ଜଳାଶୟରେ ଦେଖିବାକୁ ମିଳୁନାହାଁନ୍ତି ପକ୍ଷୀ

ରାଇରଙ୍ଗପୁର (ତୁଷାର କାନ୍ତ ମହାନ୍ତ): ଶୀତଋତୁ ଆସିଲେ ବିଦେଶୀ ପକ୍ଷୀଙ୍କ ନୂଆ ଠିକଣା ହୁଏ ବିଭିନ୍ନ ଜଳାଶୟ। ହଜାର ହଜାର ମାଇଲ୍ ଦୂରରୁ ଉଡି ଆସୁଥିବା ବିଦେଶୀ ପକ୍ଷୀ ଏଠାକାର ଜଳବାୟୂ ଓ ପରିବେଶ ସହିତ ଖାପ ଖୁଆଇ ପ୍ରାୟ ୩/୪ ମାସ କଟାଇଥାନ୍ତି। କିଏ ଖାଦ୍ୟ ସନ୍ଧାନରେ ତ କିଏ ବଂଶ ବୃଦ୍ଧି କରିବାକୁ ଆସିଥାନ୍ତି ଏହି ଅଂଚଳକୁ। ତେବେ ଚଳିତ ବର୍ଷ ଶୀତଋତୁର ଅଧା ହେଲାଣି କିନ୍ତୁ ବିଦେଶୀ ପକ୍ଷୀଙ୍କୁ ଦେଖିବାକୁ ମିଳୁ ନାହିଁ।

ଏହି ଖବର ପଢ଼ନ୍ତୁ: କୁଲଡିହାମୁହାଁ ‘ଯମୁନା’

ଶୀତଋତୁରେ ବଣପାହାଡ ଘେରା ମୟୂରଭଂଜ ଜିଲ୍ଲାର ବିଭିନ୍ନ ପର୍ଯ୍ୟଟନସ୍ଥଳୀରେ ପର୍ଯ୍ୟଟକଙ୍କ ଭିଡ଼ ଜମିଥାଏ। ଜଳାଶୟଗୁଡ଼ିକରେ ମଧ୍ୟ ବିଦେଶୀ ପକ୍ଷୀଙ୍କ କୋଳାହଳ ଦେଖିବାକୁ ମିଳିଥାଏ। କିନ୍ତୁ ବର୍ତମାନ ଶୀତଋତୁର ଅଧା ହେବାକୁ ବସିଲାଣି କିନ୍ତୁ ବିଦେଶୀ ପକ୍ଷୀ ଜଳାଶୟରେ ଦେଖିବାକୁ ମିଳୁନାହାଁନ୍ତି। ବାମନଘାଟୀ ଉପଖଣ୍ଡର ଖଡ଼ଖାଇ ଡ୍ୟାମ୍, ବାଙ୍କବଳ ଡ୍ୟାମ୍, ନେସା ଡ୍ୟାମ୍, ରାଣୀବନ୍ଧ ଜଳାଶୟ ସମେତ ବିଭିନ୍ନ ଜଳାଶୟରେ ବିଭିନ୍ନ ପ୍ରଜାତିର ପକ୍ଷୀଙ୍କ ଆଗମନ ହୋଇଥାଏ। ଚଳିତ ବର୍ଷ ଜଳାଶୟ ଗୁଡିକରେ ପକ୍ଷୀ ଦେଖିବାକୁ ମିଳନାହାଁନ୍ତି। ଚଳିତ ବର୍ଷ ବିଦେଶୀ ପକ୍ଷୀଙ୍କ ଆଗମନ ହଇନଥିବାରୁ ଅଂଚଳବାସୀ ଓ ପକ୍ଷୀପ୍ରେମୀମାନେ ଦୁଃଖ ପ୍ରକାଶ କରିଛନ୍ତି।

କେଉଁ କାରଣରୁ ଜଳାଶୟକୁ ପକ୍ଷୀ ଆସୁ ନାହାଁନ୍ତି ତାହା ଜଣାପଡୁନାହିଁ। ଆସନ୍ତା ଜାନୁୟାରି ମାସରୁ ବନବିଭାଗ ପକ୍ଷରୁ ପକ୍ଷୀ ଗଣନା ଆରମ୍ଭ ହେବ ବୋଲି ସୂଚନା ମିଳିଛି।

