US plane in Moscow: ମସ୍କୋରେ ଆମେରିକା ବିମାନ: ଶେଷ ହେବ କି ରୁଷ୍‌-ୟୁକ୍ରେନ ଯୁଦ୍ଧ?

ୱାସିଂଟନ: ଆମେରିକା ବାୟୁସେନାର ଏକ ପ୍ରମୁଖ ସାମରିକ ପରିବହନ ବିମାନ ମଙ୍ଗଳବାର ହଠାତ୍ ମସ୍କୋର ଭ୍ନୁକୋଭୋ ବିମାନବନ୍ଦରରେ  ଅବତରଣ କରିବା ପରେ ଅନ୍ତର୍ଜାତୀୟ ସ୍ତରରେ ଚାଞ୍ଚଲ୍ୟ ସୃଷ୍ଟି ହୋଇଛି। ତେବେ ଏହି ରହସ୍ୟମୟ ସାମରିକ ବିମାନର ଆଗମନ ସମ୍ପର୍କରେ ସେମାନଙ୍କ ନିକଟରେ କୌଣସି ସୂଚନା ନାହିଁ ବୋଲି ରୁଷ୍‌ ରାଷ୍ଟ୍ରପତି ଭବନ ପକ୍ଷରୁ ଦାବି କରାଯାଇଛି। ବିମାନ ଚଳାଚଳ ଉପରେ ନଜର ରଖୁଥିବା ୱେବସାଇଟ୍ ‘ଫ୍ଲାଇଟ୍‌ ରାଡାର୨୪’ର ତଥ୍ୟ ଅନୁଯାୟୀ, ଆମେରିକାରେ ପଞ୍ଜୀକୃତ ବୋଇଂ ସି-୧୭ଏ ଗ୍ଲୋବ୍‌ମାଷ୍ଟର-୩ ବିମାନ ଲାଟାଭିଆର ରିଗା ସହରରୁ ବାହାରି   ସକାଳ ପ୍ରାୟ ୭ଟାରେ ମସ୍କୋରେ ପହଞ୍ଚିଥିଲା। ଏ ସମ୍ପର୍କରେ କ୍ରେମ୍‌ଲିନର ପ୍ରେସ୍ ସଚିବ ଡିମିତ୍ରି ପେସ୍‌କୋଭ ସାମ୍ବାଦିକମାନଙ୍କୁ କହିଛନ୍ତି ଯେ ଚଳିତ ସପ୍ତାହରେ ଆମେରିକା ପ୍ରଶାସନର କୌଣସି ପ୍ରତିନିଧିଙ୍କ ସହ ବୈଠକ କରିବା ନେଇ କୌଣସି ପୂର୍ବ ନିର୍ଦ୍ଧାରିତ ଯୋଜନା ନାହିଁ। କିନ୍ତୁ ତଥ୍ୟ ଅନୁଯାୟୀ, ଏହି ବିମାନଟି  ଅଗଷ୍ଟ ୨୩ ତାରିଖରେ ୱାସିଂଟନ ନିକଟସ୍ଥ ମେରିଲ୍ୟାଣ୍ଡର ମିଳିତ ସାମରିକ ବେସ୍ ଆଣ୍ଡ୍ରୁଜ୍‌ରୁ ବାହାରି ପ୍ରଥମେ ରିଗାରେ ପହଞ୍ଚିଥିଲା, ଯେଉଁ ବେସ୍‌କୁ ସାଧାରଣତଃ ଆମେରିକା ରାଷ୍ଟ୍ରପତି ଏବଂ ବରିଷ୍ଠ ଅଧିକାରୀମାନେ ବ୍ୟବହାର କରିଥାନ୍ତି।

ସୌଜନ୍ୟ ସମ୍ବାଦ