ସ୍ୱୟଂଚାଳିତ ହେବ ନରାଜ ଓ ଯୋବ୍ରା ବ୍ୟାରେଜ୍‌: ବଟନ୍‌ ଚିପିଲେ ଗେଟ୍‌ ଉଠିବ, ୧୪୫ ହାଇଫ୍ରିକ୍ୟୁଏନ୍ସି କ୍ୟାମେରା ଜଗିବ

କଟକ, ୨୦/୧୨: ଏଣିକି ଆଉ  କର୍ମଚାରୀଙ୍କ ଦ୍ୱାରା ଚେନ୍‌ ଟାଣି ନରାଜ ଓ  ଯୋବ୍ରା ବ୍ୟାରେଜ୍‌ ଗେଟ୍‌ ଉଠାଯିବ ନାହିଁ ।  ବ୍ୟାରେଜ୍‌ ଗେଟ୍‌ ଏଣିକି ସ୍ୱୟଂଚାଳିତ  ଭାବେ କାମ କରିବ । କାର୍ଯ୍ୟାଳୟରେ  ବସି ସୁଇଚ୍‌ ବଟନ ଦ୍ୱାରା ଏହି ଦୁଇଟି  ବ୍ୟାରେଜ୍‌ ଗେଟ୍‌ ପରିଚାଳନା କରାଯିବ । କେତୋଟି ଗେଟ୍‌ କେତେ ଫୁଟ୍‌ ଲେଖାଏଁ  ଉଠିବ ତାହା କାର୍ଯ୍ୟାଳୟ କଣ୍ଟ୍ରୋଲ୍‌ ରୁମ୍‌ରୁ  କରାଯାଇପାରିବ । ଏଥିପାଇଁ ଉଭୟ  ବ୍ୟାରେଜ୍‌ରେ ୧୪୫ଟି ହାଇଫ୍ରିକ୍ୟୁଏନ୍ସି  କ୍ୟାମେରା ଲଗାଯାଉଛି । ଏହି କାମ  ଆସନ୍ତାବର୍ଷ ମାର୍ଚ୍ଚ ସୁଦ୍ଧା ଶେଷ ହେବ  ବୋଲି ଆଶା କରାଯାଉଛି । ସ୍ୱୟଂଚାଳିତ ଗେଟ୍‌ ବ୍ୟବସ୍ଥା ଦ୍ୱାରା  ବନ୍ୟା ପରିଚାଳନାରେ ମଧ୍ୟ ସହଜ ହେବ  ବୋଲି କୁହାଯାଇଛି । ଅନ୍ୟପକ୍ଷରେ  ମାଛ ମାରିବା ପାଇଁ ଅନେକ ସମୟରେ  ଯୋବ୍ରାର ଗେଟ୍‌କୁ ମନମୁଖି ଭାବେ କିଛି  ଦୁର୍ବୃତ୍ତ ଉଠାଇ ଦେଉଥିଲେ । କିନ୍ତୁ ସ୍ୱୟଂଚାଳିତ ବ୍ୟବସ୍ଥା କାର୍ଯ୍ୟକାରୀ ହେଲେ ଆଉ ମନମୁଖି ଭାବେ ଗେଟ୍‌ ଉଠାଯାଇପାରିବ ନାହିଁ ।  ବ୍ୟାରେଜ୍‌ ନିର୍ମାଣ ସମୟରୁ ଗେଟ୍‌ ଉଠାଇବା କାମ ବ୍ୟାରେଜ କର୍ମଚାରୀଙ୍କ ଦ୍ୱାରା କରାଯାଇ ଆସୁଅଛି ।

