ଜୟପୁର(ରାଜସ୍ଥାନ), ୧୭।୭:ପିଲାମାନଙ୍କ ଏକ ସୁରକ୍ଷିତ ଭବିଷ୍ୟତ ଗଢ଼ିବା ପାଇଁ ମା’ବାପାମାନେ ଜୀବନରେ ବହୁ ତ୍ୟାଗ କରିଥାନ୍ତି। ନିଜେ କଷ୍ଟ ସହୁଥିଲେ ସୁଦ୍ଧା ପିଲାମାନଙ୍କୁ ଏହାର ଅନୁଭବ ହେବାକୁ ଦେଇ ନ ଥାନ୍ତି। ହେଲେ ବେଳେବେଳେ ପିଲାମାନଙ୍କ କାର୍ଯ୍ୟକଳାପ ଏଭଳି ନିଷ୍ଠୁର ହୋଇଥାଏ, ଯାହାକି ସହଜରେ କେହି ବିଶ୍ୱାସ କରିପାରନ୍ତି ନାହିଁ। ଏବେ ରାଜସ୍ଥାନ ଜୟପୁରରେ ଜଣେ ୨୩ବର୍ଷୀୟା ଯୁବତୀ ମା’ଙ୍କ ସମ୍ପତ୍ତି ଏବଂ ସରକାରୀ ଚାକିରି ହାତେଇବା ପାଇଁ ସୁପାରି ଦେଇ ହତ୍ୟା ଯୋଜନା କରିଥିବା ଜଣାପଡ଼ିଛି।
ସୂଚନା ଅନୁଯାୟୀ, ୪୫ ବର୍ଷୀୟା ନୀରଜ ଶର୍ମା ପୂର୍ବରୁ ଅନେକ କଷ୍ଟ ସହିଥିଲେ। ଗତବର୍ଷ ସ୍ବାମୀଙ୍କୁ ହରାଇବା ପରେ, ସେ ପରିବାର ପ୍ରତିପୋଷଣ ପାଇଁ ଅନୁକମ୍ପାମୂଳକ ଭାବେ ଏକ ସରକାରୀ ଲୋୟର ଡିଭିଜନ କ୍ଲର୍କ ଚାକିରି କରିଥିଲେ। ନିଜ ପିଲାଙ୍କୁ ମଣିଷ କରିବା ପାଇଁ ସେ ଦିନରାତି ଚେଷ୍ଟା କରୁଥିଲେ। ହେଲେ ନୀରଜଙ୍କ ୨୩ ବର୍ଷୀୟା ଝିଅ ଆୟୁଷୀ ଶର୍ମା ନିଜର କିଛି ସମ୍ପର୍କୀୟ ଏବଂ ଭଡ଼ାଟିଆ ଅପରାଧୀଙ୍କ ସହାୟତାରେ ମା’ଙ୍କୁ ହତ୍ୟା କରିବାର ଯୋଜନା କରିଥିଲେ। ସୂଚନା ଅନୁସାରେ ଆୟୁଶୀ ମା’ଙ୍କୁ ହତ୍ୟା କରିବାକୁ ସୁପାରି କିଲରଙ୍କୁ ପ୍ରାୟ ୭ ଲକ୍ଷ ଟଙ୍କା ଦେଇଥିଲେ। ଯୋଜନା ଅନୁସାରେ ସେମାନେ ଗତ ୩ ତାରିଖରେ ଜୟପୁରର ପ୍ରତାପ ନଗର ଅଞ୍ଚଳରେ ନୀରଜଙ୍କୁ ଏକ ସ୍କର୍ପିଓ ଏସ୍ୟୁଭି ଗାଡ଼ି ଦ୍ୱାରା ଧକ୍କା ଦେଇ ହତ୍ୟା କରିଥିଲେ। ପ୍ରଥମେ ଏହାକୁ ଏକ ଦୁର୍ଘଟଣାଜନିତ ମୃତ୍ୟୁ ବୋଲି ସମସ୍ତେ ଭାବୁଥିଲେ। ହେଲେ ତଦନ୍ତ ସମୟରେ ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ଜଣାପଡ଼ିଥିଲା। ଏହି ମାମଲାରେ ବର୍ତ୍ତମାନ ସୁଦ୍ଧା ୭ ଜଣଙ୍କୁ ଗିରଫ କରାଯାଇଥିବା ବେଳେ ଅନ୍ୟ ଜଣେ ଅଭିଯୁକ୍ତ ଫେରାର ଅଛନ୍ତି। ତଦନ୍ତକାରୀ ଅଧିକାରୀଙ୍କ କହିବାନୁସାରେ ପାରିବାରିକ ସମ୍ପତ୍ତି ବିବାଦ ଏବଂ ସେହି ସରକାରୀ ଚାକିରି ପାଇବାର ଲୋଭ ହିଁ ଏହି ଷଡ଼ଯନ୍ତ୍ରର ମୂଳ କାରଣ ଥିଲା। ସିସିଟିଭି ଫୁଟେଜ୍ ଏବଂ ପରବର୍ତ୍ତୀ ଅନୁସନ୍ଧାନ ପରେ ପ୍ରଥମେ ଏକ ଦୁର୍ଘଟଣା ଜଣାପଡ଼ୁଥିବା ଏହି ଘଟଣାର ଅସଲ ରହସ୍ୟ ପଦାକୁ ଆସିଥିଲା।
ସୌଜନ୍ୟ ଧରିତ୍ରୀ
