ସୁନୀତା ୱିଲିୟମ୍ସ ମହାକାଶରୁ କେବେ ଫେରିବେ? ନାସା ଦେଲା ନୂଆ ତାରିଖ

ୱାସିଂଟନ: ଅନ୍ତର୍ଜାତୀୟ ମହାକାଶ କେନ୍ଦ୍ର (ଆଇଏସ୍ଏସ୍)ରୁ ନାସା ମହାକାଶଚାରୀ ସୁନୀତା ୱିଲିୟମ୍ସଙ୍କ ପ୍ରତ୍ୟାବର୍ତ୍ତନ ପୁଣି ଥରେ ବିଳମ୍ବିତ ହୋଇଛି। ବୋଇଂର ତ୍ରୁଟିପୂର୍ଣ୍ଣ ଷ୍ଟାର୍‌ଲାଇନର୍‌ ମହାକାଶଯାନରେ ଯାତ୍ରା କରିବା ପରେ ୱିଲିୟମ୍ସ ସାଥୀ ମହାକାଶଚାରୀ ବୁଚ୍ ୱିଲ୍ମୋରଙ୍କ ସହ ୯ ମାସ ଧରି ମହାକାଶରେ ଅଟକି ରହିଛନ୍ତି। ପ୍ରଥମେ ମାତ୍ର ୮ ଦିନ ରହିବାକୁ ସ୍ଥିର ହୋଇଥିବା ବେଳେ ସୁରକ୍ଷା ଦୃଷ୍ଟିରୁ ସେମାନଙ୍କ ରହଣି ଅବଧି ବୃଦ୍ଧି କରାଯାଇଛି। ସ୍ପେସ୍ଏକ୍ସ ଏହାର କ୍ରୁ-୧୦ ମିସନ ଉତ୍‌କ୍ଷେପଣକୁ ବାତିଲ କରିବା ପରେ ସଦ୍ୟତମ ବିଳମ୍ବ ଘଟିଛି, ଯାହା ବର୍ତ୍ତମାନର କ୍ରୁଙ୍କୁ ବଦଳାଇବା ଏବଂ ୱିଲିୟମ୍ସ ଓ ୱିଲ୍ମୋରଙ୍କ ପ୍ରତ୍ୟାବର୍ତ୍ତନ ପାଇଁ ପଥ ପ୍ରଶସ୍ତ କରିବାର ଥିଲା।

ଫାଲକନ୍ ୯ ରକେଟ୍ ପାଇଁ ଗ୍ରାଉଣ୍ଡ ସପୋର୍ଟ କ୍ଲାମ୍ପ ଆର୍ମରେ ବୈଷୟିକ ତ୍ରୁଟି ଯୋଗୁଁ ଏହି ଉତ୍‌କ୍ଷେପଣକୁ ବାତିଲ କରାଯାଇଥିଲା। ନାସା ଘୋଷଣା କରିଛି ଯେ ପରବର୍ତ୍ତୀ ଉପଲବ୍ଧ ଉତ୍‌କ୍ଷେପଣ ସୁଯୋଗ ଶନିବାର ପୂର୍ବରୁ ନାହିଁ। ଯଦି କ୍ରୁ-୧୦ ମିସନ ଶନିବାର ସଫଳତାର ସହ ଉତ୍‌କ୍ଷେପଣ ହୁଏ, ତେବେ ୱିଲିୟମ୍ସ ଓ ୱିଲ୍ମୋର ମାର୍ଚ୍ଚ ୨୦ ପରେ ଆଇଏସ୍ଏସ୍ ଛାଡିବେ ବୋଲି ଆଶା କରାଯାଉଛି। କ୍ରୁ-୧୦ ଅଭିଯାନରେ ନାସାର ଆନ୍ ମ୍ୟାକ୍‌କ୍ଲେନ୍ ଓ ନିକୋଲ ଆୟର୍ସ, ଜାକ୍ସାର ତାକୁୟା ଓନିଶି ଏବଂ ରୋସ୍କୋସ୍ମୋସ୍‌ର କିରିଲ୍ ପେସ୍କୋଭଙ୍କ ସମେତ ନୂଆ ମହାକାଶଚାରୀ ଦଳ ଆଇଏସ୍ଏସ୍‌କୁ ଆସିବେ। ବିଳମ୍ବ ସତ୍ତ୍ୱେ ମହାକାଶଚାରୀଙ୍କ ସ୍ୱାସ୍ଥ୍ୟ ଓ ନିରାପତ୍ତାକୁ ପ୍ରାଥମିକତା ଦେବା ଉପରେ ନାସା ଗୁରୁତ୍ୱାରୋପ କରିଛି।

ସୌଜନ୍ୟ-ସମ୍ୱାଦ