Puri canal: ପୁରୀ କେନାଲରୁ ମିଳିଲା ନିଖୋଜ ମହିଳାଙ୍କ ମୃତଦେହ: ହତ୍ୟା ଅଭିଯୋଗ ଆଣିଲେ ଝିଅ
ରବିବାରଠାରୁ ନିଖୋଜ ହୋଇଯାଇଥିବା ଜଣେ ମହିଳାଙ୍କ ଗଳିତ ମୃତଦେହ ଆଜି ପୁରୀ କେନାଲରୁ ମିଳିଛି। ବାଲିଅନ୍ତା ଥାନା ସତ୍ୟଭାମାପୁର ଅଲାରପୁର ସାଇଫନ୍ ନିକଟରୁ ଅଗ୍ନିଶମ ବାହିନୀ ମୃତଦେହକୁ ପାଣିରୁ ବାହାର କରି ପୁଲିସ ଜିମା ଦେଇଛି।
ବାଲିଅନ୍ତା ବଜାର/ବାଲିଅନ୍ତା: ରବିବାରଠାରୁ ନିଖୋଜ ହୋଇଯାଇଥିବା ଜଣେ ମହିଳାଙ୍କ ଗଳିତ ମୃତଦେହ ଆଜି ପୁରୀ କେନାଲରୁ ମିଳିଛି। ବାଲିଅନ୍ତା ଥାନା ସତ୍ୟଭାମାପୁର ଅଲାରପୁର ସାଇଫନ୍ ନିକଟରୁ ଅଗ୍ନିଶମ ବାହିନୀ ମୃତଦେହକୁ ପାଣିରୁ ବାହାର କରି ପୁଲିସ ଜିମା ଦେଇଛି। ମୃତ ମହିଳା ହେଲେ କଟକ ମଧୁପାଟଣା ଥାନା ନୂଆପଡ଼ାର ବାସିନ୍ଦା ସ୍ବର୍ଗତ ହେମନ୍ତ ପାଣିଙ୍କ ପତ୍ନୀ ରୀନା ପାଣି(୫୪)। ବାଲିଅନ୍ତା ଥାନା ପୁଲିସ ମୃତଦେହକୁ କ୍ୟାପିଟାଲ ହସ୍ପିଟାଲ୍ରେ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି। ରୀନାଙ୍କ ମୃତ୍ୟୁକୁ ନେଇ ସନ୍ଦେହ ଉପୁଜିଛି। ସେ ଆତ୍ମହତ୍ୟା କରିଛନ୍ତି କି ଅନ୍ୟ କୌଣସି କାରଣରୁ ତାଙ୍କର ମୃତ୍ୟୁ ହୋଇଛି, ତାହାକୁ ନେଇ ପୁଲିସ ଖୋଳତାଡ଼ କରୁଥିବା ଜଣାପଡ଼ିଛି। ସିସିଟିଭି ଫୁଟେଜ୍ରୁ କିଛି ସୁରାକ ମିଳିବା ଆଶା ଥିବାରୁ ପୁଲିସ ସେହିଦିଗରେ ତଦନ୍ତ କରୁଥିବା ସୂଚନା ମିଳିଛି। ବ୍ୟବଚ୍ଛେଦ ରିପୋର୍ଟକୁ ମଧ୍ୟ ପୁଲିସ ଅପେକ୍ଷା କରିଛି। ଝିଅ ସୁଭଦ୍ରା ହତ୍ୟା ଅଭିଯୋଗ ଆଣିଥିଲେ ହେଁ ପୁଲିସ ପ୍ରାଥମିକ ପଦକ୍ଷେପ ଅନୁସାରେ ଅପମୃତ୍ୟୁ ମାମଲା ରୁଜୁ କରିଛି।
ସୌଜନ୍ୟ ସମ୍ବାଦ
