ଅଷ୍ଟ୍ରେଲିଆନ୍‌ ଓପନ୍‌: ପ୍ରିକ୍ବାର୍ଟରରେ ଜୋକୋଭିକ୍‌, ଭେରଭ୍‌

ମେଲ୍‌ବର୍ଣ୍ଣ: ୨୪ ଗ୍ରାଣ୍ଡ ସ୍ଲାମ୍‌ ବିଜେତା ସର୍ବିୟା ତାରକା ନୋଭାକ ଜୋକୋଭିକ୍‌, ବିଶ୍ବର ୨ ନମ୍ବର ଆଲେକ୍‌ଜାଣ୍ଡର ଭେରଭ୍‌, ୪ ଗ୍ରାଣ୍ଡ ସ୍ଲାମ୍‌ ବିଜେତା କାର୍ଲୋସ ଅଲ୍‌କାରାଜ ଚଳିତ ଅଷ୍ଟ୍ରେଲିଆନ୍‌ ଓପନ୍‌ ଟେନିସ୍‌ ପ୍ରତିଯୋଗିତାର ପ୍ରିକ୍ବାର୍ଟରଫାଇନାଲ୍‌ରେ ପ୍ରବେଶ କରିଛନ୍ତି। ଶୁକ୍ରବାର ପୁରୁଷ ଏକକ ତୃତୀୟ ରାଉଣ୍ଡରେ ଏଠାରେ ୧୦ ଥରର ବିଜେତା ୩୭ ବର୍ଷୀୟ ଜୋକୋଭିକ୍‌ ୬-୧, ୬-୪, ୬-୪ ସେଟ୍‌ରେ ୨୬ ମାନ୍ୟତାପ୍ରାପ୍ତ ଚେକ୍‌ଗଣରାଜ୍ୟର ତୋମସ ମାଚାକ୍‌ଙ୍କୁ ପରାସ୍ତ କରିଛନ୍ତି। ସେହିଭଳି ୨୭ ବର୍ଷୀୟ ଜର୍ମାନିର ଭେରଭ ୬-୩, ୬-୪, ୬-୪ ସେଟ୍‌ରେ ବ୍ରିଟିସ୍‌ ଖେଳାଳି ଜାକବ ଫିଅର୍ନଲିଙ୍କୁ ଏବଂ ତୃତୀୟ ମାନ୍ୟତାପ୍ରାପ୍ତ ସ୍ପେନ୍‌ର ଅଲ୍‌କାରାଜ ୬-୨, ୬-୪, ୬-୭, ୬-୨ ସେଟ୍‌ରେ ବିଶ୍ବର ୩୩ ନମ୍ବର ପର୍ତ୍ତୁଗାଲ୍‌ର ନୁନୋ ବୋର୍ଗେସଙ୍କୁ ହରାଇଛନ୍ତି। ‌ଆମେରିକାର ଟମି ଫଲ୍‌ ୭-୬, ୬-୨, ୬-୦ ସେଟ୍‌ରେ ସ୍ପେନ୍‌ର ରୋବର୍ତୋ କା‌ର୍ବାଲେସ୍‌ ବାଏନାଙ୍କୁ ହରାଇ ପ୍ରିକ୍ବାର୍ଟରରେ ପହଞ୍ଚିଛନ୍ତି।

