ପାକସ୍ଥଳୀକୁ ଆମେ ଡଷ୍ଟବିନ୍ କରିଛେ: ଡା. ଅଶୋକ ମହାପାତ୍ର

ଭୁବନେଶ୍ବର: ବର୍ତ୍ତମାନ ସମୟରେ ଲୋକମାନଙ୍କ ଖାଇବା, ଶୋଇବା ସମୟ ଠିକ୍ ରହୁନାହିଁ। ଲୋକମାନେ ମାତ୍ରାଧିକ ଚର୍ବିଯୁକ୍ତ କିମ୍ବା ସର୍କରାଯୁକ୍ତ ଖାଦ୍ୟ ଖାଉଛନ୍ତି। ଆମ ପାକସ୍ଥଳୀକୁ ଆମେ ଡଷ୍ଟବିନ୍ କରିଦେଇଛନ୍ତି ବୋଲି କହିଛନ୍ତି ଏମ୍‌ସ, ଭୁବନେଶ୍ବରର ପୂର୍ବତନ ନିର୍ଦ୍ଦେଶକ ପଦ୍ମଶ୍ରୀ ପ୍ରଫେସର ଡା. ଅଶୋକ ମହାପାତ୍ର। ସ୍ବାସ୍ଥ୍ୟ ସମ୍ବାଦ ଓ କନକ ନ୍ୟୁଜ୍‌ର ମିଳିତ ଉଦ୍ୟମରେ ହୋଟେଲ ସ୍ବସ୍ତି ପ୍ରମିୟମରେ ଦ ହେଲ୍‌ଥ କନ୍‌କ୍ଲେଭ୍-୨୦୨୫ ଆୟୋଜିତ ହୋଇଛି। ଏଥିରେ ଅତିଥିଭାବେ ଯୋଗଦେଇ ଡା.ମହାପାତ୍ର କହିଲେ, ବର୍ତ୍ତମାନର ପିଲାଙ୍କ ଭିତରୁ ୩୦% ଅପପୁଷ୍ଟି, ୪୦% ମେଦବହୁଳ ଓ ୩୦% ସ୍ବାସ୍ଥ୍ୟ ଭଲ ରହିଛି। ୭୦ବର୍ଷର ବୟସ୍କ ଅତିକମ୍‌ରେ ୧୦ ପ୍ରକାରର ଔଷଧ ଖାଉଛନ୍ତି। ଆମେରିକାର ଲୋକମାନେ ୬.୫ ଘଣ୍ଟା ଶୋଉଥିବା ବେଳେ ଭାରତୀୟମାନେ ୬ଘଣ୍ଟା ଶୋଉଛନ୍ତି। ୨୦୧୫ ମସିହାରେ ଏମ୍‌ସ ଭୁବନେଶ୍ବରରେ ଡାକ୍ତରମାନଙ୍କ ପାଇଁ ଏକ ସ୍ବାସ୍ଥ୍ୟ କ୍ୟାମ୍ପ ହୋଇଥିଲା। ଏଥିରେ ଜଣାପଡ଼ିଲା ଯେ ଡାକ୍ତରମାନେ ରାତି ୨ଟା ପୂର୍ବରୁ ଶୋଉ ନାହାନ୍ତି। ସେମାନଙ୍କ ମଧ୍ୟରୁ ୨୫% ମଧୁମେହ, ୨୫% ଉଚ୍ଚ ରକ୍ତଚାପର ଶିକାର ହୋଇଥିଲେ। ୧୭-୨୦ବର୍ଷର ଯେଉଁ ଛାତ୍ରଟି ଏମ୍‌ବିବିଏସ୍‌ ପଢ଼ୁଛି ସେ ଏକପ୍ରକାର ରୋଗୀ ହୋଇଗଲାଣି। କାର୍ଯ୍ୟରେ ସନ୍ତୁଳନ ନ ରହିବା ଓ ମୋବାଇଲ ଫୋନ୍ କାରଣରୁ ଅନେକଙ୍କୁ ରାତିରେ ନିଦ ହେଉନାହିଁ। ଆମେରିକା, ୟୁରୋପ, ଚୀନ୍‌ ଭଳି ଦେଶରେ ସେଲ୍‌ଫୋନ୍‌ ଟାୱାର ପ୍ରତିଷ୍ଠା ପାଇଁ ନୀତି ନିୟମ ରହିଛି। ମାତ୍ର ଭାରତରେ ୧୦ବର୍ଷରୁ ଅଧିକ ହେବ ସେଲ୍‌ଫୋନ୍ ବ୍ୟବହାର ହେଉଥିଲେ ହେଁ କୌଣସି ନିୟମ ନାହିଁ। ଲୋକମାନେ ତକିଆ ତଳେ ଦୁଇ ଦୁଇଟା ସେଲ୍‌ଫୋନ୍ ରଖି ଶୋଉଛନ୍ତି। ରାତିରେ କେମିତି ନିଦ ହେବ ? ମାତୃ ଓ ଶିଶୁ ମୃତ୍ୟୁ ହାର, ଜୀବନକାଳ ଓ ଅପପୁଷ୍ଟି ପାଇଁ ସ୍ବାସ୍ଥ୍ୟ ମାନଦଣ୍ଡରେ ଭାରତର ପ୍ରଦର୍ଶନ ବହୁ ଖରାପ।

