ପ୍ରେମିକା ପାଇଁ ଗଲା ପ୍ରେମିକର ଜୀବନ! ହତ୍ୟା ଅଭିଯୋଗ ଆଣିଲେ ପରିବାର ଲୋକେ

ବାଣପୁର: ପ୍ରେମିକା ପାଇଁ ଗଲା ପ୍ରେମିକର ଜୀବନ। ୧୫ ଦିନ ପରେ ଗାଁକୁ ଆସିଲା ମର ଶରୀର। ପୁଅକୁ ପ୍ରେମିକା ଓ ତାଙ୍କ ବଡ଼ ଭଉଣୀ ମାରିଦେଇଥିବା ଅଭିଯୋଗ ଆଣିଲେ ମୃତକଙ୍କ ପରିବାର ଲୋକ। ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଦାମିଆଁ ବରବରା ପଞ୍ଚାୟତ ବାଲିକଣିଆ ଗାଁରେ ଘଟିଛି ଘଟଣା। ଗାଁର ଲକ୍ଷ୍ମଣ ଶବରଙ୍କ ପୁଅ ଦେବରାଜ ଶବର ସେହି ଗ୍ରାମର ଜଣେ ଯୁବତୀଙ୍କୁ ଭଲ ପାଉଥିଲେ।

ତେବେ ପରିବାର ଲୋକେ ଏହି ବିବାହରେ ରାଜି ନଥିଲେ। ତେଣୁ ଦୁହେଁ ମିଶି ମହାରାଷ୍ଟ୍ର ଚାଲିଯାଇଥିଲେ । ସେଠାରେ ପ୍ରେମିକାର ବଡ ଭଉଣୀ ସହ ରହିଥିଲେ । ଗତମାସରେ ଘରକୁ ଫେରିବା ପାଇଁ କହିବାରୁ ପରିବାର ଲୋକେ ଫୋନ ପେ ଜରିଆରେ ୨ ହଜାର ଟଙ୍କା ପଠାଇଥିଲେ। ତେବେ ତା ପରଦିନ ଦେବ ଆତ୍ମହତ୍ୟା କରିଥିବା ଖବର ଆସିଥିଲା ।

ଦେବରାଜର ମର ଶରୀରକୁ ବ୍ୟବଛେଦ କରାଯାଇ ମହାରାଷ୍ଟ୍ରରୁ ବାଣପୁରକୁ ଅଣାଯାଇଛି । ତାଙ୍କୁ ପ୍ରେମିକା ଓ ତାଙ୍କ ଭଉଣୀ ମିଶି ମାରି ଦେଇଥିବା ବାଣପୁର ଥାନାରେ ମୃତ ଦେବରାଜଙ୍କ ବଡ଼ଭାଇ ଅଭିଯୋଗ କରିଛନ୍ତି । ପୋଲିସ୍ ଘଟଣାର ତଦନ୍ତ ଆରମ୍ଭ କରିଛି ।