Doctor: ଅନୁଗୋଳରେ ଅଧା ଡାକ୍ତର ପଦ ଫାଙ୍କା: ରେଫରାଲ୍‌ କେନ୍ଦ୍ର ପାଲଟିଛି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର

ସ୍ବାସ୍ଥ୍ୟ ବିଭାଗର ସୂଚନା ଅନୁସାରେ, ଅନୁଗୋଳ ଜିଲ୍ଲାରେ ୯୭ ଜଣ ବିଶେଷଜ୍ଞ ଡାକ୍ତର ରହିବା କଥା। କିନ୍ତୁ, ଏବେ ୫୪ ଜଣ ଅଛନ୍ତି। ବହୁଦିନ ହେଲା ୪୩ଟି ପଦ ଖାଲିପଡ଼ିଛି। ସେହିପରି ଏମ୍‌ବିବିଏସ୍‌ ଡାକ୍ତରଙ୍କ ପାଇଁ ୩୯୭ଟି ଅନୁମୋଦିତ ପଦ ରହିଛି। ଏଥିରୁ ବର୍ତ୍ତମାନ ୨୦୧ ଜଣ ନିୟମିତ ଡାକ୍ତର କାର୍ଯ୍ୟ କରୁଛନ୍ତି। ୯ ଜଣଙ୍କୁ ଠିକାରେ ନିଯୁକ୍ତି ଦିଆଯାଇଛି। ଏମିତି ୨୧୦ ଜଣ ଡାକ୍ତର ରହିଥିଲା ବେଳେ ୧୮୭ଟି ଡାକ୍ତର ପଦ ଖାଲିପଡ଼ିଛି। ଅର୍ଥାତ୍‌, ଜିଲ୍ଲାରେ ଅନୁମୋଦିତ ପଦ ତୁଳନାରେ ୪୭ ପ୍ରତିଶତ ଡାକ୍ତର ନାହାନ୍ତି। ଏଣୁ ଆୟୁଷ ଡାକ୍ତର‌ରେ କାମ ଚଳାଇ ନେବାକୁ ପଡ଼ୁଛି। ସ୍ବାସ୍ଥ୍ୟ ବିଭାଗରେ କେବଳ ଡାକ୍ତର ଅଭାବ ରହିଛି ତାହା ନୁହେଁ। ପାରା ମେଡିକାଲ କର୍ମଚାରୀ, ନର୍ସ, ଟେକ୍‌ନିସିଆନ୍‌ ମଧ୍ୟ ଆବଶ୍ୟକତା ଅନୁଯାୟୀ ନାହାନ୍ତି। ଜିଲ୍ଲାରେ ୭୦୯ଟି ନର୍ସିଂ ଅଫିସର ପଦ ରହିଥିବା ବେଳେ ଏବେ ୩୧୮ଟି ପଦ ଖାଲିପଡ଼ିଛି। ଅର୍ଥାତ୍‌, ୪୫ ପ୍ରତିଶତ ନର୍ସ ନାହାନ୍ତି। ଫାର୍ମାସି ଅଫିସରଙ୍କ ପାଇଁ ୧୩୦ଟି ପଦ ରହିଥିବା ବେଳେ ଅଛନ୍ତି ୪୧ ଜଣ। ୮୯ଟି ପଦ ଖାଲି ରହିଛି। ରେଡିଓଗ୍ରାଫରଙ୍କ ପାଇଁ ୩୧ଟି ପଦ ରହିଥିଲେ ମଧ୍ୟ ଅଛନ୍ତି ମାତ୍ର ୯ ଜଣ। ଲ୍ୟାବ୍‌ ଟେକ୍‌ନିସିଆନର ୭୯ଟି ପଦରୁ ୩୮ଟି ପଦ ଫାଙ୍କା ପଡ଼ିଛି। ଏପଟେ ଅନେକ ବହୁମୁଖୀ ସ୍ବାସ୍ଥ୍ୟକର୍ମୀ ଓ ସୁପରଭାଇଜର ପଦରେ କାହାକୁ ନିଯୁକ୍ତି ମିଳିନି। ଏଥିପାଇଁ ଲୋକଙ୍କୁ ଉପଯୁକ୍ତ ସ୍ବାସ୍ଥ୍ୟସେବା ମିଳୁନି। ଏନେଇ ଅନୁଗୋଳ ସିଡିଏମ୍‌ଓ ଡା. ମଦନ ମୋହନ ପ୍ରଧାନ କହିଛନ୍ତି, ଡାକ୍ତର ଅଭାବ ନେଇ ସରକାରଙ୍କୁ ଅବଗତ କରାଯାଇଛି। ସରକାର ଏ ଦିଗରେ ପଦକ୍ଷେପ ନେବେ।