କାନାଡାରେ ଖଲିସ୍ଥାନୀ ଖୋଲିଲେ ନକଲି ଦୂତାବାସ

ସରେ : କାନାଡାରେ ଖଲିସ୍ତାନବାଦୀମାନଙ୍କର ଏକ ବଡ଼ ଷଡ଼ଯନ୍ତ୍ର ସାମ୍ନାକୁ ଆସିଛି। କାନାଡାର ସରେରେ ଖଲିସ୍ତାନବାଦୀମାନେ ତଥାକଥିତ ରିପବ୍ଲିକ୍ ଅଫ୍ ଖଲିସ୍ତାନର ଏକ ଦୂତାବାସ ସ୍ଥାପନ କରିଛନ୍ତି। ନକଲି ଦୂତାବାସର ଖବର ଆସିବା ମାତ୍ରେ ଭାରତର ତଦନ୍ତ ଏଜେନ୍ସିଗୁଡ଼ିକ ସତର୍କ ହୋଇଯାଇଛନ୍ତି। ଏହି ଘଟଣା ଏପରି ଏକ ସମୟରେ ସାମ୍ନାକୁ ଆସିଛି ଯେତେବେଳେ ଭାରତ ଏବଂ କାନାଡା ମଧ୍ୟରେ ସମ୍ପର୍କକୁ ସୁଧାରିବା ପାଇଁ ପ୍ରୟାସ କରାଯାଉଛି।

ଭାରତୀୟ ଏଜେନ୍ସିଗୁଡ଼ିକ ସରେରେ ଖଲିସ୍ତାନ ଆତଙ୍କବାଦୀ କାର୍ଯ୍ୟକଳାପ ଉପରେ ନଜର ରଖିଛନ୍ତି। ସେଠାରୁ ଆସିଥିବା ରିପୋର୍ଟରେ କୁହାଯାଇଛି ଯେ ହରଦୀପ ସିଂହ ନିଜ୍ଜରର ସମର୍ଥନରେ ସରେରେ ଏହି ଦୂତାବାସ ସ୍ଥାପନ କରାଯାଇଛି। ଭାରତ ଦ୍ୱାରା ନିଜ୍ଜରକୁ ଆତଙ୍କବାଦୀ ଘୋଷଣା କରାଯାଇଥିଲା।

ସରେରେ ଖୋଲାଯାଇଥିବା ନକଲି ଦୂତାବାସରେ ଆତଙ୍କବାଦୀ ହରଦୀପ ସିଂହ ନିଜ୍ଜରର ପୋଷ୍ଟର ଲାଗିଛି। କେବଳ ଏତିକି ନୁହେଁ, କାନାଡାର ଖାଲିସ୍ତାନି ସଂଗଠନ ଏସଏଫଜେ (ଶିଖ ଫର୍ ଜଷ୍ଟିସ୍) ଆଗାମୀ ଦିନରେ ଆଉ ଏକ କଥିତ ଶିଖ ଜନମତ ସଂଗ୍ରହ କରିବାକୁ ଘୋଷଣା କରିଛି। ସୁରକ୍ଷା ଏଜେନ୍ସିଗୁଡ଼ିକ ଭୟ କରୁଛନ୍ତି ଯେ ଏହା କେବଳ ଭାରତ ବିରୋଧୀ ଭାବନାକୁ ଉସୁକାଇ ଦେଉନାହିଁ, ବରଂ ଭାରତର ସାର୍ବଭୌମତ୍ୱକୁ ଚ୍ୟାଲେଞ୍ଜ କରିବା ପାଇଁ ବିଦେଶୀ ଭୂମିକୁ ମଧ୍ୟ ବ୍ୟବହାର କରାଯାଉଛି।

ସୌଜନ୍ୟ – ସମ୍ବାଦ