ସିନେମାଟୋଗ୍ରାଫିରୁ ନିର୍ଦ୍ଦେଶନା

ସିନେମାଟୋଗ୍ରାଫରରୁ ନିର୍ଦ୍ଦେଶକ ବନିଥିବା ଏକେ ବୀର୍‌, ରାଜୁ ମିଶ୍ର, ଯୁଗଳ ଦେବତା, ପ୍ରଭାକର, ଶୁଭ୍ରାଂଶୁ ଦାସ ଓ ପ୍ରତାପ ରାଉତ ପ୍ରମୁଖଙ୍କ ତାଲିକାରେ ଏବେ ଆଉ ଏକ ନାମ ଯୋଡ଼ି ହୋଇଛି। ‘ଅଜାତଶତ୍ରୁ’ ଓ ‘ଅଭିସାର’ ଭଳି ଓଡ଼ିଆ ଚଳଚ୍ଚିତ୍ରରେ ଦୃଶ୍ୟଗ୍ରହଣ କରିଥିବା ପ୍ରସନ୍ନ କୁମାର ‘ଜହ୍ଲାଦ’ ଶୀର୍ଷକ ଛବିରେ ନିର୍ଦ୍ଦେଶନା ଦେଇ ଏହି କ୍ଲବ୍‌ରେ ସାମିଲ ହୋଇଛନ୍ତି। ୧୯୯୪ ମସିହାରେ ପ୍ରସନ୍ନ ଚଳଚ୍ଚିତ୍ର ଶିଳ୍ପରେ ପ୍ରବେଶ କରିଥିଲେ। କେତେକ ସିନେମାରେ ସହକାରୀ ଭାବେ କାମ କରିବା ପରେ ‘ଅଜାତଶତ୍ରୁ’ରେ ସିନେମାଟୋଗ୍ରାଫର୍ ବନିଥିଲେ। ତା’ପରେ ରଣଜିତ ମହାନ୍ତିଙ୍କ ନିର୍ଦ୍ଦେଶିତ ‘ଅଭିସାର’ରେ ବି ସିନେମାଟୋଗ୍ରାଫି କରିଥିଲେ। ଏହାଛଡ଼ା ଦେଢ଼ଶହରୁ ଅଧିକ ମ୍ୟୁଜିକ୍ ଭିଡିଓରେ ସେ ଚିତ୍ରୋତ୍ତୋଳନ କରିଛନ୍ତି।

ଓଲିଉଡ୍‌ରେ ଆଉ ଜଣେ ସିନେମାଟୋଗ୍ରାଫର୍ ଟର୍ଣ୍ଣଡ୍ ଡିରେକ୍ଟରଙ୍କ ଆବିର୍ଭାବ ଘଟିଛି। ସେ ହେଉଛନ୍ତି ପ୍ରସନ୍ନ କୁମାର। ତାଙ୍କ ନିର୍ଦ୍ଦେଶିତ ପ୍ରଥମ ଛବି ‘ଜହ୍ଲାଦ’ ଏବେ ମୁକ୍ତି ପ୍ରତୀକ୍ଷାରେ।

ଏହାଛଡ଼ା ସେ ‘ଷ୍ଟୁପିଡ୍ ଲଭ୍’, ‘ହେଲମେଟ୍ ଲଭ୍’, ‘ଲଭ୍ ଟିକିଏ ହଟ୍‌କେ’ ଓ ‘କାନ୍ଦୁଛି ହୃଦୟ’ ଆଦି ମ୍ୟୁଜିକ୍ ଭିଡିଓର ନିର୍ଦ୍ଦେଶନା ମଧ୍ୟ ଦେଇଛନ୍ତି। ଏଥିସହ କ୍ୟାମେରାମ୍ୟାନ୍ ଭାବେ ଇଟିଭି ଓ ମଞ୍ଜରୀ ଆଦି ଚ୍ୟାନେଲରେ ବି ପ୍ରସନ୍ନ କାମ କରିଛନ୍ତି। ଅଶୋକ କୁମାର ନାୟକଙ୍କ ପ୍ରଯୋଜନାରେ ଡକ୍ଟର ଜନ୍ମେଜୟ ପଣ୍ଡାଙ୍କ କାହାଣୀକୁ ଆଧାର କରି ନିର୍ମିତ ‘ଜହ୍ଲାଦ’ରେ ନିର୍ଦ୍ଦେଶକ ଭାବେ ପଦାର୍ପଣ କରିଛନ୍ତି ପ୍ରସନ୍ନ। ସେ ଏହାର ଚିତ୍ରନାଟ୍ୟ ରଚନା କରିବା ସହ ଚିତ୍ରୋତ୍ତୋଳନ ଦାୟିତ୍ବ ବି ତୁଲାଇଛନ୍ତି। ‘ଜହ୍ଲାଦ’ ପରେ ପ୍ରସନ୍ନ କୁମାର ବାପ-ପୁଅ ସଂପର୍କ ଉପରେ ଆଧାରିତ ଏକ ଓଡ଼ିଆ ସିନେମା ନିର୍ଦ୍ଦେଶନା ଦେବାକୁ ପ୍ରସ୍ତୁତ ହେଉଛନ୍ତି।

ସୌଜନ୍ୟ-ସମ୍ୱାଦ