୩ ଲକ୍ଷରୁ ଉର୍ଦ୍ଧ୍ୱ ଟଙ୍କାର ବ୍ରାଉନ୍‌ ସୁଗାର ଜବତ, ଜଣେ ଗିରଫ

ଯାଜପୁର, ୩୦/୧୧: ଚାଲୁଣିଆ ସାହିରୁ ୩୫ ଗ୍ରାମ ବ୍ରାଉନ୍‌ ସୁଗାର ଜବତ କଲା ଅବକାରୀ ବିଭାଗ । ଏହି ଘଟଣାରେ ଜଣେ ଅଭିଯୁକ୍ତ ଗିରଫ ହୋଇଛି । ଗିରଫ ହୋଇଥିବା ଯୁବକ ଜଣକ ଟାଉନ ଅଞ୍ଚଳର ରଞ୍ଜନ କୁମାର ପାତ୍ର (୨୮) ବୋଲି ଜଣା ପଡ଼ିଛି । ଯାଜପୁର ଟାଉନ୍‌ ଅଞ୍ଚଳର ଚାଲୁଣିଆ ସାହିରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ଚାଲୁଣିଆ ସାହିରେ ବ୍ରାଉନ୍‌ ସୁଗାର କାରବାର ହେଉଥିବା ନେଇ ଏକ ବିଶେଷ ସୂତ୍ରରୁ ଖବର ପାଇଥିଲା ଅବକାରୀ ବିଭାଗ । ଖବର ପାଇ ଉକ୍ତ ସାହିରେ ଚଢାଉ କରିଥିଲା ଅବକାରୀ ବିଭାଗର ଏକ ଟିମ୍‌ । ଏହି ଚଢାଉରେ ୩୫ ଗ୍ରାମ୍‌ର ବ୍ରାଉନ୍‌ ସୁଗାର ଜବତ କରାଯାଇଛି । ଯାହାର ଆନୁମାନିକ ମୂଲ୍ୟ ୩ ଲକ୍ଷରୁ ଉର୍ଦ୍ଧ୍ୱ ହେବ ବୋଲି ସୂଚନା ମିଳିଛି । ଏହି ଘଟଣାରେ ସମ୍ପୃକ୍ତ ଥିବା ଯୁବକଙ୍କୁ ଅବକାରୀ ବିଭାଗ ଗିରଫ କରିଛି ।
ସୌଜନ୍ୟ-ପ୍ରମେୟ