ଉପରମୁଣ୍ଡରେ ପାଣିର ପ୍ରବାହକୁ ଦେଖି ଏହି  ବ୍ୟାରେଜ୍‌ରେ କେତୋଟି ଗେଟ୍‌ ଉଠାଯିବ ତାହା  ସ୍ଥିର ହୋଇଥାଏ । ସେହି ଅନୁସାରେ ଦାୟିତ୍ୱରେ  ଥିବା କର୍ମଚାରୀମାନେ ବ୍ୟାରେଜ୍‌ ନିକଟକୁ ଯାଇ  ଚେନ୍‌ ଟାଣି ଗେଟ୍‌ ଉଠାଇ ଥାଆନ୍ତି । ଏହି ସମୟରେ  ଜଣେ କର୍ମଚାରୀ ବ୍ୟାରେଜ୍‌ ତଳକୁ ଖସି ଗେଟ୍‌  କେତେ ଫୁଟ୍‌ ଉଠିବ ତାହା ଜଣାଇ ଥାଆନ୍ତି । ସେହି  ଅନୁସାରେ ଉପରେ ଥିବା କର୍ମଚାରୀମାନେ ଚେନ୍‌  ଟାଣି ଆବଶ୍ୟକତା ଅନୁଯାୟୀ ଗେଟ୍‌ ଉପରକୁ  ଉଠାଇଥାନ୍ତି । ଏଥିପାଇଁ ଗେଟ୍‌ ଖୋଲିବାରେ ଅନେକ  ସମୟ ଲାଗି ଯାଇଥାଏ । ବିଶେଷକରି ବନ୍ୟା ଜଳ  ପ୍ରବାହିତ ହେଉଥିବାବେଳେ ଗେଟ୍‌ ଖୋଲିବା କାର୍ଯ୍ୟ  ସବୁଠାରୁ ଗୁରୁତ୍ୱପୂର୍ଣ୍ଣ ହୋଇଥାଏ । କାରଣ ପ୍ରତି  ଗେଟ୍‌କୁ ଗୋଟିଗୋଟି ଖୋଲାଗଲେ ଅତିକମ୍‌ରେ  ୪ରୁ ପାଞ୍ଚ ଘଣ୍ଟା ପର୍ଯ୍ୟନ୍ତ ସମୟ ଲାଗି ଯାଇଥାଏ ।

କିନ୍ତୁ ଏବେ ଏହି ବ୍ୟବସ୍ଥାରେ ସମ୍ପୂର୍ଣ୍ଣ  ପରିବର୍ତ୍ତନ ହେବାକୁ ଯାଉଛି । ବ୍ୟାରେଜ୍‌ ଗେଟ୍‌ ସବୁକୁ ମାନୁଆଲି ପରିଚାଳନା କରାଯିବ ନାହିଁ । ଏଥିପାଇଁ ଯୋବ୍ରା ବ୍ୟାରେଜ୍‌ରେ ଥିବା ୯୫ଟି  ଗେଟ୍‌ରେ ୯୫ଟି କ୍ୟାମେରା ଲଗାଯିବ । ସେହିପରି  ନରାଜ୍‌ର ବ୍ୟାରେଜ୍‌ରେ ଥିବା ୪୬ଟି ଗେଟ୍‌ରେ  ୪୬ଟି କ୍ୟାମେରା ଲଗାଯିବ । ଅର୍ଥାତ୍‌ ପ୍ରତି ଗେଟ୍‌ରେ ଗୋଟିଏ ଲେଖାଏଁ କ୍ୟାମେରା ଲାଗିବ । ବ୍ୟାରେଜ୍‌ର  ଉଭୟ ପାଶ୍ୱର୍ରେ ଆଉ ଦୁଇଟି ଲେଖାଏଁ ୪ଟି  କ୍ୟାମେରା ଲଗାଯିବ । ଏହିପରି ମୋଟ୍‌ ୧୪୫ଟି  କ୍ୟାମେରା ଗେଟ୍‌ର ତଳମୁଣ୍ଡରେ ଲାଗିବ । ଫଳରେ  ତଳୁ କ୍ୟାମେରା ଜରିଆରେ ଗେଟ୍‌ର ପରିଚାଳନା  କରାଯିବ ।

