ସର୍ବାଧିକ ରୋଜଗାର କରିଥିବା ୧୦ ଫିଲ୍ମ

‘ଆର୍‌ଆର୍‌ଆର୍‌’ ଓ ‘ଜୱାନ’ ଚଳଚ୍ଚିତ୍ରର ବକ୍ସ ଅଫିସ୍‌ ବ୍ୟବସାୟ ଖୁବ୍‌ ଭଲ ଥିଲା । ତଥାପି ଉଭୟ ହିନ୍ଦୀ ଓ ଦକ୍ଷିଣ ଭାରତୀୟ ସିନେଶିଳ୍ପରେ ଏଭଳି କିଛି ଚଳଚ୍ଚିତ୍ର ଆସିଛି, ଯାହାର ବ୍ୟାବସାୟିକ ରେକର୍ଡ ଭାଙ୍ଗି ପାରିନି ଏହି ଦୁଇ ସିନେମା । ଆମେ ଏ ଆଲେଖ୍ୟରେ ଏଭଳି ୧୦ଟି ଚଳଚ୍ଚିତ୍ର ସମ୍ବନ୍ଧରେ ଆଲୋଚନା କରିବା, ଯେଉଁଗୁଡ଼ିକ ଆମ ଦେଶ ସମେତ ବିଦେଶରେ ମଧ୍ୟ ସର୍ବାଧିକ ରୋଜଗାର କରିଛନ୍ତି । ଉଭୟ ବଲିଉଡ ଓ ସାଉଥ୍‌ର ଚଳଚ୍ଚିତ୍ର ସ୍ଥାନ ପାଇଛନ୍ତି ଏ ତାଲିକାରେ ।

ଦଙ୍ଗଲ

ଏ ତାଲିକାର ପ୍ରଥମ ସ୍ଥାନରେ ଅଛି ଆମୀର ଖାନ ଅଭିନୀତ ‘ଦଙ୍ଗଲ’ । ଆଇଏମ୍‌ଡିବି ରିପୋର୍ଟ ଅନୁସାରେ, ୨୦୧୬ରେ ମୁକ୍ତିପ୍ରାପ୍ତ ଏ ଫିଲ୍ମ ଦେଶ ଓ ଦେଶ ବାହାରେ ୧୯୩୬.୮ କୋଟି ଟଙ୍କା ରୋଜଗାର କରିଥିଲା । ଏହାରି ଭିତରେ ୮ ବର୍ଷ ବିତି ସାରିଥିଲେ ହେଁ କୌଣସି ଫିଲ୍ମ ଏ ସଂଖ୍ୟାକୁ ଟପି ପାରି ନାହିଁ ।

ବାହୁବଳି – ଦ କନ୍‌କ୍ଲୁଜନ

ସବୁଠୁ ଅଧିକ ରୋଜଗାର କରିଥିବା ଫିଲ୍ମ ତାଲିକାରେ ଏସ୍‌ ଏସ୍‌ ରାଜମୌଲିଙ୍କ ନିର୍ଦ୍ଦେଶିତ ‘ବାହୁବଳି – ଦ କନ୍‌କ୍ଲୁଜନ’ର ସ୍ଥାନ ଦ୍ୱିତୀୟ । ପ୍ରଭାସ, ରାଣା ଦଗ୍‌ଗୁବତୀ ଓ ଅନୁଷ୍କା ସେଟ୍ଟୀ ଷ୍ଟାରର୍‌ ଏ ଫିଲ୍ମ ସମଗ୍ର ବିଶ୍ୱରେ ୧୭୪୨.୩ କୋଟି ଟଙ୍କା ବ୍ୟବସାୟ କରିଥିଲା ।

ଆର୍‌ଆର୍‌ଆର୍‌

ଏହା ମଧ୍ୟ ଏସ୍‌ଏସ୍‌ ରାଜମୌଲିଙ୍କ ନିର୍ଦ୍ଦେଶନାରେ ପ୍ରସ୍ତୁତ ହୋଇଥିଲା । ଜୁନିଅର ଏନ୍‌ଟିଆର୍‌, ରାମ ଶରଣ ଓ ଆଲିଆ ଭଟ୍ଟ ଏଥିରେ ଅଭିନୟ କରିଥିଲେ । ଫିଲ୍ମର ୱାର୍ଲ୍ଡ ୱାଇଡ୍‌ କଲେକ୍ସନ ଥିଲା ୧୨୫୦.୯ କୋଟି ଟଙ୍କା ।

କେଜିଏଫ୍‌ ଚାପ୍ଟର ୨

ତାଲିକାର ଚତୁର୍ଥ ସ୍ଥାନ ଗ୍ରହଣ କରିଛି ପ୍ରଶାନ୍ତ ନୀଲ୍‌ଙ୍କ ଫିଲ୍ମ ‘କେଜିଏଫ୍‌ ଚାପ୍ଟର ୨’ । ୟଶ ଓ ସଞ୍ଜୟ ଦତ୍ତଙ୍କ ଅଭିନୟରେ ସମୃଦ୍ଧ ଏ ଚଳଚ୍ଚିତ୍ର ପରଦାକୁ ଆସିଥିଲା ୨୦୨୨ରେ । ଏ ଫିଲ୍ମର ବିଶ୍ୱବ୍ୟାପୀ ବକ୍ସ ଅଫିସ୍‌ କଲେକ୍ସନ ଥିଲା ୧୧୭୬.୫ କୋଟି ଟଙ୍କା ।