ସେ ଆହୁରି ମଧ୍ୟ କହିଥିଲେ ଯେ ମଧ୍ୟାହ୍ନ ଭୋଜନ ନାଁରେ ପିଲାଙ୍କୁ ଭାତ ଓ ଆଚାର କିମ୍ବା ଚଟଣି ଖାଇବାକୁ ଦିଆଯାଉଛି। ଏଥିରେ ପିଲାର ଅଭିବୃଦ୍ଧି କିଭଳି ହେବ ? ପିଲାମାନେ, ମଧ୍ୟବୟସ୍କ ଓ ବୟସ୍କମାନେ ମଧ୍ୟ ରୋଗୀ ହୋଇପଡ଼ିଲେଣି। ଲାନ୍‌ସେଟ୍‌ରେ ପ୍ରକାଶିତ ଏକ ରିପୋର୍ଟ ଅନୁସାରେ ଡାକ୍ତରମାନେ ବହୁ ଚାପରେ ରହିବା କାରଣରୁ ଲୋକଙ୍କ ତୁଳନାରେ ସେମାନେ ଅଧିକ ଅସୁସ୍ଥ। ଦେଶରେ ତୃଣମୂଳ ସ୍ତରରେ ଲୋକଙ୍କ ସ୍ବାସ୍ଥ୍ୟ ବହୁତ ଖରାପ। ବର୍ତ୍ତମାନ ସମୟରେ ୧୧ଶହ ମେଡିକାଲ କଲେଜ କାର୍ଯ୍ୟକ୍ଷମ ଥିଲେ ହେଁ ଏହା ଯଥେଷ୍ଟ ନୁହେଁ। ଡାକ୍ତର-ରୋଗୀ, ଡାକ୍ତର-ଜନସଂଖ୍ୟା, ରୋଗୀ-ଶଯ୍ୟା ଓ ଶଯ୍ୟା-ଆଇସିୟୁ ହାର ମାନଦଣ୍ଡରେ ଭାରତ ବହୁ ପଛରେ ରହିଛି। ଆମେ କ୍ଷୁଧାକୁ ଦୂର କରିପାରି‌ଛେ, ହେଲେ ଲୋକମାନେ ସତରେ କ’ଣ ସୁସ୍ଥ? ‌ବର୍ତ୍ତମାନ ଜନସାଧାରଣ କିମ୍ବା ଡାକ୍ତର କେହି ସୁସ୍ଥ ନୁହନ୍ତି ବୋଲି ଡା.ମହାପାତ୍ର କହିଛନ୍ତି।

ସୁସ୍ଥ ରହିବା ପାଇଁ ମିଠା, ଥଣ୍ଡା ପାନୀୟ ଓ ଜଙ୍କ୍‌ଫୁଡ୍‌ଠାରୁ ଦୂରେଇ ରହିବାକୁ ହେବ: ଡା.ସୁବ୍ରତ ଆଚାର୍ଯ୍ୟ

