ବଜେଟ୍ ଅଧିବେଶନ ଶେଷ, ୧୬ଟି ବିଲ୍ ଗୃହୀତ

ନୂଆଦିଲ୍ଲୀ: ୨୦୨୫ ଜାନୁଆରି ୩୧ତାରିଖରୁ ଆରମ୍ଭ ହୋଇଥିବା ସଂସଦର ବଜେଟ୍ ଅଧିବେଶନ   ଶେଷ ହୋଇଛି ଏବଂ  ଆଜି ଉଭୟ ଗୃହକୁ ପରବର୍ତ୍ତୀ ମୌସୁମୀ ଅଧିବେଶନ ପର୍ଯ୍ୟନ୍ତ ମୁଲତବୀ ରଖାଯାଇଛି। ଅଧିବେଶନର ସଫଳତା ଉପରେ ଆଲୋକପାତ କରି ବାଚସ୍ପତି ଓମ୍ ବିର୍ଲା ଘୋଷଣା କରିଥିଲେ ଯେ ଗୃହରେ ଅନେକ ଗୁରୁତ୍ୱପୂର୍ଣ୍ଣ ବିଲ୍ ପାରିତ ହୋଇଛି ଏବଂ ଉତ୍ପାଦକତା ୧୧୮ ପ୍ରତିଶତରେ ପହଞ୍ଚିଛି।

ବାଚସ୍ପତିଙ୍କ ସୂଚନା ଅନୁସାରେ, ବଜେଟ୍ ଅଧିବେଶନରେ ୨୬ଟି ବୈଠକ ରହିଥିଲା, ଯେଉଁଥିରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ପରେ ଧନ୍ୟବାଦ ପ୍ରସ୍ତାବ ଉପରେ ଆଲୋଚନାରେ ୧୭୩ ଜଣ ସଦସ୍ୟ ଅଂଶଗ୍ରହଣ କରିଥିଲେ। ଏହାବ୍ୟତୀତ କେନ୍ଦ୍ର ବଜେଟ୍ ଉପରେ ଆଲୋଚନାରେ ୧୬୯ ଜଣ ସଦସ୍ୟ ଅଂଶଗ୍ରହଣ କରିଥିଲେ। ଅଧିବେଶନରେ ୧୦ଟି ସରକାରୀ ବିଲ୍ ପୁନଃ ଆଗତ କରାଯାଇଥିଲା ଏବଂ ସମୁଦାୟ ୧୬ଟି ବିଲ୍ ସଫଳତାର ସହ ପାରିତ ହୋଇଥିଲା। ସେ ଆହୁରି ଦର୍ଶାଇଛନ୍ତି ଯେ ଏପ୍ରିଲ ୩ ତାରିଖ ପର୍ଯ୍ୟନ୍ତ ଶୂନ୍ୟକାଳରେ ରେକର୍ଡ ୨୦୨ ଜଣ ସଦସ୍ୟ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇଥିଲେ। ତେବେ ବିନା ଆଲୋଚନାରେ ୱକଫ୍ ସଂଶୋଧନ ବିଲ୍ ପାରିତ ହୋଇଛି ବୋଲି ରାହୁଲ ଗାନ୍ଧୀ କରିଥିବା ଦାବିକୁ ବିର୍ଲା ଖଣ୍ଡନ କରିଛନ୍ତି। ସେ ଗାନ୍ଧୀଙ୍କ ମନ୍ତବ୍ୟକୁ ଦୁର୍ଭାଗ୍ୟଜନକ ଓ ଗୃହର ମର୍ଯ୍ୟାଦାବିରୋଧୀ ବୋଲି କହିଛନ୍ତି। ବିରୋଧ ସତ୍ତ୍ୱେ ବାଚସ୍ପତି ତାଙ୍କର ଶେଷ ମନ୍ତବ୍ୟ ଜାରି ରଖି ପରବର୍ତ୍ତୀ ଅଧିବେଶନ ଡାକିବା ପର୍ଯ୍ୟନ୍ତ ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖିଥିଲେ।

ପାରିତ ହୋଇଥିବା ବିଲ୍‌ ତାଲିକା
    ୱକଫ୍ ସଂଶୋଧନ ବିଲ୍
    ମୁସଲମାନ ୱକଫ୍ (ଉଚ୍ଛେଦ) ବିଲ୍ ୨୦୨୫
    ଆପ୍ରବାସନ ଓ ବିଦେଶୀ ନାଗରିକ ବିଲ୍
    ଅର୍ଥ ବିଲ୍, ୨୦୨୫
    ବିମାନ ଚଳାଚଳ ସଂସ୍କାର ବିଲ୍, ୨୦୨୫
    ଗୋଆ ବିଧାନସଭା ନିର୍ବାଚନ ମଣ୍ଡଳୀରେ ଅନୁସୂଚିତ ଜନଜାତି ପ୍ରତିନିଧିତ୍ୱର ପୁନର୍ବିଚାର ବିଲ୍
    ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ ବିଲ୍, ୨୦୨୫
    ବିପର୍ଯ୍ୟୟ ପରିଚାଳନା (ସଂଶୋଧନ) ବିଲ୍
    ରେଳ ସଂଶୋଧନ ବିଲ୍‌
    ତୈଳ କ୍ଷେତ୍ର (ନିୟନ୍ତ୍ରଣ ଓ ବିକାଶ) ସଂଶୋଧନ ବିଲ୍‌
    ବ୍ୟାଙ୍କିଂ ଆଇନ (ସଂଶୋଧନ) ବିଲ୍
    ବଏଲର୍ସ ବିଲ୍, ୨୦୨୪
    ପରିବହନ ବିଲ୍ (ବିଲ୍ ଅଫ୍ ଲୋଡିଂ)
    ଜଳ ପଥରେ ସାମଗ୍ରୀ ପରିବହନ ବିଲ୍, ୨୦୨୪
    ଉପକୂଳ ଜାହାଜ ଚଳାଚଳ ବିଲ୍
    ମର୍ଚାଣ୍ଟ ସିପିଂ ବିଲ୍‌

ସୌଜନ୍ୟ-ସମ୍ୱାଦ