ବାରାକ ଓବାମା ସେୟାର କଲେ ୨୦୨୪ର ପ୍ରିୟ ଚଳଚ୍ଚିତ୍ର ତାଲିକା, ‘ଅଲ୍ ଉଇ ଇମାଜିନ ଏଜ ଲାଇଟ’ ଦେଖିବାକୁ ଦେଲେ ପରାମର୍ଶ

ନୂଆଦିଲ୍ଲୀ,୨୧/୧୨:  ଚଳିତ ବର୍ଷ ବଲିଉଡ଼ ଓ ଓଲିଉଡ଼ରେ ଅନେକ ଫିଲ୍ମ ମୁକ୍ତିଲାଭ କରିଥିଲା । ଆଉ ଦର୍ଶକ ମଧ୍ୟ ଏହି ଫିଲ୍ମକୁ ବେଶ ପସନ୍ଦ କରିଥିଲେ । ତେବେ ୨୦୨୪ ସରିବାକୁ ମାତ୍ର ଆଉ କିଛିଟା ଦିନ ବାକି ଥିବା ବେଳେ  ଏହାରି ମଧ୍ୟରେ ନ ଆମେରିକାର ପୂର୍ବତନ ରାଷ୍ଟ୍ରପତି ତାଙ୍କର ପ୍ରିୟ ଚଳଚ୍ଚିତ୍ରର ତାଲିକା ସେୟାର କରିଛନ୍ତି । ଏହି ତାଲିକାରେ ଏକ ଭାରତୀୟ ଚଳଚ୍ଚିତ୍ରର ନାମ ମଧ୍ୟ ଅନ୍ତର୍ଭୁକ୍ତ ହୋଇଛି । ଯାହା ତାଙ୍କ ପ୍ରଥମ ପସନ୍ଦ ଅଟେ ।

ତେବେ ସୋସିଆଲ ମିଡିଆରେ ଓବାମାଙ୍କ ଦ୍ୱାରା ସେୟାର ହୋଇଥିବା ତାଲିକାରେ ଭାରତୀୟ ଚଳଚ୍ଚିତ୍ରର ନାମ ‘ଅଲ୍ ଉଇ ଇମାଜିନ ଏଜ ଲାଇଟ’ ଏକ ନମ୍ବରରେ ରହିଛି । ଏଥିରେ ଆହୁରି ଅନେକ ଫିଲ୍ମର ନାମ ମଧ୍ୟ ରହିଛି । କିନ୍ତୁ ଏହି ଭାରତୀୟ ଫିଲ୍ମ ତାଙ୍କ ପ୍ରଥମ ପସନ୍ଦ ବୋଲି ଜଣାପଡିଛି । ଏହି ପୋଷ୍ଟରେ ‘୨୦୨୪ର  ଓବାମାଙ୍କ ପ୍ରିୟ ଚଳଚ୍ଚିତ୍ର’ ଲେଖାଯାଇଥିବା ବେଳେ ଏହାର କ୍ୟାପସନରେ ସେ ଲେଖିଛନ୍ତି, ”ଏଠାରେ କିଛି ଚଳଚ୍ଚିତ୍ର ନା ଅଛି ଯାହାକୁ ମୁଁ ଆପଣଙ୍କୁ ଦେଖିବାକୁ ପରାମର୍ଶ ଦେଉଛି ।” ପ୍ରକାଶ ଥାଉକି ‘ଅଲ୍ ଉଇ ଇମାଜିନ ଏଜ ଲାଇଟ’ ଗତ ସେପ୍ଟେମ୍ବର ମାସରେ ମୁକ୍ତିଲାଭ କରିଥିଲା । ଏହି ଫିଲ୍ମରେ ୩ଜଣ ମହିଳାଙ୍କ କାହାଣୀ ଚିତ୍ରିତ ହୋଇଛି । ଯାହାର ନିର୍ଦ୍ଦେଶନା ଦେଇଛନ୍ତି ପାୟଲ କପାଡିଆ । ଏହି ଚଳଚ୍ଚିତ୍ର ହିନ୍ଦୀ, ମାଲାୟାଲମ୍ ଏବଂ ମରାଠୀ ଭାଷାରେ ଉପଲବ୍ଧ ଥିବା ବେଳେ ଏହି ଫିଲ୍ମରେ ଦିବ୍ୟା ପ୍ରଭାସ, କାନି କୁଶ୍ରୁତି ଏବଂ ଛାୟା କଦମଙ୍କ ପରି ତାରକାଙ୍କୁ ଦେଖିବାକୁ ମିଳିଛି । ସେହିପରି ଚଳିତ ବର୍ଷ ମେ ମାସରେ ହୋଇଥିବା କାନ୍ସ ଫିଲ୍ମ ଫେଷ୍ଟିଭାଲରେ ଏହା ପ୍ରଦର୍ଶିତ ହୋଇଥିବା ବେଳେ ଏହା ବେଶ ପ୍ରଶଂସା ଲାଭ କରିଥିଲା।

ସୌଜନ୍ୟ-ପ୍ରମେୟ