Drishyam 3: ୫୦୦ କୋଟି ପାର୍ କଲା ‘ଦୃଶ୍ୟମ୍ ୩’, ସ୍ପେଶାଲ୍ ଟ୍ୟୁଜଡେ ଅଫର୍ରେ ବଢ଼ିଲା ଆୟ
ବଲିଉଡ୍ ଅଭିନେତା ଅଜୟ ଦେବଗନଙ୍କ ଅଭିନୀତ ସସ୍ପେନ୍ସ ଥ୍ରିଲର୍ ଫିଲ୍ମ ‘ଦୃଶ୍ୟମ୍ ୩: ଦି କନ୍କ୍ଲୁଜନ୍’ ବକ୍ସ ଅଫିସ୍ରେ ନୂଆ ରେକର୍ଡ କରିଛି। ରିଲିଜ୍ର ମାତ୍ର ୧୨ ଦିନ ମଧ୍ୟରେ ଏହି ଫିଲ୍ମର ବିଶ୍ୱବ୍ୟାପୀ ଆୟ ୫୦୦ କୋଟି ଟଙ୍କା ଅତିକ୍ରମ କରିଛି।
ନୂଆଦିଲ୍ଲୀ: ବଲିଉଡ୍ ଅଭିନେତା ଅଜୟ ଦେବଗନଙ୍କ ଅଭିନୀତ ସସ୍ପେନ୍ସ ଥ୍ରିଲର୍ ଫିଲ୍ମ ‘ଦୃଶ୍ୟମ୍ ୩: ଦି କନ୍କ୍ଲୁଜନ୍’ ବକ୍ସ ଅଫିସ୍ରେ ନୂଆ ରେକର୍ଡ କରିଛି। ରିଲିଜ୍ର ମାତ୍ର ୧୨ ଦିନ ମଧ୍ୟରେ ଏହି ଫିଲ୍ମର ବିଶ୍ୱବ୍ୟାପୀ ଆୟ ୫୦୦ କୋଟି ଟଙ୍କା ଅତିକ୍ରମ କରିଛି। ଏହା ସହ ଚଳିତ ବର୍ଷର ସଫଳ ହିନ୍ଦୀ ଫିଲ୍ମ ମଧ୍ୟରେ ଏହା ନିଜ ସ୍ଥାନ ମଜଭୁତ କରିଛି।
ଅକ୍ଟୋବର ୨ରେ ରିଲିଜ୍ ହୋଇଥିବା ଏହି ଫିଲ୍ମ ଆରମ୍ଭରୁ ବକ୍ସ ଅଫିସ୍ରେ ଭଲ ପ୍ରଦର୍ଶନ କରିଥିଲା। ପ୍ରଥମ ସପ୍ତାହରେ ଏହା ଭାରତରେ ୨୪୫.୫୦ କୋଟି ଟଙ୍କାର ନେଟ୍ ଆୟ କରିଥିଲା। ଦ୍ୱିତୀୟ ସପ୍ତାହରେ ମଧ୍ୟ ଦର୍ଶକଙ୍କ ଆଗ୍ରହ ଜାରି ରହିବାରୁ ଫିଲ୍ମଟି ଲଗାତାର ଭଲ ଆୟ କରିବାରେ ସଫଳ ହୋଇଛି।
‘ଦୃଶ୍ୟମ୍ ୩: ଦି କନ୍କ୍ଲୁଜନ୍’
ସୋମବାର ଆୟରେ ହ୍ରାସ ଦେଖାଦେବା ପରେ ମଙ୍ଗଳବାର ଫିଲ୍ମର କଲେକ୍ସନ୍ରେ ପୁଣି ବୃଦ୍ଧି ଘଟିଛି। ଅକ୍ଟୋବର ୧୩ରେ ଫିଲ୍ମଟି ଭାରତରେ ୮.୫୦ କୋଟି ଟଙ୍କାର ନେଟ୍ ଆୟ କରିଥିବା ଟ୍ରେଡ୍ ରିପୋର୍ଟରୁ ଜଣାପଡ଼ିଛି। ଏହା ପୂର୍ବଦିନର ୬ କୋଟି ଟଙ୍କା ଆୟ ତୁଳନାରେ ପ୍ରାୟ ୪୧.୭ ପ୍ରତିଶତ ଅଧିକ।
ମଙ୍ଗଳବାରରେ ଟିକେଟ୍ ମୂଲ୍ୟକୁ ନେଇ ଦିଆଯାଇଥିବା ସ୍ପେଶାଲ୍ ଟ୍ୟୁଜଡେ ଅଫର୍ ମଧ୍ୟ ଦର୍ଶକଙ୍କୁ ସିନେମା ହଲ୍କୁ ଆକର୍ଷିତ କରିଥିବା କୁହାଯାଉଛି। ଏହି ଦିନ ଫିଲ୍ମର ଭାରତୀୟ ନେଟ୍ କଲେକ୍ସନ୍ ୩୨୩.୫୦ କୋଟି ଟଙ୍କାରେ ପହଞ୍ଚିଛି। ଭାରତର ଗ୍ରସ୍ ଆୟ ୩୮୭.୮୦ କୋଟି ଟଙ୍କା ରହିଥିବା ବେଳେ ବିଦେଶରୁ ୧୧୪ କୋଟି ଟଙ୍କା ଆୟ ହୋଇଛି।
ସୌଜନ୍ୟ ସମ୍ବାଦ