ଏହିସବୁ କ୍ୟାମେରା ବ୍ୟାରେଜ୍‌ କାର୍ଯ୍ୟାଳୟ ସହ ସଂଯୁକ୍ତ କରାଯିବ । ଉପରମୁଣ୍ଡରେ କେତେ ବନ୍ୟାଜଳ ଆସିଲା ଏବଂ ଏଥିରୁ କେତେଜଳ ଛଡ଼ାଯିବ, କେତେଜଳ କେନାଲ୍‌ ଜରିଆରେ ଛଡ଼ାଯିବ ତାହାର ହିସାବ କରାଯିବା ପରେ ଆବଶ୍ୟକତା ଆଧାରରେ ଗେଟ୍‌ ଖୋଲାଯାଇ ପରିଚାଳନା କରାଯିବ । ଏହି କାମ ସମୟ ସାପେକ୍ଷ ମଧ୍ୟ ହେବ । ବନ୍ୟା ଆସିବା ସମୟରେ ଯୋବ୍ରା ବ୍ୟାରେଜ୍‌ର ସମସ୍ତ ଗେଟ୍‌କୁ ମଧ୍ୟ ଖୋଲିବାକୁ ପଡ଼ିଥାଏ । ଏଥିପାଇଁ ପୂର୍ବରୁ ଯେଉଁ ଅଧିକ ସମୟର ଆବଶ୍ୟକତା ପଡ଼ୁଥିଲା ତାହା ଏହି ବ୍ୟବସ୍ଥା କାର୍ଯ୍ୟକାରୀ ହେବା ପରେ ହ୍ରାସ ଘଟିବ । ଗୋଟେ ଘଣ୍ଟା ମଧ୍ୟରେ ପ୍ରାୟ ସମସ୍ତ ଗେଟ୍‌ ଏକକାଳୀନ ଖୋଲାଯାଇ ପାରିବ ।

ସେହିପରି ନୂଆ ବ୍ୟବସ୍ଥା ଦ୍ୱାରା ମାଛ ମାରିବା ପାଇଁ ମନମୁଖି ଭାବେ ଗେଟ୍‌ ଉଠା ଉପରେ ମଧ୍ୟ ନିୟନ୍ତ୍ରଣ ଆସିପାରିବ । ଅନେକ  ସମୟରେ ମାଛ ମାରିବା ପାଇଁ କିଛି ବ୍ୟକ୍ତି ଯୋବ୍ରା ଗେଟ୍‌କୁ ମନମୁଖି ଭାବେ ଖୋଲି ଦେଇଥାନ୍ତି । ଏହାଦ୍ୱାରା ଉପର ମୁଣ୍ଡରୁ ପାଣି ହ୍ରାସ ଘଟିବା ସହ କେନାଲରେ ମଧ୍ୟ ପାଣି ଯିବା ବନ୍ଦ ହୋଇଯାଏ । ଏହିଭଳି କାର୍ଯ୍ୟ ଅନେକ ସମୟରେ ବ୍ୟାରେଜ୍‌ ଅଧିକାରୀଙ୍କ ପାଇଁ ସମସ୍ୟା ସୃଷ୍ଟି କରିଥାଏ। କିନ୍ତୁ ଏଣିକି ମନମୁଖି ଭାବେ କେହି ଗେଟ୍‌ ଖୋଲିପାରିବେ ନାହିଁ । ଯଦି ବି କେହି ଗେଟ୍‌ ପାଖକୁ ବି ଚେଷ୍ଟା ବି କରନ୍ତି କ୍ୟାମେରା ଦ୍ୱାରା  ଧରାପଡ଼ିଯିବେ । ଫଳରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରିବ ବୋଲି କଟକ ବ୍ୟାରେଜ୍‌ ଡିଭିଜନ୍‌ର ଜଣେ ବରିଷ୍ଠ  ଅଧିକାରୀ ସୂଚନା ଦେଇଛନ୍ତି ।

ସୌଜନ୍ୟ-ପ୍ରମେୟ