ଏୟାର ଇଣ୍ଡିଆ କିଣିବ ୧୦୦ ବିମାନ: ଗତବର୍ଷ ମଗାଇଥିଲା ୪୭୦ ବିମାନ

ମୁମ୍ବାଇ: ଟାଟା ଗ୍ରୁପ୍ ଅଧୀନରେ ପରିଚାଳିତ ହେଉଥିବା ଏୟାରଲାଇନ୍ ଏୟାର ଇଣ୍ଡିଆ ଆ‌ଉ ୧୦୦ ବିମାନ କିଣିବା ଲାଗି ଏୟାରବସ୍‌କୁ ବରାଦ ଦେଇଛି। ଏହା ୧୦ଟି ଏ୩୫୦ ଓସାରିଆ ବିମାନ ଓ ୯୦ଟି ଅଣ ଓସାରିଆ ଏ୩୨୦ ବିମାନ କିଣିବ। ଗତବର୍ଷ କମ୍ପାନି ୪୭୦ଟି ବିମାନ କିଣିବା ଲାଗି ଉଭୟ ଏୟାରବସ୍‌ ଓ ବୋଇଂକୁ ବରାଦ ଦେଇଥିଲା। ମୋଟ ଉପରେ କମ୍ପାନି ୫୮୦ଟି ବିମାନ କିଣିବ। କମ୍ପାନି ଏୟାରବସ୍‌ରୁ ୩୪୪ଟି ଓ ବୋଇଂରୁ ୨୨୦ଟି ବିମାନ ମଗାଇଛି।

ଟାଟା ସନ୍ସର ଅଧ୍ୟକ୍ଷ ଏନ୍ ଚନ୍ଦ୍ରଶେଖରନ୍ କହିଛନ୍ତି ଯେ ଭାରତରେ ବିମାନ ଯାତ୍ରୀଙ୍କ ସଂଖ୍ୟା ବିଶ୍ବର ଅନ୍ୟ ପ୍ରାନ୍ତ ତୁଳନାରେ ଅଧିକ ବେଗରେ ବଢ଼ୁଛି। ଅଭିଳାଷୀ ଯୁବବର୍ଗ ସାରା ବିଶ୍ବରେ ପହଞ୍ଚିବାକୁ ଚାହୁଛନ୍ତି। ତେଣୁ ଏୟାର ଇଣ୍ଡିଆର ଫ୍ଲିଟ୍‌ ବଢ଼ାଇବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ଏୟାର ଇଣ୍ଡିଆକୁ ଏକ ବିଶ୍ବସ୍ତରୀୟ ଏୟାରଲାଇନ୍‌ରେ ପରିଣତ କରିବା ଲାଗି କମ୍ପାନି ଯେଉଁ ଲକ୍ଷ୍ୟ ରଖିଛି, ନୂଆ ୧୦୦ ବିମାନ ତାହାକୁ ଆହୁରି ଦୃଢ଼ କରିବ। ଏହା ଜରିଆରେ କମ୍ପାନି ଭାରତକୁ ବିଶ୍ବର ପ୍ରତିଟି କୋଣରେ ଯୋଡ଼ିପାରିବ ବୋଲି ଚନ୍ଦ୍ରଶେଖରନ୍ କହିଛନ୍ତି। ବିମାନଗୁଡ଼ିକର ରକ୍ଷଣାବେକ୍ଷଣ ଓ ମରାମତିକୁ ସଂଗଠିତ କରିବା ଲାଗି ଏୟାରବସ୍‌ ସହିତ ଉପକରଣ ଲାଗି ଚୁକ୍ତି ହୋଇଛି। ଏ୩୫୦ ବିମାନଗୁଡ଼ିକର ପ୍ରଦର୍ଶନରେ ତାହା ଉନ୍ନତି ଆଣିବ। ଉଭୟ ଇଞ୍ଜିନିୟରିଂ ଓ ଉପକରଣ ସେବା ସହିତ ଦିଲ୍ଲୀରେ ଏକ ଅନ୍-ସାଇଟ୍‌ ଷ୍ଟକ୍ ମଧ୍ୟ ରହିବ। ଏୟାର ଇଣ୍ଡିଆ ଅତିରିକ୍ତ ବିମାନ ବରାଦ ଦେଇ ଏୟାରବସ୍‌ ଉପରେ ଭରସା ପ୍ରକଟ କରିଥିବାରୁ ଏୟାରବସ୍‌ର ସିଇଓ ଗୁଇଲାଉମେ ଫୁଆରି ଖୁସି ବ୍ୟକ୍ତ କରିଛନ୍ତି।

ସୌଜନ୍ୟ-ସମ୍ୱାଦ