ଢାକା: ଶକ୍ତି ସଙ୍କଟରୁ ମୁକ୍ତି ପାଇବା ପାଇଁ ଭାରତ ପୁଣି ଥରେ ବାଂଲାଦେଶର ତ୍ରାଣକର୍ତ୍ତା ଭାବରେ ଠିଆ ହୋଇଛି। ବାଂଲାଦେଶକୁ ଇନ୍ଧନର ସ୍ଥିର ଯୋଗାଣ ବଜାୟ ରଖିବାର ପ୍ରୟାସର ଅଂଶ ସ୍ୱରୂପ, ଭାରତରୁ ଅତିରିକ୍ତ ୫ ହଜାର ଟନ୍ ଡିଜେଲ ଯୋଗାଣ ଆରମ୍ଭ ହୋଇଛି। ଏହା ଭାରତ-ବାଂଲାଦେଶ ବନ୍ଧୁତା ପାଇପଲାଇନ୍ ମାଧ୍ୟମରେ ଯୋଗାଣ କରାଯାଉଛି। ଢାକା ଟ୍ରିବ୍ୟୁନରେ ପ୍ରକାଶିତ ଏକ ରିପୋର୍ଟ ଅନୁଯାୟୀ,ଏହା ପାର୍ବତୀପୁର ପଡ଼ିଆ ତୈଳ ଡିପୋକୁ ପଠାଯାଉଛି। ଡିପୋ ପରିଚାଳକ ମହମ୍ମଦ ଆହସାନ ହବିବ୍ ଚୌଧୁରୀ କହିଛନ୍ତି, ଭାରତ-ବାଂଲାଦେଶ ବନ୍ଧୁତା ପାଇପଲାଇନ୍ ମାଧ୍ୟମରେ ଭାରତରୁ ଡିପୋକୁ ଡିଜେଲ ଆସିବା ଆରମ୍ଭ ହୋଇଛି। ସେ ଆହୁରି କହିଛନ୍ତି ଏହା ୧୬ ଏପ୍ରିଲ ସକାଳରୁ ଆସିବା ଆରମ୍ଭ ହୋଇଥିଲା।

ଭାରତରୁ କେତେ ଡିଜେଲ ପାଇଲାଣି ବାଂଲାଦେଶ:

ଢାକା ଅଧିକାରୀଙ୍କ ଅନୁଯାୟୀ, ମାର୍ଚ୍ଚରୁ ଏପ୍ରିଲ ୧୪ ମଧ୍ୟରେ ବାଂଲାଦେଶ ଭାରତରୁ ପାଇପଲାଇନ ମାଧ୍ୟମରେ ୩୦,୦୦୦ ଟନ୍ ଡିଜେଲ ପାଇଛି।
ମାର୍ଚ୍ଚ ମାସରେ ଭାରତରୁ ବାଂଲାଦେଶକୁ ୨୨,୦୦୦ ଟନ୍ ଡିଜେଲ ଯୋଗାଣ ହୋଇଥିଲା।

୧୪ ଏପ୍ରିଲରେ, ବାଂଲାଦେଶର ପାର୍ବତୀପୁର ଡିପୋରେ ୮,୦୦୦ ଟନ୍ ଡିଜେଲ ପହଞ୍ଚିଥିଲା।

ପାର୍ବତୀପୁର ଡିପୋର ଅଧିକାରୀମାନେ କହିଛନ୍ତି, ଆଗାମୀ ଦିନରେ ଅଧିକ ଯୋଗାଣ ଆଶା କରାଯାଉଛି। ଚାରିରୁ ପାଞ୍ଚ ଦିନ ମଧ୍ୟରେ ଭାରତର ନୁମାଲିଗଡ଼ ରିଫାଇନାରୀରୁ ଆହୁରି ୭,୦୦୦ଟନ୍ ଡିଜେଲ ଆସିବାର ଆଶା କରାଯାଉଛି। ସ୍ଥାନୀୟ ଗଣମାଧ୍ୟମ ଅନୁଯାୟୀ, ଏପ୍ରିଲରେ ବାଂଲାଦେଶ ଭାରତରୁ ମୋଟ ୨୫,୦୦୦ଟନ୍ ଡିଜେଲ ପାଇବ। ଭାରତରୁ ସୀମାପାର ପାଇପଲାଇନ ବାଂଲାଦେଶ ପାଇଁ ଏକ ଜୀବନରେଖା ପାଲଟିଛି। ଡିପୋ ପରିଚାଳକ ଅହସାନ ହବିବ ଚୌଧୁରୀ କହିଛନ୍ତି ଯେ ସରକାର ସାଧାରଣ ଇନ୍ଧନ ଷ୍ଟକ ବଜାୟ ରଖିବା ଏବଂ ନିରବଚ୍ଛିନ୍ନ ଯୋଗାଣ ସୁନିଶ୍ଚିତ କରିବା ପାଇଁ ପାଇପଲାଇନ ମାଧ୍ୟମରେ ଭାରତରୁ ଡିଜେଲ ଆମଦାନୀ ଜାରି ରଖିଛନ୍ତି। ଯୋଗାଣ ସୁନିଶ୍ଚିତ କରିବା ପାଇଁ, ପାର୍ବତୀପୁର ଡିପୋ ଶୁକ୍ରବାର ଦିନ ସରକାରୀ ଛୁଟିରେ ମଧ୍ୟ କାର୍ଯ୍ୟକ୍ଷମ ରହିଥିଲା।

ସୌଜନ୍ୟ ସମ୍ବାଦ