ଖାଇବର ପଖ୍‌ତୁନ୍‌ଖ୍ବାରେ ବିସ୍ଫୋରଣ: ପୁଲିସକର୍ମୀଙ୍କ ସମେତ ୨ମୃତ, ୧୮ ଆହତ

ଖାଇବର ପଖତୁନ୍‌ଖ୍ବା: ପାକିସ୍ତାନର  ଅଶାନ୍ତ ଖାଇବର ପଖ୍‌ତୁନ୍‌ଖ୍ବା ଆଜି ଏକାଧିକ ବିସ୍ଫୋରଣରେ ଥରିଉଠିଛି। ଏଥିରେ ଜଣେ ପୁଲିସକର୍ମୀଙ୍କ ସମେତ ଦୁଇଜଣଙ୍କ ମୃତ୍ୟୁଘଟିଛି।  ଏହି ଘଟଣାରେ ୯ ସୁରକ୍ଷାକର୍ମୀଙ୍କ ସମେତ ୧୮ ଜଣ ଆହତ ହୋଇଛନ୍ତି। ସୂଚନାନୁସାରେ, ଦକ୍ଷିଣ ୱଜିରସ୍ଥାନ  ବୀରମଲ ତହସିଲ ଅନ୍ତର୍ଗତ ଆଜମ ୱାରସକ ବଜାର ଓ ବାନୁରେ ଦୁଇଟି ବିସ୍ଫୋରଣ ଘଟିଥିଲା। ‌ସେହିଭଳି ଡେରା ଇସ୍‌ମାଇଲ୍‌ ଖାନ୍‌ ତନଖି ଫାଟକରେ ଆଉ ଏକ ବିସ୍ଫୋରଣ ଘଟିଛି। ବିସ୍ଫୋରଣ ରିମୋଟ୍‌ କଣ୍ଟ୍ରୋଲ୍‌ ଦ୍ବାରା ଘଟାଯାଇଛି । ବିସ୍ଫୋରଣ ନିମନ୍ତେ ମୋଟରସାଇକଲ୍‌ ବ୍ୟବହାର କରାଯାଇଛି ବୋଲି ଦକ୍ଷିଣ ୱଜିରସ୍ତାନର ଜିଲ୍ଲା ପୁଲିସ ଅଧିକାରୀ ଅସିଫ୍‌ ବହାଦେର କହିଛନ୍ତି। ଆହତଙ୍କୁ ୱନାର ଜିଲ୍ଲା ମୁଖ୍ୟାଳୟ ଚିକିତ୍ସାଳୟରେ ଭର୍ତ୍ତି କରାଯାଇଛି।

ୱାନାର ଡାଜା ଘୁନ୍‌ଡାଇରେ ସେନାର ଗାଡ଼ିକୁ ଲକ୍ଷ୍ୟ କରି ବିସ୍ଫୋରଣ ଘଟାଯାଇଛି। ଏଥିରେ ୩ ସେନା କର୍ମଚାରୀ ଆହତ ହୋଇଛନ୍ତି। ସେମାନଙ୍କୁ ସ୍କାଉଟ୍‌ ହସ୍‌ପିଟାଲ୍‌ରେ ଭର୍ତ୍ତି କରାଯାଇଛି। ଡେରା ଇସ୍‌ମାଇଲ୍‌ ଖାନ୍‌ର ଏକ ତନଖି ଫାଟକ ଉପରକୁ ମଧ୍ୟ ଆତଙ୍କବାଦୀମାନେ ଅତର୍କିତ ଭାବେ ଗୁଳି ଚଳାଇଥିଲେ। ଏଥିରେ ପୁଲିସ କନ୍‌ଷ୍ଟେବଳ ଅସମାତ୍‌ ଉଲ୍ଲା ଓ କଷ୍ଟମ୍‌ କର୍ମଚାରୀ ଅବ୍‌ଦୁଲ୍ଲାଙ୍କ ମୃତ୍ୟୁ ଘଟିଥିବା ବେଳେ ଅନ୍ୟଜଣେ କନ୍‌ଷ୍ଟେବଳ ପରଭେଜ୍‌ ଆହତ ହୋଇଛନ୍ତି। ସେହିଭଳି  ବାନୁରେ ଆଇଇଡି ବିସ୍ଫୋରଣରେ ୬ ପୁଲିସ କର୍ମୀ ଆହତ ହୋଇଛନ୍ତି। ମାମାଶଖେଲ୍‌ ଅଞ୍ଚଳର ‌ସୁରଙ୍ଗି ଆଡ୍ଡା ନିକଟସ୍ଥ ସଡ଼କ ଦେଇ ଏକ ପାଟ୍ରୋଲିଂ ପାର୍ଟି ଯିବା ବେଳେ ଏହି ବିସ୍ଫୋରଣ ଘଟିଥିଲା।

ସୌଜନ୍ୟ-ସମ୍ୱାଦ