ସୁନାମଧନ୍ୟ ଚିକିତ୍ସକ ପଦ୍ମଶ୍ରୀ ଡା.ସୁବ୍ରତ ଆଚାର୍ଯ୍ୟ କହିଥିଲେ, ଡାକ୍ତରଙ୍କ ପାଖକୁ ଲୋକମାନେ ଦୁଃଖରେ ହିଁ ଆସିଥାନ୍ତି। ଏହି ସମୟରେ ପ୍ରତ୍ୟେକ ଲୋକ ଚାହିଁ ଥା’ନ୍ତି ଯେ ଯେମିତି ଡାକ୍ତର ତାଙ୍କୁ ଠିକ୍ କରିଦେବେ। ମାତ୍ର ଏହା ସବୁ ସମୟରେ ସମ୍ଭବ ହୋଇ ନ ଥାଏ। କହିବାକୁ ଗଲେ ସ୍ବାସ୍ଥ୍ୟକୁ ଲୋକମାନେ ସବୁବେଳେ ଅବହେଳା କରିଥାନ୍ତି। ଦେଶ ସ୍ବାଧୀନତା ସମୟରେ ଭାରତୀୟଙ୍କ ଜୀବନକାଳ ୩୭ବର୍ଷ ଥିଲା। ଆଜିର ସମୟରେ ଏହା ୭୦ବର୍ଷ ପାର୍ କରିଛି। ଧୀରେ ଧୀରେ ୮୦ବର୍ଷ ଆଡ଼କୁ ଯାଉଛି। ଏହାସହ ରୋଗର ପ୍ରକାର ମଧ୍ୟ ବଦଳିଛି। ପୂର୍ବରୁ ଲୋକମାନେ ସଂକ୍ରାମକ ରୋଗ ମ୍ୟାଲେରିଆ, କଲେରା, ଯକ୍ଷ୍ମା ଓ ବସନ୍ତ ଭଳି ରୋଗରେ ପ୍ରାଣ ହରାଉଥିଲେ। ମାତ୍ର ଏବେ ଲୋକମାନେ କର୍କଟ, ହୃଦ୍‌ରୋଗ ଓ ଅଯଥା ଔଷଧ ସେବନର ପାର୍ଶ୍ବ ପ୍ରତିକ୍ରିୟା ଭଳି ରୋଗର ଶିକାର ହେଉଛନ୍ତି। ମଣିଷର ଯେତେବେଳେ କ୍ରମବିକାଶ ହେଲା, ସେତେବେଳେ ସେ ଶିକାର କରୁଥିଲା ଓ ଖାଉଥିଲା। ଏବେ ମଣିଷର ଏହି ଅଭ୍ୟାସଟି ବଦଳିଯାଇଛି। ଏହାସହ ଖାଦ୍ୟର ଗୁଣବତ୍ତାରେ ମଧ୍ୟ ପରିବର୍ତ୍ତନ ଆସିଛି। ମଦ୍ୟପାଦ, ଧୂମପାନ ପାଇଁ ଫୁସ୍‌ଫୁସ୍‌ କର୍କଟ ରୋଗ ବଢ଼ିବାରେ ଲାଗିଛି। ଏପରିକି ଯକୃତ କର୍କଟ ରୋଗ ବିଶ୍ବରେ ତୃତୀୟ ସର୍ବାଧିକ ମୃତ୍ୟୁର କାରଣ ହୋଇଥିଲେ ହେଁ ଏହା ବିଷୟରେ ବିଶେଷ ଆଲୋଚନା ହେଉନାହିଁ।

