Oil Deal: ଇରାନ ସହିତ ୧୧୯ ନିୟୁତ ଡଲାରର ତୈଳ ଚୁକ୍ତି ପଡ଼ିଲା ମହଙ୍ଗା: ୪ ଭାରତୀୟ କମ୍ପାନି ଏବଂ ୩ ବ୍ୟକ୍ତି ବିଶେଷ କଳାତାଲିକାଭୁକ୍ତ
ଆମେରିକା ଏବଂ ଇରାନ ମଧ୍ୟରେ ବୃଦ୍ଧି ପାଉଥିବା ରାଜନୈତିକ ଉତ୍ତେଜନା ମଧ୍ୟରେ,ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଶାସନ ଏକ ବଡ଼ ପଦକ୍ଷେପ ନେଇଛନ୍ତି।
ୱାସିଂଟନ: ଆମେରିକା ଏବଂ ଇରାନ ମଧ୍ୟରେ ବୃଦ୍ଧି ପାଉଥିବା ରାଜନୈତିକ ଉତ୍ତେଜନା ମଧ୍ୟରେ,ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଶାସନ ଏକ ବଡ଼ ପଦକ୍ଷେପ ନେଇଛନ୍ତି। ଏହା ଅନ୍ତର୍ଗତ ଆମେରିକା ସରକାର ଇରାନର ଆର୍ଥିକ ଉତ୍ସ ବନ୍ଦ କରିବା ପାଇଁ ଚାରିଟି ଭାରତୀୟ କମ୍ପାନି ଉପରେ ପ୍ରତିବନ୍ଧକ ଘୋଷଣା କରିଛି। ଆମେରିକାର ଅର୍ଥ ସଚିବ ସ୍କଟ୍ ବେସେଣ୍ଟ ତେହେରାନକୁ ଆର୍ଥିକ ଭାବରେ ଏକଘରିକିଆ କରିବା ପାଇଁ ଏକ କଠୋର ନୂତନ ବିଶ୍ୱ ଅଭିଯାନ ଆରମ୍ଭ କରିଛନ୍ତି। ଇରାନକୁ ତେଲ ବାଣିଜ୍ୟରୁ ମିଳୁଥିବା ବିପୁଳ ରାଜସ୍ୱକୁ ରୋକିବା ପାଇଁ ଭାରତୀୟ କମ୍ପାନିଗୁଡ଼ିକୁ କଳାତାଲିକାଭୁକ୍ତ କରାଯାଇଛି। ଆମେରିକାର ବୈଦେଶିକ ବିଭାଗ ମୁଖପାତ୍ର ଟମି ପିଗଟ୍ଙ୍କ ଅନୁଯାୟୀ, ଏହି ଭାରତୀୟ କମ୍ପାନିଗୁଡ଼ିକ ଇରାନରୁ ଅଶୋଧିତ ତୈଳ ଏବଂ ପେଟ୍ରୋକେମିକାଲ୍ ଉତ୍ପାଦର ବେଆଇନ ଆମଦାନିରେ ସାମିଲ ଅଛନ୍ତି।
ଭାରତୀୟ ନାଗରିକମାନଙ୍କୁ ମଧ୍ୟ ଟାର୍ଗେଟ
ଅଭିଯୋଗ ହୋଇଛି ଯେ, ଏହି କମ୍ପାନିଗୁଡ଼ିକ ଇରାନର ରାଷ୍ଟ୍ରାୟତ୍ତ ତୈଳ ନେଟୱାର୍କ ସହିତ ମିଳିତ ଭାବରେ ପ୍ରାୟ ୧୧୯ ନିୟୁତ ଡଲାର ମୂଲ୍ୟର ବାଣିଜ୍ୟ କାରବାର କରିଥିଲେ। ଏହି କାର୍ଯ୍ୟାନୁଷ୍ଠାନରେ କମ୍ପାନିଗୁଡ଼ିକ ସହିତ ଜଡିତ ଭାରତୀୟ ନାଗରିକମାନଙ୍କୁ ମଧ୍ୟ ଟାର୍ଗେଟ କରାଯାଇଛି। ଆମେରିକାର ଏହି ନିଷ୍ପତ୍ତି ପରଠାରୁ, ଭାରତୀୟ ବଜାରରେ ସଙ୍କଟ ବଢ଼ିବାରେ ଲାଗିଛି। ଆମେରିକାର ବିଦେଶ ବିଭାଗ ଅନୁଯାୟୀ, ଏହି ବେଆଇନ କାରବାରରେ ସଦାଶିବ ଓଭରସିଜ୍, ପିପି ସଫ୍ଟଟେକ୍, ପ୍ରକୃତିସ୍ ଇନଫ୍ରା, ଏବଂ କଷ୍ଟମ୍ସ ବ୍ରୋକର୍ ପୋର୍ଟେଜ୍ ପାର୍ଟନର୍ସ ଏଲଏଲପି ଆଦି ଚାରୋଟି ଭାରତୀୟ କମ୍ପାନି ସିଧାସଳଖ ସମ୍ପୃକ୍ତ ଅଛନ୍ତି।
ସେଥିମଧ୍ୟରୁ, ସଦାଶିବ ଓଭରସିଜ୍ ଲିମିଟେଡ୍ ଫେବ୍ରୁଆରି ୨୦୨୪ ରୁ ଜୁନ୍ ୨୦୨୫ ମଧ୍ୟରେ ଇରାନରୁ ପ୍ରାୟ ୬୯ ନିୟୁତ ଡଲାର ମୂଲ୍ୟର ତେଲ ଆମଦାନି କରିଥିଲା। ପିପି ସଫ୍ଟଟେକ୍ ଏବଂ ପ୍ରକୃତିସ ଇନଫ୍ରା ମଧ୍ୟ ଇରାନର ରାଷ୍ଟ୍ରାୟତ୍ତ ତୈଳ ନେଟୱାର୍କରୁ ପ୍ରାୟ ୨୫ ନିୟୁତ ଡଲାର ମୂଲ୍ୟର ପେଟ୍ରୋଲିୟମ୍ ଉତ୍ପାଦ କିଣିଥିଲା। ଏହା ସହିତ, ପୋର୍ଟେଜ୍ ପାର୍ଟନର୍ସ ଏଲଏଲପି ବିରୋଧରେ ଇରାନରୁ ଭାରତକୁ ଅନେକ ପେଟ୍ରୋକେମିକାଲ୍ ଉତ୍ପାଦର ପଠାଣକୁ ସହଜ କରିବା ପାଇଁ କଷ୍ଟମ୍ସ ବ୍ରୋକର ଭାବରେ କାର୍ଯ୍ୟ କରିବାର ଅଭିଯୋଗ ରହିଛି। କାର୍ଯ୍ୟାନୁଷ୍ଠାନରେ ଟାର୍ଗେଟ ହୋଇଥିବା ତିନି ଜଣ ଭାରତୀୟ ନାଗରିକଙ୍କ ମଧ୍ୟରେ ପୋର୍ଟେଜ୍ ପାର୍ଟନରର ଇନ୍ଦ୍ରିସମିୟା ଆଶ୍ରଫମିଆଁ ଶେଖ୍ ଏବଂ ହରିଶ ରାମଚନ୍ଦ୍ର ରଙ୍ଗି ଅଛନ୍ତି। ପିପି ସଫ୍ଟଟେକର ନିର୍ଦ୍ଦେଶକ ପ୍ରଶାନ୍ତ ଗର୍ଗଙ୍କୁ ମଧ୍ୟ ଜାଣିଶୁଣି ଏହି ବେଆଇନ ତୈଳ ବାଣିଜ୍ୟରେ ଲିପ୍ତ ରହିଥିବା ଯୋଗୁଁ ଆମେରିକାର ବୈଦେଶିକ ବିଭାଗ ଦ୍ୱାରା କଳାତାଲିକାଭୁକ୍ତ କରାଯାଇଛି । ଟ୍ରମ୍ପ ପ୍ରଶାସନ ଅନ୍ୟ ଦେଶଗୁଡ଼ିକୁ ମଧ୍ୟ ଏକ ନିର୍ଦ୍ଧାରିତ ସମୟସୀମା ମଧ୍ୟରେ ତେହେରାନ ସହିତ ସେମାନଙ୍କର ବାଣିଜ୍ୟ ସମ୍ପର୍କ ସମ୍ପୂର୍ଣ୍ଣ ଭାବରେ ସମାପ୍ତ କରିବାକୁ ଚେତାବନୀ ଦେଇଛନ୍ତି।
ସୌଜନ୍ୟ ସମ୍ବାଦ
