ଜଣାଶୁଣା ଚେହେରା । ସଂସଦରେ ନିଜ ବଳିଷ୍ଠ ଯୁକ୍ତି ରଖି ସେ ଅନେକ ଥର ଚର୍ଚ୍ଚାରେ ରହିଥିବା ବେଳେ ଜାତୀୟ ଗଣମାଧ୍ୟମରେ ସସ୍ମିତ ନିଜର ପ୍ରତିକ୍ରିୟା ଅନେକ ସମୟରେ ଦେଇ ଚର୍ଚ୍ଚାରେ ରହୁଥିବା ଦେଖିବାକୁ ମିଳେ । ସବୁବେଳେ ବିଜେଡି ସ୍ବର, ବିଜେଡି ସୁପ୍ରିମୋଙ୍କ ନୀତି ଆଦର୍ଶର ଟାଏଁ ଟାଏଁ କଥା କହି ବାରି ହୋଇ ପଡୁଥାନ୍ତି ସସ୍ମିତ । କେବେ ଶଙ୍ଖ ଭବନରେ ଲୁଙ୍ଗି ପିନ୍ଧି ପ୍ରେସମିଟ୍ କରି ଚର୍ଚ୍ଚାରେ ରହିଥାନ୍ତି ତ କେବେ ବିଜେପି ଉପରେ ସଙ୍ଗୀନ୍ ଅଭିଯୋଗ ଆଣି ମିଡିଆର ହେଡଲାଇନ ପାଲଟନ୍ତି । ସବୁବେଳେ ବିଜେପି ବିରୋଧରେ ଆକ୍ରମଣାତ୍ମ ମୁଦ୍ରାରେ ସସ୍ମିତଙ୍କୁ ଦେଖିବାକୁ ମିଳୁଥିବା ବେଳେ ଗତକାଲି କିନ୍ତୁ ତାଙ୍କୁ ଟିକେ ନରମ ମୁଦ୍ରାରେ ଦେଖିବାକୁ ମିଳିଛି ।

ବିଜେପିକୁ ଆକ୍ରମଣ ନୁହେଁ କି ବିରୋଧ ବି ନୁହେଁ ବରଂ ବିଜେପିକୁ ସମର୍ଥନ ଦେଇଥିବା ଦେଖିବାକୁ ମିଳିଛି । ସସ୍ମିତଙ୍କୁ ଯେଉଁମାନେ ପୂର୍ବରୁ ଦେଖିଛନ୍ତି ଏବେ ତାଙ୍କ କ୍ଷେତ୍ରରେ ଏ ପରିବର୍ତ୍ତନ ଦେଖି ସାଧାରଣରେ ପ୍ରଶ୍ନ ଉଠୁଛି, ହଠାତ୍ କାହିଁକି ଏ ସମର୍ଥନ ? ସମର୍ଥନ ପଛରେ ନାହିଁ ତ ସ୍ବାର୍ଥ ? ଭାଙ୍ଗୁଛି କି ସସ୍ମିତଙ୍କ ସବୁଜ ମୋହ ? ସବୁଜ ଶିବିର ଆଡୁ ଗେରୁଆ ଦଳକୁ ଯିବାକୁ ଶିଡ଼ି ବାନ୍ଧୁଛନ୍ତି କି ସସ୍ମିତ ? ନା ବିଲକୁ ସମର୍ଥନ କରି ବିଜେପି ଆଡକୁ ଢଳୁଥିବା ପରୋକ୍ଷରେ ଇସାରା କରୁଛନ୍ତି ? ସସ୍ମିତଙ୍କ ଏ ସଙ୍କେତ ପଛର କାରଣ ଏବେ ରାଜନୀତିର ପଣ୍ଡିତମାନଙ୍କୁ ଭବିଷ୍ୟତର ଆକଳନ କରିବାକୁ ବାଧ୍ୟ କରିଛି ।

ତେବେ ଓଡିଶାରେ ଯେତେବେଳେ ଦୀର୍ଘ ୨୪ ବର୍ଷ ପରେ ବିଜେଡି ବିରୋଧୀ ଦଳ ଆସନରେ ବସିଛି, ଆଉ ଶାସନରେ ବିଜେପି ରହିଛି । ସେତେବେଳେ ଚର୍ଚ୍ଚା ହେଉଥିଲା ମୋଦୀଙ୍କ ଓ୍ୱାକଫ୍ ବିଲକୁ ବିରୋଧ କରିପାରେ ବିଜେଡି । ବିଲକୁ ବି ବିରୋଧ କରିଥିଲେ ରାଜ୍ୟସଭା ସାଂସଦ ମୁନ୍ନା ଖାନ୍ । ଆଉ ରାଜ୍ୟସଭାରେ କହିଥିଲେ, ଏହି ବିଲକୁ ବିଜେଡି ତରଫରୁ ବିରୋଧ କରୁଛି।