୨୦୨୨ ମସିହାରେ ହୋଇଥିବା ପକ୍ଷୀ ଗଣନାରେ ରାଇରଙ୍ଗପୁର ବନଖଣ୍ଡରେ ମୋଟ ୧୯,୦୮୦ଟି ବିଦେଶୀ ପକ୍ଷୀ ଆସିଥିବା ବେଳେ ୨୦୨୩ ଜାନୁୟାରିରେ ହୋଇଥୀବା ପକ୍ଷୀ ଗଣନାରେ ରାଇରଙ୍ଗପୁର ରେଂଜର ରାଣିବନ୍ଧରେ ୩୫୫ ପକ୍ଷୀ, ପାତେପାଣି ଏମଆଇପିରେ ୧୪୯, ପଣ୍ଡିତ ରଘୁନାଥପୁର ପୋଖରୀରେ ୧୩୨, ଗୁହାଳଡାଙ୍ଗିରୀ ପୋଖରୀରେ ୪୯୩, ଟିକରପଡା ମେଘନା ପୋଖରୀରେ ୨୧୦୩, ମଦନଶିଳା ଏମାଇପିରେ ୧୧୩, ବାଦାମପାହାଡ ରେଂଜର ସୁଲେଇପାଟ ଡ୍ୟାମରେ ୧୦୮୧, ଆହାରବନ୍ଧ ପୋଖରୀରେ ୧୪୮, କେନ୍ଦୁପୋଖରୀ ପୋଖରୀରେ ୧୦୪, ମଣଦା ରେଂଜର ବାଙ୍କବଳ ଡ୍ୟାମରେ ୩୧୦୦, ବହଳଦା ରେଂଜର ପୋଖରିଆ ଡ୍ୟାମ ୯୬୬, ମରଣ୍ଡା ପୋଖରୀରେ ୬୬୦ଟି ସର୍ବମୋଟ୍ ୯୪୦୪ଟି ବିଭିନ୍ନ ପ୍ରଜାତିର ପକ୍ଷୀ ଗଣନା କରାଯାଇଥିଲା।

ସେହିପରି ୨୦୨୪ ମସିହାରେ ବିଭିନ୍ନ ଜଳାଶୟ ଓ ଡ୍ୟାମ୍‌ରେ ସର୍ବମୋଟ୍ ୭୨୭୩ଟି ବିଭିନ୍ନ ପ୍ରଜାତିର ପକ୍ଷୀ ଗଣନା କରାଯାଇଥିଲା ବୋଲି ବନବିଭାଗ ପକ୍ଷରୁ ସୂଚନା ମିଳିଛି। ତେବେ ବିଗତ ତିନି ବର୍ଷ ତୁଳନାରେ ଦେଖିବାକୁ ଗଲେ ପ୍ରତ୍ୟେକ ବର୍ଷ ପକ୍ଷୀଙ୍କ ଆଗମନ ସଂଖ୍ୟା କମିବାରେ ଲାଗିଛି।

ଏ ସମ୍ବନ୍ଧରେ ରାଇରଙ୍ଗପୁର ବନଖଣ୍ଡ ଅଧିକାରୀ ଶିବ ପ୍ରସାଦ ରଥଙ୍କ ସହିତ ଯୋଗାଯୋଗ କରିବାରୁ ଜଳବାୟୁ ପରିବର୍ତ୍ତନ ଓ ବିଦେଶୀ ପକ୍ଷୀମାନେ ଅସୁରକ୍ଷିତ ମଣୁଥିବା ସନ୍ଦେହ କରାଯାଉଛି। ଏହା ବ୍ୟତୀତ ଜଳାଶୟ ଗୁଡିକରେ ମାଛ ଧରୁଥିବା କେଉଟମାନଙ୍କ କବଳରୁ ରକ୍ଷା ପାଇଁ ପକ୍ଷୀ ଆସୁନାହାନ୍ତି। ଏଣୁ ପକ୍ଷୀଙ୍କ ଆଗମନ ସଂଖ୍ୟା କମିବାର ଲାଗିଛି ବୋଲି ମତ ରଖିଥିଲେ। ସେହିପରି ମୟୁରଭଞ୍ଜ ଜିଲ୍ଲାର ପ୍ରାକ୍ତନ ବନ୍ୟ ପ୍ରାଣୀ ତତ୍ତ୍ବାବଧାରକ ପ୍ରଦୀପ୍ତ କବି କହିଛନ୍ତି, ବିଦେଶୀ ପକ୍ଷୀମାନେ ନିଜକୁ ଯେଉଁଠି ସୁରକ୍ଷିତ ମନେ କରନ୍ତି ସେହି ସ୍ଥାନକୁ ଶୀତ ଦିନରେ ସେଠି ଯାଇଥାନ୍ତି। ବିଦେଶୀ ପକ୍ଷୀମାନେ ବଂଶ ବୃଦ୍ଧି ଓ ଖାଦ୍ୟ ଅନ୍ବେଷଣରେ ଯାଇଥାନ୍ତି। ତେବେ ଏହି ଉପଖଣ୍ଡର ପରିବେଶକୁ ସେମାନେ ଖାପ ଖୁଆଇ ଚଳି ପରୁନଥିବା ଓ ଶିକାରୀଙ୍କ କବଳରୁ ରକ୍ଷା ପାଇଁ ଆସୁନଥିବା ସନ୍ଦେହ କରାଯାଉଛି।

ସୌଜନ୍ୟ-ସମ୍ୱାଦ