ତେହେରାନ/ୱାଂସିଟନ: ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନା ଏବେ ଏକ ବିନାଶକାରୀ ମୋଡ଼ ନେଇଛି। ଆମେରିକା ଏବଂ ଇରାନ ମଧ୍ୟରେ ସିଧାସଳଖ ଯୁଦ୍ଧଆରମ୍ଭହୋଇଛି। ବୁଧବାର, ଇରାନ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ଘାତକ ଡ୍ରୋନ୍ ଦ୍ବାରା ଉପସାଗରୀୟ ଅଞ୍ଚଳରେ ଥିବା ଆମେରିକୀୟ ଘାଟି ଉପରେ ଆକ୍ରମଣ କରିଛି। ଯେସାକୁ ତେସା ନୀତି ଗ୍ରହଣ କରି ଆମେରିକୀୟ ବାୟୁସେନା ଇରାନ ଆଭ୍ୟନ୍ତରକୁ ପ୍ରବେଶ କରି ଏୟାର ଷ୍ଟ୍ରାଇକ୍କରିଛି। ଇରାନ ଦାବି କରିଛି, କୁଏତ, ଇରାକ ଏବଂ ବାହାରିନରେ ଥିବା ଆମେରିକୀୟ ସାମରିକ ଘାଟିଗୁଡ଼ିକୁ କ୍ଷେପଣାସ୍ତ୍ର ଏବଂ ଡ୍ରୋନ୍ ଦ୍ବାରା ଟାର୍ଗେଟ କରାଯାଇଛି। ଇରାନୀ ସଶସ୍ତ୍ର ବାହିନୀ ଏବଂ ସରକାରୀ ଗଣମାଧ୍ୟମ ଦାବି କରିଛି ଯେ, ସେମାନେ ଆମେରିକୀୟ ନୌସେନାର ପଞ୍ଚମ ନୌବାହିନୀର ମୁଖ୍ୟାଳୟ ଏବଂ ବାହାରିନରେ ଏକ ପ୍ରମୁଖ ଆମେରିକୀୟ ବାୟୁସେନା ଘାଟି ଉପରେ ସଫଳତାର ସହିତ ଆକ୍ରମଣ କରିଛନ୍ତି।
ଇରାନର ଉତ୍ତେଜନାମୂଳକ କାର୍ଯ୍ୟର ଜବାବରେ, ଆମେରିକାର କେନ୍ଦ୍ରୀୟ କମାଣ୍ଡ ପ୍ରତିଶୋଧ ନେଇ କ୍ୱେଶମ୍ ଦ୍ୱୀପରେ ଥିବା ଇରାନୀ ସାମରିକ ଘାଟିଗୁଡ଼ିକୁ ଟାର୍ଗେଟ କରିଛି। ଆମେରିକାର ବିମାନଗୁଡ଼ିକ ଦ୍ୱୀପର ଏକ ପ୍ରମୁଖ ନିୟନ୍ତ୍ରଣ ଷ୍ଟେସନ ଉପରେ ଆକ୍ରମଣ କରିଥିବା କୁହାଯାଉଛି। ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (ଆଇଆର୍ଜିସି)ମଧ୍ୟ ଏହି ଆକ୍ରମଣ ନେଇ ପ୍ରତିକ୍ରିୟା ପ୍ରକାଶ କରିଛି। ଇରାନୀ ଗଣମାଧ୍ୟମ ରିପୋର୍ଟ ଅନୁସାରେ, ଆଇଆର୍ଜିସି ଦାବି କରିଛି ଯେ, ଆମେରିକାର କ୍ଷେପଣାସ୍ତ୍ର ଦକ୍ଷିଣ କ୍ୱେଶମ୍ ଦ୍ୱୀପରେ ଥିବା ଯୋଗାଯୋଗ ଟାୱାରକୁ ଟାର୍ଗେଟ କରିଛି। ଇରାନ ନିଜର ମିଶନ ସଫଳ ହୋଇଥିବା ଦାବି କରୁଥିବା ବେଳେ, ଆମେରିକାର କେନ୍ଦ୍ରୀୟ କମାଣ୍ଡ ଏହି ଦାବିଗୁଡ଼ିକୁ ସ୍ପଷ୍ଟ ଭାବରେ ଖଣ୍ଡନ କରିଛି। ସୋସିଆଲ ମିଡିଆରେ ପ୍ରକାଶିତ ଏକ ବିବୃତିରେ ସେଣ୍ଟକମ୍ କହିଛି ଯେ, ବାହାରିନରେ ଥିବା କୌଣସି ମୁଖ୍ୟାଳୟ କିମ୍ବା ଘାଟି କ୍ଷତିଗ୍ରସ୍ତ ହୋଇନାହିଁ ଏବଂ ଇରାନର ଦାବି ସମ୍ପୂର୍ଣ୍ଣ ମିଥ୍ୟା। ଆମେରିକୀୟ ସେନା ଉପରେ ଇରାନର ସମସ୍ତ ଆକ୍ରମଣ ସମ୍ପୂର୍ଣ୍ଣ ବିଫଳ ହୋଇଛି।
