Theft Case Verdict ରେକର୍ଡ ୧୮ ଦିନରେ ଚୋରି ମାମଲାର ରାୟ, ଆସାମୀକୁ ୧ ବର୍ଷ କାରାଦଣ୍ଡ
ଭୁବନେଶ୍ୱରରେ ଏକ ଚୋରି ମାମଲାର ମାତ୍ର ୧୮ ଦିନରେ ରାୟ ପ୍ରକାଶ ପାଇଛି। ଆସାମୀ ସୁନୀଲ ସେଠୀକୁ ୧ ବର୍ଷ କାରାଦଣ୍ଡ ସହ ୫ ହଜାର ଟଙ୍କା ଜରିମାନା କରିଛନ୍ତି ଜେଏମ୍ଏଫ୍ସି-୪ କୋର୍ଟ।
ଭୁବନେଶ୍ବର(ସରିତଦୀପ ଶତପଥୀ): ଚଳିତ ମାସ ୮ତାରିଖ ରାତିରେ ବଡ଼ଗଡ଼ ଥାନା ଅଞ୍ଚଳରେ ହୋଇଥିବା ଏକ ଚୋରି ମାମଲାର ରାୟ ମାତ୍ର ରେକର୍ଡ ୧୮ ଦିନରେ ପ୍ରକାଶ ପାଇଛି। ଭୁବନେଶ୍ବର ଜେଏମ୍ଏଫ୍ସି-୪ ବିଚାରପତି ସୋମେଶ ସୌମ୍ୟଜିତ ପଣ୍ଡା ମାମଲାର ଶୁଣାଣି ଶେଷ କରି ଆସାମୀ ସୁନୀଲ ସେଠୀକୁ ୧ ବର୍ଷର କାରାଦଣ୍ଡ ସହିତ ୫,୦୦୦ ଟଙ୍କା ଜରିମାନା ଆଦେଶ ଶୁଣାଇଛନ୍ତି।
ଏହି ମାମଲାରେ ବଡ଼ଗଡ଼ ଥାନା ପୁଲିସ ମାତ୍ର ୫ଦିନରେ ଚାର୍ଜସିଟ୍ ଦାଖଲ କରିଥିଲା। କୋର୍ଟରେ ୧୭ତାରିଖରୁ ସାକ୍ଷ୍ୟ ଗ୍ରହଣ ଆରମ୍ଭ ହୋଇଥିଲା। ୯ଜଣ ସାକ୍ଷୀ ଓ ୧୫ଟି ପ୍ରଯୁଜ୍ୟ ଦସ୍ତାବିଜ ଆଧାରରେ କୋର୍ଟ ତ୍ବରିତ ଶୁଣାଣି କରି ରାୟ ପ୍ରକାଶ କରିଛନ୍ତି। ସହକାରୀ ପବ୍ଲିକ୍ ପ୍ରସିକ୍ୟୁଟର ନିରଞ୍ଜନ ବେହେରା ଏହି ମାମଲାକୁ ପରିଚାଳନା କରିଥିଲେ।
ଭୁବନେଶ୍ୱର ଟଙ୍କାପାଣି ରୋଡ୍ ଓ ପୁରୀ ବାଇପାସ୍ ରାସ୍ତା ନିକଟରେ ଅବିନାଶ ପ୍ରୀତମ ନାୟକଙ୍କର ଏକ କାର୍ କେୟାର୍ ସଂସ୍ଥା ରହିଛି। ସେଠାରେ କାମ କରୁଥିବା ୭/୮ ଜଣ କର୍ମଚାରୀଙ୍କ ଭିତରେ ସୁନୀଲ ମଧ୍ୟ ଥିଲା। ଅଗଷ୍ଟ ୮ ତାରିଖ ରାତି ପ୍ରାୟ ସାଢ଼େ ୨ଟା ସମୟରେ ସମସ୍ତ କର୍ମଚାରୀ ଶୋଇଥିବା ବେଳେ ସୁନୀଲ ୫ଟି ମୋବାଇଲ୍ ଫୋନ୍ ଓ ଗୋଟିଏ ବାଇକ୍ ନେଇ ଫେରାର ହୋଇଯାଇଥିଲା। ପରଦିନ ସକାଳୁ ଅବିନାଶ ବଡ଼ଗଡ଼ ଥାନାରେ ଏତଲା ଦେଇଥିଲେ। ପୁଲିସ ସିସିଟିଭି ଫୁଟେଜ୍ ଯାଞ୍ଚ କରିଥିଲା ଏବଂ ସୁନୀଲ ହିଁ ଏହି କାଣ୍ଡ କରିଛି ବୋଲି ଜଣାପଡ଼ିଥିଲା। ୯ ତାରିଖ ଦିନ ବଡ଼ଗଡ଼ ଥାନା ପୁଲିସ ବାଲେଶ୍ଵର ଖଇରା ଥାନା ମୁହଁଚୁଆଁ ଗ୍ରାମରେ ଚଢ଼ଉ କରି ସୁନୀଲକୁ ଗିରଫ କରିଥିଲା ଏବଂ ତା’ଠାରୁ ୫ଟିଯାକ ମୋବାଇଲ୍ ଓ ବାଇକ୍ ଜବତ କରିଥିଲା।
ସୌଜନ୍ୟ ସମ୍ବାଦ