ଜୱାନ

ଗତ ବର୍ଷ ପ୍ରେକ୍ଷାଳୟକୁ ଆସିଥିଲା ଶାହରୁଖ ଖାନଙ୍କ ‘ଜୱାନ’ । ସମଗ୍ର ବିଶ୍ୱରେ ଏ ଫିଲ୍ମର ବକ୍ସ ଅଫିସ୍‌ କଲେକ୍‌ସନ ଥିଲା ୧୧୫୭.୫ କୋଟି ଟଙ୍କା । ଦୀପିକା ପାଦୁକୋନ, ନୟନତାରା, ବିଜୟ ସେତୁପତି ଆଦି କଳାକାର ଏ ଫିଲ୍ମର ଅନ୍ୟାନ୍ୟ ଚରିତ୍ରରେ ନଜର ଆସିଥିଲେ ।

ପଠାନ୍‌

ଶାହରୁଖଙ୍କ ଅଭିନୀତ ‘ପଠାନ୍‌’ ମଧ୍ୟ ଏ ତାଲିକାରେ ସ୍ଥାନିତ ହୋଇଛି । ଏ ଫିଲ୍ମ ମଧ୍ୟ ରିଲିଜ ହୋଇଥିଲା ୨୦୨୩ରେ । ଏଥିରେ ଦୀପିକା ପାଦୁକୋନ୍‌ ମୁଖ୍ୟ ନାୟିକା ଚରିତ୍ରରେ ଅଭିନୟ କରିଥିଲେ । ‘ପଠାନ୍‌’ର ବିଶ୍ୱବ୍ୟାପୀ ରୋଜଗାର ଥିଲା ୧୦୪୨.୨ କୋଟି ଟଙ୍କା ।

କଲ୍‌କି ୨୮୯୮ ଏଡି

ଏ ବର୍ଷର ବହୁ ପ୍ରତୀକ୍ଷିତ ଚଳଚ୍ଚିତ୍ର ଥିଲା ‘କଲ୍‌କି ୨୮୯୮ ଏଡି’ । ରିଲିଜ ପରେ ଏ ଫିଲ୍ମ ରେକର୍ଡ ଭାଙ୍ଗିବା ଭଳି କଲେକ୍‌ସନ କରିଥିଲା । ପ୍ରଭାସ ଓ ଅମିତାଭ ବଚ୍ଚନ ଷ୍ଟାରର୍‌ ଏ ଫିଲ୍ମର ମୋଟ ରୋଜଗାର ଥିଲା ୧୦୧୯.୮ କୋଟି ଟଙ୍କା ।

ଆନିମଲ

ରଣବୀର କପୁରଙ୍କ ସିନେମା ‘ଆନିମଲ’ର ବିଶ୍ୱବ୍ୟାପୀ ବକ୍ସ ଅଫିସ୍‌ କଲେକ୍ସନ ୯୨୯.୧ କୋଟି ଟଙ୍କା । ସନ୍ଦୀପ ରେଡ୍ଡି ବଙ୍ଗା ନିର୍ଦ୍ଦେଶିତ ଏହି ଚଳଚ୍ଚିତ୍ରରେ ରଶ୍ମିକା ମନ୍ଦାନା, ବବି ଦେଓଲ, ତୃପ୍ତି ଡିମରି ପ୍ରମୁଖ ଦେଖିବାକୁ ମିଳିଥିଲେ ।

ବଜରଙ୍ଗୀ ଭାଇଜାନ

ତାଲିକାର ନବମ ସ୍ଥାନରେ ରହିଛି ସଲ୍‌ମାନ ଖାନ ଅଭିନୀତ ‘ବଜରଙ୍ଗୀ ଭାଇଜାନ’ । କବୀର ଖାନଙ୍କ ନିର୍ଦ୍ଦେଶନାରେ ନିର୍ମିତ ଏ ଚଳଚ୍ଚିତ୍ର ପ୍ରେକ୍ଷାଳୟକୁ ଆସିଥିଲା ୨୦୧୫ରେ । ଏ ଚଳଚ୍ଚିତ୍ରର ବିଶ୍ୱବ୍ୟାପୀ ବକ୍ସ ଅଫିସ୍‌ କଲେକ୍ସନ ଥିଲା ୮୭୭.୬ କୋଟି ଟଙ୍କା ।

ସ୍ତ୍ରୀ ୨

ରାଜକୁମାର ରାଓ ଓ ଶ୍ରଦ୍ଧା କପୁର ଅଭିନୀତ ‘ସ୍ତ୍ରୀ ୨’ ପରଦାକୁ ଆସିଥିଲା ଏ ବର୍ଷ । ଏହି ହରର୍‌ କମେଡି ଫିଲ୍ମର ବିଶ୍ୱବ୍ୟାପୀ କଲେକ୍‌ସନ ଥିଲା ୮୫୧.୮ କୋଟି ଟଙ୍କା ।

ସୌଜନ୍ୟ-ପ୍ରମେୟ