ସେଣ୍ଟକମ୍ କହିଛି, କୁଏତ ଆଡ଼କୁ ନିକ୍ଷେପ କରାଯାଇଥିବା ଦୁଇଟି କ୍ଷେପଣାସ୍ତ୍ରକୁ ମଝି ଆକାଶରେ ନଷ୍ଟ କରାଯାଇଛି। ଏହା ସହିତ, ବାହାରିନ ଆଡ଼କୁ ନିକ୍ଷେପ କରାଯାଇଥିବା ତିନୋଟି କ୍ଷେପଣାସ୍ତ୍ରକୁ ଆମେରିକା ଏବଂ ବାହାରିନ ବାୟୁ ପ୍ରତିରକ୍ଷା ପ୍ରଣାଳୀ ଦ୍ୱାରା ମଝି ଆକାଶରେ ଧ୍ବଂସ କରାଯାଇଛି। କ୍ଷେପଣାସ୍ତ୍ର ଆକ୍ରମଣ ବ୍ୟତୀତ, ଆମେରିକା ଅନ୍ତର୍ଜାତୀୟ ଜଳସୀମାରେ ବେସାମରିକ ଜାହାଜକୁ ଟାର୍ଗେଟ କରିବା ପାଇଁ ଇରାନ ପଠାଇଥିବା ତିନୋଟି ‘ଆତ୍ମଘାତକ ଡ୍ରୋନ୍’କୁ ଖସାଇ ଦେଇଥିବା ମଧ୍ୟ ନିଶ୍ଚିତ କରିଛି। ଏହି ସମ୍ପୂର୍ଣ୍ଣ ସାମରିକ ଅଭିଯାନ ସମୟରେ କୌଣସି ଆମେରିକୀୟ ସେବା ସଦସ୍ୟଙ୍କୁ କ୍ଷତି ପହଞ୍ଚାଇ ନଥିବା ଆମେରିକୀୟ ସେନା ନିଶ୍ଚିତ କରିଛି।
ଜନସାଧାରଣଙ୍କୁ ଶାନ୍ତ ରହିବାକୁ ନିବେଦନ କରିଛି ବାହାରିନ
ବାହାରିନର ଗୃହ ମନ୍ତ୍ରଣାଳୟ ସତର୍କତା ସାଇରନ ବଜାଇ ଜନସାଧାରଣଙ୍କୁ ଶାନ୍ତ ରହିବାକୁ ନିବେଦନ କରିଛି। ମନ୍ତ୍ରଣାଳୟ ନାଗରିକ ଏବଂ ବାସିନ୍ଦାଙ୍କୁ ନିକଟତମ ସୁରକ୍ଷିତ ସ୍ଥାନକୁ ଯିବାକୁ ଏବଂ କର୍ତ୍ତୃପକ୍ଷଙ୍କ ଦ୍ୱାରା ଜାରି ସମସ୍ତ ସୁରକ୍ଷା ନିର୍ଦ୍ଦେଶ ପାଳନ କରିବାକୁ ଅନୁରୋଧ କରିଛି।
ପରିସ୍ଥିତି ଖରାପ ହେବା ସହିତ, କୁଏତ ସାମରିକ ବାହିନୀ ଜନସାଧାରଣଙ୍କୁ ଚେତାବନୀ ଜାରି କୌଣସି ପଡ଼ିଥିବା କ୍ଷେପଣାସ୍ତ୍ର, ଡ୍ରୋନ୍ କିମ୍ବା ଭଗ୍ନାବଶେଷ ପାଖକୁ ନ ଯିବା କିମ୍ବା ଛୁଇଁବା ପାଇଁ ପରାମର୍ଶ ଦେଇଛି। ଅଧିକାରୀମାନେ କହିଛନ୍ତି ଯେ, ଏପରି ଭଗ୍ନାବଶେଷ ଜୀବନ ପାଇଁ ବିପଦ ସୃଷ୍ଟି କରିପାରେ। ପ୍ରତିରକ୍ଷା ମନ୍ତ୍ରଣାଳୟର ସରକାରୀ ମୁଖପାତ୍ର କର୍ଣ୍ଣେଲ ସୌଦ ଅବଦୁଲାଜିଜ୍ ଅଲ୍-ଓତାଇବି ଦେଶରେ ରହୁଥିବା ନାଗରିକ ଏବଂ ବିଦେଶୀମାନଙ୍କୁ ଜରୁରୀକାଳୀନ ନମ୍ବରରେ ଯେକୌଣସି ସନ୍ଦିଗ୍ଧ ବସ୍ତୁ ବିଷୟରେ ତୁରନ୍ତ ରିପୋର୍ଟ କରିବାକୁ ଅନୁରୋଧ କରିଛନ୍ତି। ସେ ଲୋକମାନଙ୍କୁ କେବଳ ସରକାରୀ ସୂତ୍ରର ସୂଚନା ଏବଂ ସୁରକ୍ଷା ନିର୍ଦ୍ଦେଶାବଳୀ ପାଳନ କରିବାକୁ ମଧ୍ୟ ଅନୁରୋଧ କରିଛନ୍ତି। କୁଏତ ସାମରିକ ବାହିନୀ ଏକ ବିବୃତି କହିଛି ଯେ, ଜାତୀୟ ସୁରକ୍ଷା ବଜାୟ ରଖିବା ପାଇଁ ସମସ୍ତଙ୍କ ସହଯୋଗ ଆବଶ୍ୟକ।
ସୌଜନ୍ୟ ସମ୍ବାଦ