Nana Patekar: ମୃତ୍ୟୁ ପାଇଁ ପ୍ରସ୍ତୁତ ଥିଲେ ନାନା…ଫାର୍ମହାଉସ୍ରେ ଏକାଠି କରିଥିଲେ କାଠ, ଚକିତ ହୋଇଥିଲେ ସାଙ୍ଗ
ମୁମ୍ବାଇ,୦୯/୧୦; ନିଖୁଣ ଅଭିନୟ । ଅଲଗା ଅନ୍ଦାଜ୍ । ଦମ୍ଦାର ସ୍ୱର । ଥିଏଟରରୁ ସିନେ ପରଦାକୁ ସଫଳ ଯାତ୍ରା । ପରଦାର କ୍ରୋଧୀ, କ୍ରାନ୍ତିକାରୀ ଚରିତ୍ରରୁ ବାସ୍ତବ ଜୀବନର କ୍ରାନ୍ତିବୀର । କ୍ଷେତରୁ କାରଗିଲ ସୀମା । ସଂଘର୍ଷ ସହ ସମ୍ପର୍କ ଥିଲା ଅତି ନିବିଡ଼ । ସଂଘର୍ଷର ସେହି କଣ୍ଟକିତ ରାସ୍ତା ତାଙ୍କୁ ଦେଇଥିଲା ବିପୁଳ ସଫଳତା ଓ ଅଜସ୍ର ଖ୍ୟାତି । ସଂଘର୍ଷରୁ ଶିଖର ଛୁଇଁଥିବା ବଲିଉଡ୍ର କିମ୍ବଦନ୍ତୀ କଳାକାର ନାନା ପାଟେକର ଆଉ ନାହାନ୍ତି । ୭୫ ବର୍ଷ ବୟସରେ ଦୁନିଆକୁ ଅଲବିଦା କହିଛନ୍ତି ଷ୍ଟାର କଳାକାର । ହୃଦ୍ଘାତରେ ତାଙ୍କର ପରଲୋକ ଘଟିଛି । ଗୁରୁବାର ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଅନ୍ତିମ ସଂସ୍କାର ଶେଷ ହୋଇଛି । ମୃତ୍ୟୁ ପାଇଁ ସତେ ଯେମିତି ଏକଦମ ପ୍ରସ୍ତୁତ ଥିଲେ ନାନା । ତାଙ୍କ ଫାର୍ମହାଉସ୍ରେ ଏକାଠି କରିଥିଲେ କାଠ । ଯାହାକୁ ତାଙ୍କ ଘନିଷ୍ଠ ଏବଂ ବନ୍ଧୁ ଦେଖି ଆଶ୍ଚର୍ଯ୍ୟ ହୋଇଥିଲେ । ପ୍ରସିଦ୍ଧ ଫଟୋଗ୍ରାଫର ଅତୁଲ କସବେକର ନାନାଙ୍କୁ ମନେ ପକାଇ ଏକ କାହାଣୀ ସେୟାର କରିଛନ୍ତି, ଯାହା ବହୁତ ଭିନ୍ନ କାହାଣୀ କହିଥାଏ । ନାନା ନିଜ ଅନ୍ତିମ ସଂସ୍କାର ପାଇଁ କାଠ ରଖିଥିଲେ ଏବଂ ଏହାର କାରଣ ମଧ୍ୟ ଦେଇଥିଲେ ଯେ ଏହା ପ୍ରଥମେ ଆପଣଙ୍କୁ ହସାଇବ, ତା’ପରେ ଆଖି ଓଦା ହେବ ।
‘ମୋତେ ଶୁଖିଲା କାଠରେ ଜାଳିବ’- ‘ମୁଁ ଜାଣିଛି, କାଲି ମୁଁ ମରିଯିବି । ମୃତ୍ୟୁ ଉପରେ ମୋର ଭରସା ଅଛି । ତେଣୁ କୌଣସି ଜିନିଷରେ ମୋର ଇଚ୍ଛା ନାହିଁ । ଯେଉଁମାନେ ଭାବନ୍ତି ଆମେ କେବେ ମରିବୁନି, ଜୀବନ ସାରା ସେମାନେ କିଛି ନା କିଛି ଜୁଟାଇବାରେ ଲାଗିପଡ଼ିଥାନ୍ତି । ଅନ୍ତିମ ସଂସ୍କାର ପାଇଁ ୧୨ ମହଣ କାଠ ଦରକାର । ଶେଷ ସମୟରେ ମୋର ଏତିକି ହିଁ ସମ୍ପତ୍ତି ରହିବ । ସେହି କାଠ ମୁଁ ଆଗରୁ ସଂଗ୍ରହ କରି ରଖିଛି । ତାହାକୁ ଶୁଖାଇ ରଖିଛି । ମୋତେ ଓଦା କାଠରେ ନୁହେଁ, ଶୁଖିଲା କାଠରେ ଜାଳିବ’ । ୨୦୨୩ରେ ଏକ ସାକ୍ଷାତକାରେ ନାନା ଏହା କହିଥିଲେ । ଶୁଖିଲା କାଠରେ କାହିଁକି ଜଳାଯିବ ବୋଲି ପ୍ରଶ୍ନର ଉତ୍ତରରେ ନାନା କହିଥିଲେ, ଓଦା କାଠ ଜଳିଲେ ଧୂଆଁ ବାହାରିବ । ଏହି ଧୂଆଁ ତାଙ୍କ ମୃତଦେହ ସାମ୍ନାରେ ଥିବା ଲୋକଙ୍କ ଆଖିରେ ପଶିଲେ ଲୁହ ବାହାରିବ । ଏହାକୁ ଦେଖିଲେ ସଭିଏଁ ଭାବିବେ ସେମାନେ ମୋ ମୃତ୍ୟୁରେ କାନ୍ଦୁଛନ୍ତି । କିନ୍ତୁ ଶୁଖିଲା କାଠ ଜଳିଲେ ସେ ଜାଣିପାରିବେ କିଏ ସତରେ କାନ୍ଦୁଛି । କୌଣସି ପ୍ରକାର ଦେଖାଣିଆ କାମକୁ ସେ ପସନ୍ଦ କରୁ ନ ଥିଲେ । ସାକ୍ଷାତକାରରେ ନାନା କହିଥିଲେ, ମୃତ୍ୟୁର ୨/୪ ଦିନ ପରେ କେହି କାହାରିକୁ ମନେ ରଖନ୍ତିନି । ମୁଁ ଚାହେଁନି ମୋ ମୃତ୍ୟୁ ପରେ ପରିବାର ଲୋକ ମୋ ଫଟୋ ଲଗାନ୍ତୁ । ଜୀବନର ବାସ୍ତବତାକୁ ସେ ବେଶ୍ ପାଖରୁ ଜାଣିଥିଲେ । ତେଣୁ ସାଧାରଣ ଜୀବନ ବଞ୍ଚିବାକୁ ସେ ପସନ୍ଦ କରୁଥିଲେ । ଅତୁଲ କହିଛନ୍ତି ନାନା ତାଙ୍କୁ ତାଙ୍କ ଫାର୍ମହାଉସ୍ ବୁଲାଇଥିଲେ ।
ସୌଜନ୍ୟ ପ୍ରମେୟ
