୨୦୨୫ରେ ଏଲପିଜି ଦର କମିବ!: ରୁଷିଆରେ ଦର କମି ଅଧା ହେଲା

ନୂଆଦିଲ୍ଲୀ: ୧ ଜାନୁୟାରୀ ୨୦୨୫ରେ, ସରକାରୀ ତୈଳ କମ୍ପାନିଗୁଡିକ ଏଲପିଜି ଦର ପୁଣି ସମୀକ୍ଷା କରିବେ ଏବଂ ନୂତନ ଦର ଘୋଷଣା କରିବେ। ଭାରତରେ ଏଲପିଜି ସିଲିଣ୍ଡରର ଦର ବୃଦ୍ଧି ସାଧାରଣ ଲୋକଙ୍କୁ ଅସୁବିଧାରେ ପକାଉଛି। କିନ୍ତୁ  ରୁଷିଆର ଘରୋଇ ବଜାରରେ ଏଲପିଜି (ଲିକ୍ୟୁଫାଏଡ୍ ପେଟ୍ରୋଲିୟମ ଗ୍ୟାସ)ର ଦର ଅଧାକୁ ହ୍ରାସ ପାଇଛି। ରୁଷିଆରେ, ରୋଷେଇ ଠାରୁ ଆରମ୍ଭ କରି ଗାଡି ମଟର ସହିତ ଘରକୁ ଗରମ କରିବା ଏବଂ ପେଟ୍ରୋକେମିକାଲ୍ ଉତ୍ପାଦନରେ ଏଲପିଜି ବ୍ୟବହୃତ ହୋଇଥାଏ।

ରଏଟର୍ସ ରିପୋର୍ଟ ଅନୁଯାୟୀ, ନଭେମ୍ବର ୨୦୨୪ ତୁଳନାରେ ରୁଷିଆରେ ଏଲପିଜି ଦର ଡିସେମ୍ବର ୨୦୨୪ରେ ଅଧାକୁ ଖସି ଆସିଛି। ନଭେମ୍ବର ଶେଷରେ  ୨୮,୦୦୦ ରୁବେଲରେ ଉପଲବ୍ଧ ଏଲପିଜିର ଦର ଡିସେମ୍ବରରେ ୧୪,୦୦୦ ରୁବେଲକୁ କମିଛି।  ଅର୍ଥାତ୍ ଡିସେମ୍ବର ୨୦ ତାରିଖରେ ଏହା ୧୪୦ ଡଲାରକୁ ଖସି ଆସିଛି। ଏହାର ଅର୍ଥ ହେଉଛି ଏଲପିଜି ଦର ୫୦ ପ୍ରତିଶତ ପ୍ରତ୍ୟକ୍ଷ ହ୍ରାସ ପାଇଛି।

ରୁଷିଆ ବହୁ ପରିମାଣରେ ଏଲପିଜି ୟୁରୋପୀୟ ଦେଶକୁ  ରପ୍ତାନି କରୁଥିଲା। କିନ୍ତୁ ୟୁରୋପୀୟ ଦେଶଗୁଡିକ ରୁଷିଆ ଉପରେ ଲାଗୁ ହୋଇଥିବା ଅର୍ଥନୈତିକ ପ୍ରତିବନ୍ଧକ ଯୋଗୁ ଆଉ ଏହାକୁ ନେଉ ନାହାନ୍ତି। ଫଳରେ ରୁଷିଆରୁ ଏଲପିଜି ରପ୍ତାନିରେ ଏକ ବଡ଼ ହ୍ରାସ ଘଟିଛି। ରୁଷିଆ ବିରୋଧରେ ୟୁରୋପୀୟ ସଂଘର ଆର୍ଥିକ ପ୍ରତିବନ୍ଧକ ୨୦ ଡିସେମ୍ବର ୨୦୨୪ରୁ ଲାଗୁ ହୋଇଛି। ରୁଷିଆର ଏଲପିଜିର ବୃହତ ଆମଦାନିକାରୀ ପୋଲାଣ୍ଡ ରୁଷିଆର ଏଲପିଜି ରପ୍ତାନି ଉପରେ ପ୍ରତିବନ୍ଧକ ଲଗାଇବାକୁ ପ୍ରସ୍ତାବ ଦେଇଥିଲା। ଏହି ପ୍ରତିବନ୍ଧକ ଯୋଗୁ ରୁଷର ଘରୋଇ ବଜାରରେ ଏଲପିଜି ଯୋଗାଣ ବୃଦ୍ଧି ପାଇଛି ଯେଉଁଥି ପାଇଁ ଦର ହ୍ରାସ ପାଇଛି ।

ସାମ୍ପ୍ରତିକ ସମୟରେ, ରୁଷିଆ ପକ୍ଷରୁ ଚୀନ୍, ମୋଙ୍ଗୋଲିଆ, ଆର୍ମେନିଆ, ଜର୍ଜିଆ, ଆଜେରବୈଜାନ ଭଳି ଦେଶକୁ ଏଲପିଜି ରପ୍ତାନି ବୃଦ୍ଧି କରିଛି। ରୁଷିଆରୁ ଏଲପିଜି ଆମଦାନି ବୃଦ୍ଧି କରିବାକୁ ଚୀନ୍ ଚିନ୍ତା କରୁଛି। ଏଭଳି ପରିସ୍ଥିତିରେ ଏବେ ବିଶେଷଜ୍ଞ ମାନେ ପ୍ରଶ୍ନ କରିଛନ୍ତି ଯେ, ଭାରତ ଯେପରି ଶସ୍ତା ଦରରେ ରୁଷିଆରୁ ଅଶୋଧିତ ତୈଳ ଆମଦାନୀ କରୁଛି ସେହିପରି ଏଲପିଜି ଆମଦାନି କରିବ କି?

ଫେବୃଆରୀ ୨୦୨୨ରେ ରୁଷିଆ ପକ୍ଷରୁ ୟୁକ୍ରେନ ଉପରେ ଆକ୍ରମଣ ପରେ ୟୁରୋପୀୟ ଦେଶମାନେ ରୁଷିଆର ଅଶୋଧିତ ତୈଳ ରପ୍ତାନି ଉପରେ ପ୍ରତିବନ୍ଧକ ଲଗାଇଥିଲେ। ଏହା ପରେ ଅଶୋଧିତ ତୈଳ  ଦର ବୃଦ୍ଧି ପରେ ଭାରତ ଶସ୍ତା ମୂଲ୍ୟରେ ରୁଷିଆରୁ ଅଶୋଧିତ ତୈଳ ଆମଦାନୀ କରିଥିଲା।  ଏହା ଦ୍ବାରା ଭାରତୀୟ ତୈଳ କମ୍ପାନିଗୁଡିକର ଆର୍ଥିକ ସ୍ଥିତିରେ ଉନ୍ନତି ହୋଇଥିଲା। କିନ୍ତୁ ସାଧାରଣ ଗ୍ରାହକ ଶସ୍ତା ଦରରେ ପେଟ୍ରୋଲ ଏବଂ ଡିଜେଲ ପାଇ ନାହାନ୍ତି।

ସୌଜନ୍ୟ-ସମ୍ୱାଦ