ଆକାଶ ଆନନ୍ଦକୁ ବଡ ଅଫର ଦେଲେ କଂଗ୍ରେସ ନେତା

ନୂଆଦିଲ୍ଲୀ: ବହୁଜନ ସମାଜ ପାର୍ଟି (BSP)ର ଉତ୍ତରାଧିକାରୀ ସମେତ ସମସ୍ତ ପଦବୀରୁ ଆକାଶ ଆନନ୍ଦଙ୍କୁ ହଟାଇବା ପରେ କଂଗ୍ରେସ ନେତା ତଥା ପୂର୍ବତନ ସାଂସଦ ଉଦିତ ରାଜ ଏକ ବଡ଼ ବୟାନ ଦେଇଛନ୍ତି। ଉଦିତ ରାଜ ବିଏସପି କର୍ମୀଙ୍କୁ କଂଗ୍ରେସରେ ଯୋଗଦେବାକୁ ଅନୁରୋଧ କରିଛନ୍ତି। ବିଏସପି ରାଷ୍ଟ୍ରୀୟ ଅଧ୍ୟକ୍ଷା ମାୟାବତୀ ତାଙ୍କ ପୁତୁରା ଆକାଶ ଆନନ୍ଦଙ୍କୁ ସମସ୍ତ ଦଳୀୟ ଦାୟିତ୍ୱରୁ ମୁକ୍ତ କରିବାର କିଛି ଘଣ୍ଟା ପରେ, କଂଗ୍ରେସ ନେତା ଉଦିତ ରାଜ ବିଏସପି କର୍ମୀମାନଙ୍କୁ କଂଗ୍ରେସ ଦଳରେ ଯୋଗଦେବାକୁ ଆହ୍ବାନ କରିଛନ୍ତି। ରବିବାର ଏକ ବିବୃତ୍ତିରେ, ପୂର୍ବତନ ସାଂସଦ ମାୟାବତୀଙ୍କୁ ସମାଲୋଚନା କରି ଦାବି କରିଛନ୍ତି ଯେ ତାଙ୍କ କାର୍ଯ୍ୟ ତାଙ୍କ ଦଳର ପତନ ଆଡ଼କୁ ନେଇଯାଉଛି। ସେ କହିଥିଲେ, ‘ମାୟାବତୀ ତାଙ୍କ ଦଳକୁ ନଷ୍ଟ କରୁଛନ୍ତି।’ ବିଏସପିରେ ଦଳିତ କିମ୍ବା ଅନ୍ୟାନ୍ୟ ପଛୁଆ ବର୍ଗଙ୍କ ପାଇଁ କୌଣସି ‘ମିଶନ’ ବାକି ନାହିଁ।

ବିଏସପି ଉପରେ ‘ସ୍ପଷ୍ଟ ମିଶନର ଅଭାବ’ ଅଭିଯୋଗ ଆଣି ସେ କହିଛନ୍ତି, ‘ବିଏସପିରେ ସମ୍ବିଧାନର ସୁରକ୍ଷା, ଦଳିତ ଏବଂ ଓବିସିଙ୍କ ଉପରେ ଅତ୍ୟାଚାରର ବିରୋଧ କିମ୍ବା ଘରୋଇକରଣ ବିରୋଧରେ କୌଣସି ଲଢ଼େଇ ବାକି ନାହିଁ।’ ଉଦିତ ରାଜ ବିଏସପି କର୍ମୀମାନଙ୍କୁ ଦଳ ଛାଡି କଂଗ୍ରେସରେ ଯୋଗଦେବାକୁ ଅନୁରୋଧ କରିଥିଲେ।

ଏହା ସହିତ କଂଗ୍ରେସ ନେତା ଉଦିତ ରାଜ କହିଛନ୍ତି, ‘ଯେଉଁମାନେ ମୋ ଉପରେ ରାଗିଥିଲେ, ସେମାନେ ଏବେ ବୁଝିବା ଉଚିତ ଯେ ମୋର ଉଦ୍ଦେଶ୍ୟ ସେମାନଙ୍କୁ ପରିସ୍ଥିତି ବିଷୟରେ ସଚେତନ କରିବା ଥିଲା।’ ଉଲ୍ଲେଖ ଥାଉ କି ଗତକାଲି ବହୁଜନ ସମାଜ ପାର୍ଟି (ବିଏସପି) ମୁଖ୍ୟ ମାୟାବତୀ ତାଙ୍କ ପୁତୁରା ଆକାଶ ଆନନ୍ଦଙ୍କୁ ଜାତୀୟ ସଂଯୋଜକ ପଦବୀରୁ ହଟାଇ ଦେଇଥିଲେ । ଏହା ବ୍ୟତୀତ ସେ ଜୀବିତ ଥିବା ପର୍ଯ୍ୟନ୍ତ ଦଳର କୌଣସି ଉତ୍ତରାଧିକାରୀ ରହିବେ ନାହିଁ ବୋଲି ସେ ଘୋଷଣା କରିଛନ୍ତି। ରବିବାର ଦିନ ଲଖନଉରେ ସମସ୍ତ ପଦାଧିକାରୀଙ୍କ ବୈଠକରେ ମାୟାବତୀ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଥିଲେ । ସେ ତାଙ୍କ ପୁତୁରା ଆକାଶ ଆନନ୍ଦଙ୍କୁ ସମସ୍ତ ପଦବୀରୁ ହଟାଇ ଦେଇଥିଲେ।

ସୌଜନ୍ୟ-ସମ୍ୱାଦ