ଆତଙ୍କବାଦ ପ୍ରସଙ୍ଗରେ ଭାରତ ସହ ଆମେରିକାର ଚିନ୍ତା ସମାନ: ରୁବିଓ

ପାକିସ୍ତାନ ସହ ୱାସିଂଟନର ବଢ଼ୁଥିବା ସମ୍ପର୍କ ଭାରତର ଆତଙ୍କବାଦ ବିରୋଧୀ ଲଢ଼େଇକୁ ଦୁର୍ବଳ କରିବ କି ବୋଲି ପ୍ରଶ୍ନର ଉତ୍ତରରେ ରୁବିଓ କହିଥିଲେ, ପାକିସ୍ତାନ ସହ ସମ୍ପର୍କ ଭାରତ ସହ ସମ୍ପର୍କର ମୂଲ୍ୟରେ ହେବ ନାହିଁ। ଉଭୟ ଦେଶ ଆତଙ୍କବାଦ ବିରୋଧରେ ସମାନ ଚିନ୍ତାଧାରା ରଖିଛନ୍ତି। ଆମେରିକା ସାରା ବିଶ୍ୱରେ ଆତଙ୍କବାଦ ଏବଂ ଆତଙ୍କବାଦକୁ ପ୍ରୋତ୍ସାହନ ଦେଉଥିବା ଦେଶର ବିରୋଧୀ ବୋଲି ସେ କହିଛନ୍ତି।

ପାକିସ୍ତାନ ସହ ସମ୍ପର୍କ ରଖିବା ପଛରେ ଆମେରିକାର ରଣନୈତିକ ସ୍ୱାର୍ଥ ରହିଛି ବୋଲି ରୁବିଓ ସ୍ପଷ୍ଟ କରିଛନ୍ତି। ପାକିସ୍ତାନ ଏକ ଆଣବିକ ଅସ୍ତ୍ରସମ୍ପନ୍ନ ଦେଶ ଏବଂ ଭୌଗୋଳିକ ଦୃଷ୍ଟିରୁ ଏହାର ଗୁରୁତ୍ୱ ରହିଛି। ତେଣୁ ମତଭେଦ ଥିଲେ ମଧ୍ୟ ଆମେରିକାକୁ ପାକିସ୍ତାନ ସହ କୂଟନୈତିକ ସମ୍ପର୍କ ବଜାୟ ରଖିବାକୁ ପଡ଼ିବ। ଭାରତ ମଧ୍ୟ ଇରାନ ସହ ସମ୍ପର୍କ ରଖୁଥିବାରୁ ଏହାକୁ ଏକ ବ୍ୟାପକ ବୈଦେଶିକ ନୀତିର ଅଂଶ ଭାବେ ଦେଖିବା ଉଚିତ ବୋଲି ସେ ଯୁକ୍ତି ଦର୍ଶାଇଛନ୍ତି।