ସେ ଆହୁରି ମଧ୍ୟ କହିଛନ୍ତି ଯେ ସୁସ୍ଥ ରହିବାକୁ ହେଲେ ସକାଳୁ ଘଣ୍ଟାଏ ବ୍ୟାୟାମ କରିବା ସହ ମିଠା, ଥଣ୍ଡା ପାନୀୟ ଓ ଜଙ୍କ୍‌ଫୁଡ୍‌ଠାରୁ ଦୂରେଇ ରହିବାକୁ ହେବ। ସବୁଜ ପନିପରିବା ଓ ଫଳ ଖାଇବା ଉଚିତ। ଏହାସହ ଚାପମୁକ୍ତ ରହିବାକୁ ପଡ଼ିବ। ଚାପ ବଢ଼ିବାର କୌଣସି ଗୋଟିଏ ନିର୍ଦ୍ଦିଷ୍ଟ କାରଣ ନାହିଁ। ସ୍କୁଲରେ ପଢ଼ୁଥିବା ପିଲାଟିଏ ମଧ୍ୟ ପରୀକ୍ଷା ସମୟରେ ଚାପର ଶିକାର ହେଉଛି। ଏହାସହ ଜଣେ ବ୍ୟକ୍ତିଙ୍କ ନିକଟରେ ରହୁଥିବା ଲୋକମାନଙ୍କ କାର୍ଯ୍ୟକଳାପ ପାଇଁ ମଧ୍ୟ ଜଣେ ଚାପର ଶିକାର ହୋଇଥାଏ। ଯେଉଁ କାମ କରିବାକୁ ପସନ୍ଦ ଲାଗୁଛି, ସେହି କାମ କଲେ ଜଣେ ଚାପର ବଶବର୍ତ୍ତୀ ହେବନାହିଁ। ଉତ୍ତମ ସ୍ବାସ୍ଥ୍ୟ ପାଇଁ ଲୋକମାନେ ସଚେତନ ହେବା ସହ ଏହାକୁ କାର୍ଯ୍ୟରେ ପରିଣତ କରିବା ଅତ୍ୟନ୍ତ ଜରୁରି ବୋଲି ଡା. ଆଚାର୍ଯ୍ୟ କହିଛନ୍ତି।

ପ୍ରାରମ୍ଭରେ ‘ସମ୍ବାଦ’ ଓ ‘କନକ ନ୍ୟୁଜ୍‌’ର ସଂପାଦକ ତନୟା ପଟ୍ଟନାୟକ କହିଲେ, ସ୍ବାସ୍ଥ୍ୟ ସମ୍ବନ୍ଧରେ ଠିକ୍ ସୂଚନା ହିଁ ଜୀବନରେ ବଡ଼ ପରିବର୍ତ୍ତନ ଆଣିପାରିବ। ଗଣମାଧ୍ୟମର ମୁଖ୍ୟ କାମ ହେଉଛି ଲୋକଙ୍କୁ ଲୋକଙ୍କ ସହ ଯୋଡ଼ିବା। ସାହିତ୍ୟ, ସମାଜସେବା, ରକ୍ତଦାନ, ପରିବେଶ, ଭାଷାଜ୍ଞାନ କ୍ଷେତ୍ରରେ ‘ସମ୍ବାଦ’ ଗ୍ରୁପ୍ ବିଭିନ୍ନ କାର୍ଯ୍ୟ କରିଆସୁଛି। ସ୍ବାସ୍ଥ୍ୟ ସଂପର୍କରେ ଉପଯୁକ୍ତ ସୂଚନା ଓ ଲୋକଙ୍କ ଭିତରେ ରହିଥିବା ଦୂରତାକୁ କମାଇବା ପାଇଁ ପ୍ରୟାସ ଜାରି ରହିଛି ବୋଲି ସେ କହିଥିଲେ। ଏହି ଅବସରରେ ଡା.ସିନି ବେଣୁଗୋପାଳ, ଡା.ଭାରତ ଭୂଷଣ, ଡା.ସୁରଜିତ ପାତ୍ର, ଡା.ଅଂଶୁମାନ ଦାସ, ଡା.ଉନ୍ମେଷ ଜେନା, ଡା.ଅକ୍ଷୟ ରାଉତ, ଡା.ପ୍ରଜ୍ଞାଶ୍ରୀ ପ୍ରିୟଦର୍ଶିନୀ ଓ ଡା.ବିଶ୍ବଜିତ ମହାପାତ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା।

ସୌଜନ୍ୟ-ସମ୍ୱାଦ