Durga Immersion: ଆଜି ୬ଟି ସ୍ଥାନରେ ହେବ ମା’ଜଗତଜନନୀଙ୍କ ଭସାଣି ଉତ୍ସବ, ପାରମ୍ପରିକ ବାଜା ଓ ରୋଶଣିରେ ଦୁଲୁକିବ ସହର, DJ ବାଜିଲେ ହେବ ଆକ୍ସନ୍
ଭୁବନେଶ୍ୱର, ୨୨/୧୦: ବିଜୟା ଦଶମୀ ସହ ସରିଲା ମା’ଜଗତଜନନୀଙ୍କ ପୂଜା । ଆଜି ମେଲାଣି ନେବେ ମା’ । ଏଥିପାଇଁ ପ୍ରସ୍ତୁତି ଆରମ୍ଭ ହୋଇଛି । ଭସାଣି ପାଇଁ ରାଜଧାନୀର ୬ଟି ସ୍ଥାନରେ ଅସ୍ଥାୟୀ ବିସର୍ଜନ ସ୍ଥଳୀ କରାଯାଇଛି । ଭସାଣି ଉତ୍ସବ ପାଇଁ ୪୮ ପ୍ଲାଟୁନ ପୁଲିସ ଫୋର୍ସ ଏବଂ ୧୦୦ ଅଫିସର ନିୟୋଜିତ ହେବେ । ଭସାଣି ଉତ୍ସବରେ ଡିଜେ ବାଜିବାକୁ ଅନୁମତି ଦିଆଯାଇନାହିଁ । ଡିଜେ ବାଜିଲେ ତାହା ଜବତ ହେବ ଏବଂ ଧର୍ତ୍ତବ୍ୟ ଅପରାଧ ମାମଲା ମଧ୍ୟ ରୁଜୁ ହେବ ବୋଲି ଡିସିିପି ଶ୍ରବଣ ଏମ୍ ବିବେକ୍ କହିଛନ୍ତି ।
ଗୁରୁବାର ଅପରାହ୍ଣ ୨ଟାରୁ ଭସାଣି ଉତ୍ସବ ଆରମ୍ଭ ହେବ । ନୂଆପଲ୍ଲୀ ପୂଜା କମିଟି ସହ ୨୦ଟି ପୂଜା କମିଟିର ମେଢ଼ ସାମିଲ ହେବାକୁ ଥିବା ବେଳେ ସହିଦନଗର ସହ ୨୪ଟି ମେଢ଼ ଯୋଗଦେବେ । ନୂଆପଲ୍ଲୀର ଭସାଣି ଉତ୍ସବ ନୂଆପଲ୍ଲୀ ଛକରୁ ଆରମ୍ଭ ହେବ । ଆଗପଛ ହୋଇ ମେଢ଼ଗୁଡ଼ିକ ନୂଆପଲ୍ଲୀ, ସିଆରପି, ଡିଏଭି ଛକ ଡାହାଣ ମୋଡ଼ ନେଇ ଗୋପବନ୍ଧୁ ଛକ, ସିରିପୁର ଦେଇ ଏୟାରପୋର୍ଟ ଏବଂ ସୁର କମ୍ପାନୀ ଛକକୁ ଯିବେ । ଏହି ଶୋଭାଯାତ୍ରା ବେଳେ ସିଆର୍ପି ଛକ ପାର୍ଶ୍ବର ଜୟଦେବ ବିହାର ଆଡ଼କୁ ଯିବାକୁ ଚାହୁଁଥିବା ଯାନବାହନଗୁଡ଼ିକ ସିଆରପି ଛକଠାରୁ ଏକାମ୍ର ପାର୍କ ରାସ୍ତା ଦେଇଯିବେ ।
ସହିଦନଗର ଭସାଣି କମିଟିର ସମସ୍ତ ମେଢ଼ ସହିଦନଗରରରୁ ବାହାରି ରାମମନ୍ଦିର, ମାଷ୍ଟରକ୍ୟାଣ୍ଟିନ ଦେଇ ରାଜମହଲ ଛକ ଯାଏ ଯିବେ । ଏହି ଶୋଭାଯାତ୍ରା ବେଳେ ଯାନାବାହନଗୁଡ଼ିକ ସଚିବାଳୟ ମାର୍ଗ ଓ ସଂଲଗ୍ନ ରାସ୍ତାରେ ଯାତାୟାତ କରିବେ । ଉତ୍ତର ଭୁବନେଶ୍ୱର ଦୁଇଟି ଭସାଣି କମିଟିର ସମସ୍ତ ମେଢ଼ କ୍ଲବ ଟାଉନ ଆପାର୍ଟମେଣ୍ଟ ପଡ଼ିଆ ଓ ଡମଣା ପଡ଼ିଆରେ ଏକାଠି ହୋଇ ନାଲକୋ ଛକ ହୋଇଯିବେ । ଶୋଭଯାତ୍ରା ବେଳେ ନନ୍ଦନକାନନ ଛକ ପଟୁ ଜୟଦେବ ବିହାର ଛକକୁ ଆସୁଥିବା ଯାନବାହନ ଗୁଡ଼ିକୁ କିଟ୍ କିମ୍ବା କଳାରାହାଙ୍ଗ ଛକରେ ଥିବା ସଂଲଗ୍ନ ରାସ୍ତା ଦେଇ ଯିବେ । ଏହି ସବୁ କଟକଣା ଅପରାହ୍ଣ ୨ଟାରୁ ରାତି ୧ଟା ପର୍ଯ୍ୟନ୍ତ ଲାଗୁ ରହିବ ।
ସୌଜନ୍ୟ ପ୍ରମେୟ