ଓହରିଲେ ଓସାକା, ପେଗୁଲା ବିଦା

ଦୁଇ ଥର ଅଷ୍ଟ୍ରେଲିଆନ୍‌ ଓପନ୍‌ ବିଜୟିନୀ ଜାପାନ ତାରକା ନାଓମି ଓସାକା ଆହତ ଯୋଗୁଁ ଶୁକ୍ରବାର ଏକ ତୃତୀୟ ରାଉଣ୍ଡ ମ୍ୟାଚ୍‌ ଅଧାରୁ ଓହରି ଯାଇଛନ୍ତି। ବେଲିନ୍ଦା ବେନସିକ୍‌ ବିପକ୍ଷ ଏହି ମ୍ୟାଚ୍‌ର ପ୍ରଥମ ସେଟ୍‌ରେ ୬-୫ରେ ଆଗୁଆ ଥିଲା ବେଳେ ଓସାକାଙ୍କ ପେଟରେ ଯନ୍ତ୍ରଣା ହେବାରୁ ମେଡିକାଲ୍‌ ସେବା ନେଇଥିଲେ। ଏହାପରେ ସେ ଖେଳି ଏହି ସେଟ୍‌ ଟ୍ରାଇବ୍ରେକ୍‌ରେ ସ୍ବିଜରଲାଣ୍ଡ ଖେଳାଳିଙ୍କଠୁ ୬-୭ରେ ହାରିଯାଇଥିଲେ। ହେଲେ ପରବର୍ତ୍ତୀ ସେଟ୍‌ ଖେଳିବା ପୂର୍ବରୁ ଅଧିକ ଯନ୍ତ୍ରଣା ହେବାରୁ ଓସାକା ଓହରିବାକୁ ନିଷ୍ପତ୍ତି ନେଇଥିଲେ। ସପ୍ତମ ମାନ୍ୟତାପ୍ରାପ୍ତ ଜେସିକା ପେଗୁଲାଙ୍କ ଅଭିଯାନ ତୃତୀୟ ରାଉଣ୍ଡରେ ଶେଷ ହୋଇଛି। ୟୁଏସ୍‌ ଓପନ୍‌ ଉପବିଜୟିନୀ ଏହି ଆମେରିକୀୟ ଖେଳାଳି ୬-୭, ୧-୬ ସେଟ୍‌ରେ ସର୍ବିୟାର ଓଲଗା ଡାନିଲୋଭିକ୍‌ଙ୍କଠୁ ହାରିଯାଇଛନ୍ତି। ତେବେ ବିଶ୍ବର ଏକ ନମ୍ବର ଆରିନା ‌ସାବାଲେଙ୍କା ଏବଂ ୩ ନମ୍ବର କୋକୋ ଗଫ୍‌ ସହଜ ବିଜୟ ସହ ପ୍ରିକ୍ବାର୍ଟରଫାଇନାଲ୍‌ ସ୍ଥାନ ନିଶ୍ଚିତ କରିଛନ୍ତି। ‌ଗତ ଦୁଇ ସଂସ୍କରଣ ବିଜୟିନୀ ବେଲାରୁଷ ଲଳନା ସାବାଲେଙ୍କା ୭-୬, ୬-୪ ସେଟ୍‌ରେ ଡେନ୍‌ମାର୍କର କ୍ଲାରା ତୌସନ୍‌ଙ୍କୁ ଏବଂ ୨୦୨୩ ୟୁଏସ୍‌ ଓପନ୍‌ ବିଜୟିନୀ ୨୦ ବର୍ଷୀୟା ଆମେରିକୀୟ ଯୁବତୀ ‌ଗଫ୍‌ ୬-୪, ୬-୨ ସେଟ୍‌ରେ ୩୦ ମାନ୍ୟତାପ୍ରାପ୍ତ କାନାଡ଼ାର ଲିଲା ଫର୍ଣ୍ଣାଣ୍ଡିଜ୍‌ଙ୍କୁ ପରାସ୍ତ କରିଛନ୍ତି।

ଆଗେଇଲେ  ବୋପାନ୍ନା-ଝାଙ୍ଗ
ପୁରୁଷ ଯୁଗଳରୁ ବିଦାୟ ନେଇଥିବା ଭାରତୀୟ ଭେଟେରାନ୍‌ ରୋହନ ବୋପାନ୍ନା ମିଶ୍ରିତ ଯୁଗଳରେ ପ୍ରଥମ ରାଉଣ୍ଡ ବାଧା ଅତିକ୍ରମ କରିଛନ୍ତି। ଶୁକ୍ରବାର ସେ ଓ ତାଙ୍କ ଚୀନ୍‌ ସାଥୀ ସୁଆଇ ଝାଙ୍ଗ ୬-୪, ୬-୪ ସେଟ୍‌ରେ ଫ୍ରାନ୍ସର କ୍ରିଷ୍ଟିନା ମ୍ଲାଡେନୋଭିକ ଓ କ୍ରୋଏସିଆର ଇଭାନ ଡୋଡିଗ୍‌ଙ୍କୁ ହରାଇଛନ୍ତି। ଏହି ଭାରତ-ଚୀନ୍‌ ଯୋଡ଼ି ପରବର୍ତ୍ତୀ ରାଉଣ୍ଡରେ ଆମେରିକା-ମୋନାକୋ ଯୋଡ଼ି ଟେଲର ଟାଉନସେଣ୍ଡ ଓ ହୁଗୋ ନିସ୍‌ଙ୍କୁ ଭେଟିବେ।

ସୌଜନ୍ୟ-ସମ୍ୱାଦ