ହେଲେ ତାଙ୍କରି ଦଳର ଆଉ ଜଣେ ସାଂସଦ ବିଲକୁ ସମର୍ଥନ ଦେବା ସମସ୍ତଙ୍କୁ ଦ୍ବନ୍ଦ୍ବରେ ପକାଇଥିବା ବେଳେ ଦଳରେ କିଛି ଠିକଠାକ୍ ନଥିବା କୁହା ବି ଯାଉଛି । ଆଉ ଏହି ବିଲକୁ ସମର୍ଥନ ଦେଇ କିଛି ବଡ଼ ସୁରାକ୍ ଦେଇଛନ୍ତି ସସ୍ମିତ ପାତ୍ର । ଉଭୟ ଲୋକସଭା ସହିତ ରାଜ୍ୟସଭାରେ ଓ୍ୱାକଫ୍ ବିଲ୍ ପାସ୍ ହେଇସାରିଛି । ଆଉ ଏହି ବିଲ୍ ସପକ୍ଷରେ ଭୋଟ୍ ଦେଇଛନ୍ତି ସସ୍ମିତ ପାତ୍ର । ଏଏନଆଇକୁ ପ୍ରତିକ୍ରିୟା ଦେଇ ସସ୍ମିତ କହିଛନ୍ତି, ସେ ଓ୍ୱାକଫ୍ ବିଲ୍ ସମର୍ଥନରେ ସେ ଭୋଟ୍ ଦେଇଛନ୍ତି । ତେବେ ବିଜେଡି ସାଂସଦମାନେ ବିବେକ୍ ଅନୁସାରେ ଭୋଟ୍ ଦେବା ନେଇ କୁହାଯାଇଥିଲା । ତେଣୁ ସେ ଏହି ବିଲକୁ ସମର୍ଥନ କରିଛନ୍ତି । ତେବେ ଦଳର ଅନ୍ୟ ସାଂସଦମାନେ ବିଲକୁ ସମର୍ଥନ କରିଛନ୍ତି କି, ନାହିଁ, ତାହା ସେ କହିପାରିବେନି ବୋଲି ପ୍ରତିକ୍ରିୟା ରଖିଛନ୍ତି ସସ୍ମିତ ପାତ୍ର ।

ବିଜେଡିର ଏହି ନେତା ପ୍ରଥମେ ଓ୍ୱାକଫ୍ ବିଲକୁ ତାଙ୍କ ଦଳ ବିରୋଧ କରିବ ବୋଲି କହିଥିଲେ । ହେଲେ ତା ପରେ ପରେ କିନ୍ତୁ, ନିଜେ ଟୁଇଟ୍ କରି କହିଥିଲେ, ଓ୍ୱାକଫ ବିଲକୁ ନେଇ ବିଜେଡି ସାଂସଦଙ୍କ ଉପରେ କୌଣସି ହ୍ୱିପ୍ ଜାରି କରାଯାଇନି । ଯେଉଁ କାରଣରୁ ସାଂସଦମାନେ ନିଜର ବିବେକ ଅନୁସାରେ ଭୋଟ୍ ଦେବେ । ଆଉ ସତକୁ ସତ, ଏହି ବିଲ ସମର୍ଥନରେ ଭୋଟ୍ ଦେଇଛନ୍ତି ନିଜେ ସସ୍ମିତ ପାତ୍ର ।

ଗୋଟିଏ ପଟେ ବିଜେଡିର ଜଣେ ସାଂସଦ ବିଲକୁ ବିରୋଧ କରୁଥିବାବେଳେ, ଆଉ ଜଣେ ସାଂସଦ କିନ୍ତୁ ଏହାକୁ ସମର୍ଥନ କରିଛନ୍ତି । ଅନେକ ସମୟରେ ବିଜେଡି ଓ ବିଜେପି ଏକ୍ ବୋଲି ଚର୍ଚ୍ଚା ହୁଏ । କଂଗ୍ରେସ ବିଧାୟକ ତାରା ବାହିନୀପତି ମଧ୍ୟ ଗୁରୁବାର ଏନେଇ ସଙ୍ଗୀନ ଅଭିଯୋଗ ଆଣିଥିଲେ । ବିଧାନସଭାରେ ବିଶ୍ୱବିଦ୍ୟାଳୟ ସଂଶୋଧନ ବିଲ୍ ପାସ୍ କରିବାକୁ ବିଜେଡି, ବିଜେପିକୁ ସମର୍ଥନ କରିଥିଲା ବୋଲି ତାରା ଅଭିଯୋଗ କରିଥିଲେ । ଆଉ ତାର ଦିନକ ପରେ, ଓ୍ୱାକଫ୍ ବିଲକୁ ନେଇ ବିଜେଡି ସାଂସଦଙ୍କ ଏ ଦୁଇଟି ମତ, ଏହି ଚର୍ଚ୍ଚାକୁ ଖୋରାକ୍ ଯୋଗାଇଥିବା ବେଳେ ବିଜେଡିର ରାଜ୍ୟସଭା ସାଂସଦ ସସ୍ମିତ ପାତ୍ର ବିଜେପି ଆଡ଼କୁ ଢଳୁଥିବା ଏବଂ ମୋଦୀ ଶାହାଙ୍କ ବିଶ୍ୱସ୍ତ ହେବାକୁ ଚେଷ୍ଟା କରୁଥିବା ଚର୍ଚ୍ଚା ହେଉଛି । 

ସୌଜନ୍ୟ-ସମ୍ୱାଦ