ସିରିଆ ବିଦ୍ରୋହ ପରେ ଇସ୍ରାଏଲ୍-ଆମେରିକାର ମିଳିତ ଆକ୍ରମଣ

ୱାଶିଂଟନ: ମଧ୍ୟପ୍ରାଚ୍ୟର ଅବସ୍ଥା ଗୁରୁତର ହେବାରେ ଲାଗିଛି। ଇସ୍ରାଏଲ, ଆମେରିକା ଏବଂ ତୁର୍କୀ ଭଳି ଅନେକ ଦେଶର ସାମରିକ କାର୍ଯ୍ୟକଳାପ ଯୋଗୁ ସିରିଆରେ ତିକ୍ତତା ଆହୁରି ବୃଦ୍ଧି ପାଇଛି। ନିକଟରେ ଇସ୍ରାଏଲ୍ ବାୟୁସେନା ସିରିଆରେ ବଡ଼ ଧରଣର ଏୟାର ଷ୍ଟ୍ରାଇକ୍ କରିଥିଲା। ଏହି ଆକ୍ରମଣର ଉଦ୍ଦେଶ୍ୟ ହେଉଛି ସିରିଆ ସେନାର ଅସ୍ତ୍ରଶସ୍ତ୍ର ନଷ୍ଟ କରିବା।

ବଶର ଅଲ-ଅସଦ ସରକାରଙ୍କ ପତନ ପରେ ସିରିଆ ସେନାର ଅସ୍ତ୍ରଶସ୍ତ୍ର ଆତଙ୍କବାଦୀ ଗୋଷ୍ଠୀଙ୍କ ହାତରେ ପଡିବାର ଆଶଙ୍କା ରହିଛି। ଏହି ସମୟରେ ଆମେରିକା ଏବଂ ତୁର୍କୀ ମଧ୍ୟ ସେମାନଙ୍କର ଲକ୍ଷ୍ୟ ହାସଲ କରିବା ପାଇଁ ବାୟୁ ଏବଂ ସ୍ଥଳ ଆକ୍ରମଣ କରିଥିଲେ। ମାନବ ଅଧିକାର ପାଇଁ ସିରିଆର ପର୍ଯ୍ୟବେକ୍ଷକ ଅନୁଯାୟୀ ଇସ୍ରାଏଲ୍ ସିରିଆରେ ୧୦୦ରୁ ଅଧିକ ଏୟାର ଷ୍ଟ୍ରାଇକ୍ କରିଛି।

ଏହି ଆକ୍ରମଣରେ ବାରାଜ ବୈଜ୍ଞାନିକ ଅନୁସନ୍ଧାନ କେନ୍ଦ୍ର ସମେତ ଅନେକ ଉଚ୍ଚ ମୂଲ୍ୟର ଲକ୍ଷ୍ୟଭେଦ କରିବା ଲାଗି ଟାର୍ଗେଟ କରାଯାଇଥିଲା। ଇସ୍ରାଏଲର ବୈଦେଶିକ ମନ୍ତ୍ରୀ ଗିଦିୟନ୍ ସାର ନିଶ୍ଚିତ କରିଛନ୍ତି ଯେ, ରାସାୟନିକ ଅସ୍ତ୍ରଶସ୍ତ୍ର ଏବଂ ଦୂରଗାମୀ କ୍ଷେପଣାସ୍ତ୍ର ନଷ୍ଟ କରିବା ଏହି ଆକ୍ରମଣର ଉଦ୍ଦେଶ୍ୟ।

ଇସ୍ରାଏଲ ଭୟ କରୁଛି ଯେ, ଏହି ଅସ୍ତ୍ରଶସ୍ତ୍ରଗୁଡିକ ଆତଙ୍କବାଦୀ ଗୋଷ୍ଠୀଙ୍କ ହାତରେ ପଡିପାରେ। ଇସ୍ରାଏଲ୍ ନିକଟରେ ଗୋଲାନ୍ ହାଇଟ୍ସ ବଫର୍ ଜୋନ୍ ଦଖଲ କରିଛି।
ସେହିପରି ଆମେରିକା ମଧ୍ୟ ସିରିଆରେ ଆତଙ୍କବାଦୀ ସଂଗଠନ ଆଇଏସଆଇଏସର ଶିବିର ଉପରେ ୭୫ ଏୟାର ଷ୍ଟ୍ରାଇକ୍ କରିଛି ଏବଂ ଆମେରିକାର ସେଣ୍ଟ୍ରାଲ କମାଣ୍ଡ ଅନୁଯାୟୀ ଏହା ବି-୫୧ ବୋମା ବର୍ଷଣକାରୀ ଏବଂ ଏଫ-୧୫ଇ ଯୁଦ୍ଧ ବିମାନ ବ୍ୟବହାର କରି ଏହି ଆକ୍ରମଣ କରିଛି। ଏହି ଆକ୍ରମଣରେ ଅନେକ ଆଇଏସଆଇଏସ ସଦସ୍ୟ ଏବଂ ସେମାନଙ୍କର ବେସ୍ ନଷ୍ଟ ହୋଇଯାଇଛି।

ତେବେ ତୁର୍କୀ ଆମେରିକା ସମର୍ଥିତ କୁର୍ଦ୍ଦ ସୈନ୍ୟ ଉପରେ ଆକ୍ରମଣ କରିଥିଲା। ଏହି କାରଣରୁ ତୁର୍କୀ ସମର୍ଥିତ ସିରିଆ ଜାତୀୟ ସେନା ଉତ୍ତର ସିରିଆର ମାନବିଜ୍ ସହରର ନିୟନ୍ତ୍ରଣ କୁର୍ଦ୍ଦମାନଙ୍କଠାରୁ ଛଡାଇ ଆଣିଛି। ତୁର୍କୀ କୁର୍ଦ୍ଦ ବାହିନୀକୁ ଆତଙ୍କବାଦୀ ଘୋଷଣା କରିଛି ଏବଂ ସେମାନଙ୍କୁ ଦୁର୍ବଳ କରିବା ପାଇଁ ନିରନ୍ତର ଆକ୍ରମଣ କରୁଛି। ଏହି ଆକ୍ରମଣଗୁଡିକ ଅଞ୍ଚଳର ସ୍ଥିରତା ଉପରେ ଗଭୀର ପ୍ରଭାବ ପକାଇଥିବା ନେଇ ଅନ୍ତର୍ଜାତୀୟ କୂଟନୈତିକ ବିଶେଷଜ୍ଞ ମତପୋଷଣ କରିଛନ୍ତି।

ସୌଜନ୍ୟ-ସମ୍ୱାଦ