ଅବହେଳାରୁ ଚାଲିଗଲା ଗର୍ଭବତୀଙ୍କ ଜୀବନ, ହସ୍ପିଟାଲ୍‌ ଉପରେ ଅଭିଯୋଗ ଆଣିଲେ ପରିବାର ଲୋକ

ପୁଣେ: ପୁଣେର ଦିନନାଥ ମଙ୍ଗେଶକର ହସ୍ପିଟାଲରେ ଜଣେ ଗର୍ଭବତୀ ମହିଳାଙ୍କୁ ଟଙ୍କା ପାଇଁ ଚିକିତ୍ସା ନକରାଯିବା କାରଣରୁ ତାଙ୍କର ମୃତ୍ୟୁ ଘଟିଛି। ପୀଡ଼ିତା ମହିଳାଙ୍କ ନାଁ ତନିଶା ଭିସେ।

ରିପୋର୍ଟ ଅନୁଯାୟୀ, ତନିସାଙ୍କର ପ୍ରସବ ଯନ୍ତ୍ରଣା ହେବା ପରେ ତାଙ୍କ ପରିବାର ତାଙ୍କୁ ହସ୍ପିଟାଲକୁ ନେଇଯାଇଥିଲେ। ତନିଶାଙ୍କର ଖୁବ୍‌ ଜୋର୍‌ ଗର୍ଭ ଯନ୍ତ୍ରଣା ହୋଇଥିଲା। ତାଙ୍କ ସ୍ୱାମୀ ସୁଶାନ୍ତ ଭିସେ ଦାବି କରିଛନ୍ତି ଯେ ହସ୍ପିଟାଲ ଚିକିତ୍ସା ପାଇଁ ୧୦ ଲକ୍ଷ ଟଙ୍କା ଦାବି କରିଥିଲା।

ତୁରନ୍ତ ୨.୫ ଲକ୍ଷ ଟଙ୍କା ଦେବାକୁ ରାଜି ଥିବା ସତ୍ତ୍ୱେ, ହସ୍ପିଟାଲ ଚିକିତ୍ସା ଆରମ୍ଭ କରିବାକୁ ମନା କରିଦେଇଥିଲା, ଯାହା ଫଳରେ ତାଙ୍କ ପତ୍ନୀଙ୍କର ମୃତ୍ୟୁ ଘଟିଛି।

ମହାରାଷ୍ଟ୍ର ବିଧାନ ପରିଷଦ ସଦସ୍ୟ ଅମିତ ଗୋର୍ଖେଙ୍କ ବ୍ୟକ୍ତିଗତ ସଚିବ ଭାବରେ କାର୍ଯ୍ୟ କରୁଥିବା ସୁଶାନ୍ତ ପ୍ରକାଶ କରିଛନ୍ତି ଯେ ତାଙ୍କ ପତ୍ନୀଙ୍କ ଗର୍ଭରେ ଯମଜ ସନ୍ତାନ ଥିବା ବେଳେ ତାଙ୍କର ତୁରନ୍ତ ଚିକିତ୍ସା ଆବଶ୍ୟକ ଥିଲା।ମାତ୍ର ଚିକିତ୍ସା ପାଇଁ ମନା କରାଯିବା ପରେ, ପରିବାର ପାଖରେ ତାଙ୍କୁ ଅନ୍ୟ ଏକ ହସ୍ପିଟାଲକୁ ସ୍ଥାନାନ୍ତର କରିବା ବ୍ୟତୀତ ଅନ୍ୟ କୌଣସି ବିକଳ୍ପ ନଥିଲା। ତଥାପି, ପ୍ରସବ ପରେ ଜଟିଳତାରେ ତନିଶାଙ୍କ ମୃତ୍ୟୁ ଘଟିଥିଲା।

ହସ୍ପିଟାଲ ଉପରେ ଅବହେଳାର ଅଭିଯୋଗ ଆଣି ସୁଶାନ୍ତ କହିଛନ୍ତି, “ସେମାନେ ଜୀବନ ଅପେକ୍ଷା ଟଙ୍କାକୁ ପ୍ରାଥମିକତା ଦେଇଥିଲେ। ଯଦି ସେମାନେ ତାଙ୍କୁ ସମୟ ମଧ୍ୟରେ ଭର୍ତ୍ତି କରିଥାନ୍ତେ, ତେବେ ସେ ବଞ୍ଚିଯାଇଥାନ୍ତେ।”

ସୌଜନ୍ୟ-ସମ୍ୱାଦ