Kudankulam: କୁଡନକୁଲମ ପରମାଣୁ କେନ୍ଦ୍ରର ଲିକ୍ ଫାଇଲକୁ ନେଇ ଏନ୍ପିସିଆଇଏଲ୍ର ସ୍ପଷ୍ଟୀକରଣ, ସୁରକ୍ଷା ବ୍ୟବସ୍ଥା ପ୍ରଭାବିତ ହୋଇନାହିଁ
ତାମିଲନାଡୁର କୁଡନକୁଲମ ପରମାଣୁ ଶକ୍ତି କେନ୍ଦ୍ର (କେକେଏନ୍ପିପି) ସମ୍ପର୍କିତ କିଛି ଫାଇଲ ଇଣ୍ଟରନେଟ୍ରେ ଲିକ୍ ହୋଇଥିବା ଖବର ପରେ ନ୍ୟୁକ୍ଲିୟର ପାୱାର କର୍ପୋରେସନ ଅଫ୍ ଇଣ୍ଡିଆ ଲିମିଟେଡ୍ (ଏନ୍ପିସିଆଇଏଲ୍) ସ୍ପଷ୍ଟୀକରଣ ଦେଇଛି।
ଚେନ୍ନାଇ: ତାମିଲନାଡୁର କୁଡନକୁଲମ ପରମାଣୁ ଶକ୍ତି କେନ୍ଦ୍ର (କେକେଏନ୍ପିପି) ସମ୍ପର୍କିତ କିଛି ଫାଇଲ ଇଣ୍ଟରନେଟ୍ରେ ଲିକ୍ ହୋଇଥିବା ଖବର ପରେ ନ୍ୟୁକ୍ଲିୟର ପାୱାର କର୍ପୋରେସନ ଅଫ୍ ଇଣ୍ଡିଆ ଲିମିଟେଡ୍ (ଏନ୍ପିସିଆଇଏଲ୍) ସ୍ପଷ୍ଟୀକରଣ ଦେଇଛି। କମ୍ପାନି କହିଛି, ଲିକ୍ ହୋଇଥିବା ଫାଇଲଗୁଡ଼ିକର ପରମାଣୁ କେନ୍ଦ୍ରର ସୁରକ୍ଷା କିମ୍ବା ନିରାପତ୍ତା ବ୍ୟବସ୍ଥା ସହ କୌଣସି ସମ୍ପର୍କ ନାହିଁ। ତେଣୁ କେନ୍ଦ୍ରର କାର୍ଯ୍ୟକଳାପ କିମ୍ବା ସୁରକ୍ଷାକୁ ନେଇ ଚିନ୍ତିତ ହେବାର କୌଣସି କାରଣ ନାହିଁ।
ଏନ୍ପିସିଆଇଏଲ୍ କହିଛି, ସାମାଜିକ ଗଣମାଧ୍ୟମ ଓ କିଛି ଅନ୍ଲାଇନ୍ ମଞ୍ଚରେ ପ୍ରଚାରିତ ହେଉଥିବା ଫାଇଲଗୁଡ଼ିକ କେବଳ ପ୍ରଶାସନିକ ଓ ସାଧାରଣ ପ୍ରକୃତିର ଦସ୍ତାବିଜ। ଏଥିରେ ପରମାଣୁ ରିଆକ୍ଟରର ଡିଜାଇନ୍, ସୁରକ୍ଷା ବ୍ୟବସ୍ଥା, ନିରାପତ୍ତା ପ୍ରୋଟୋକଲ୍ କିମ୍ବା କୌଣସି ସମ୍ବେଦନଶୀଳ ପ୍ରଯୁକ୍ତିଗତ ସୂଚନା ନାହିଁ। କମ୍ପାନି ଆହୁରି କହିଛି, କୁଡନକୁଲମ ପରମାଣୁ ଶକ୍ତି କେନ୍ଦ୍ରର ସମସ୍ତ ଗୁରୁତ୍ୱପୂର୍ଣ୍ଣ ଓ ସମ୍ବେଦନଶୀଳ ତଥ୍ୟ ବହୁସ୍ତରୀୟ ସାଇବର ସୁରକ୍ଷା ବ୍ୟବସ୍ଥା ମାଧ୍ୟମରେ ସୁରକ୍ଷିତ ରଖାଯାଇଛି।
ପରମାଣୁ କେନ୍ଦ୍ରର ନିୟନ୍ତ୍ରଣ ବ୍ୟବସ୍ଥା ବାହ୍ୟ ଇଣ୍ଟର୍ନେଟ୍ ନେଟ୍ୱର୍କ ସହ ଯୋଡ଼ି ହୋଇ ନ ଥିବାରୁ ସାଇବର ଆକ୍ରମଣ କିମ୍ବା ତଥ୍ୟ ଚୋରିର ଆଶଙ୍କା ନାହିଁ ବୋଲି ଏହା ସ୍ପଷ୍ଟ କରିଛି। ଲିକ୍ ହୋଇଥିବା ଫାଇଲଗୁଡ଼ିକ କିପରି ଇଣ୍ଟର୍ନେଟ୍ରେ ପହଞ୍ଚିଲା, ସେ ନେଇ ତଦନ୍ତ ଚାଲିଥିବା କମ୍ପାନି କହିଛି। ଆବଶ୍ୟକ ହେଲେ ସମ୍ପୃକ୍ତ ସଂସ୍ଥା ସହ ମିଶି ଏହାର ସମ୍ପୂର୍ଣ୍ଣ ଯାଞ୍ଚ କରାଯିବ ବୋଲି ମଧ୍ୟ ସୂଚନା ଦିଆଯାଇଛି। ଏନ୍ପିସିଆଇଏଲ୍ କହିଛି, କୁଡନକୁଲମ ପରମାଣୁ କେନ୍ଦ୍ରର ସମସ୍ତ ୟୁନିଟ୍ ନିର୍ଦ୍ଧାରିତ ସୁରକ୍ଷା ମାନଦଣ୍ଡ ଅନୁସାରେ ସ୍ୱାଭାବିକ ଭାବେ କାର୍ଯ୍ୟ କରୁଛି। ପରମାଣୁ ଶକ୍ତି ଉତ୍ପାଦନ କିମ୍ବା ପ୍ଲାଣ୍ଟର ସୁରକ୍ଷା ବ୍ୟବସ୍ଥା ଉପରେ ଏହି ଘଟଣାର କୌଣସି ପ୍ରଭାବ ପଡ଼ିନାହିଁ।
ସୌଜନ୍ୟ ସମ୍ବାଦ
