Germany: ଲଙ୍ଗର ପକାଇଥିବା କଣ୍ଟେନର ଜାହାଜକୁ ଧକ୍କା ଦେଲା କ୍ରୁଜ୍ ଜାହାଜ: ଅଳ୍ପକେ ବର୍ତ୍ତିଲା ୩,୩୫୦ ଲୋକଙ୍କ ଜୀବନ

ବର୍ଲିନ୍: ଜର୍ମାନର ବ୍ରେମରହାଫେନ୍ ବନ୍ଦରରୁ ସ୍ପାନିସ୍ କାନାରି ଦ୍ୱୀପପୁଞ୍ଜକୁ ୨୦ ଦିନିଆ ଯାତ୍ରା କରୁଥିବା ବିଳାସପୂର୍ଣ୍ଣ କ୍ରୁଜ୍ ଜାହାଜ ମେନ୍ ସ୍କିଫ୍-୩ ଯାତ୍ରା ଆରମ୍ଭ କରିବାର ପ୍ରାୟ ୨୦ ମିନିଟ୍ ପରେ ଲଙ୍ଗର ପକାଇଥିବା କଣ୍ଟେନର ଜାହାଜ ଏମଏସସି ଭିକ୍ଟୋରିନ୍ ସହିତ ଧକ୍କା ହୋଇଥିଲା। ଦୁର୍ଘଟଣା ସମୟରେ କ୍ରୁଜ୍ ଜାହାଜରେ ମୋଟ ୩,୩୫୦ ଜଣ ଲୋକ ଥିଲେ। ସେମାନଙ୍କ ମଧ୍ୟରେ ୨,୪୨୮ ଯାତ୍ରୀ ଏବଂ ୯୨୨ ଜଣ କ୍ରୁ ସଦସ୍ୟ।

କ୍ରୁଜ୍ ଜାହାଜକୁ ବନ୍ଦରକୁ ଫେରାଇ ଅଣାଯାଇଥିଲା। ପ୍ରବଳ ପବନ ଏବଂ ପ୍ରତିକୂଳ ପାଗ ମଧ୍ୟରେ ଯାତ୍ରା କରୁଥିବା ଏକ ବିଳାସପୂର୍ଣ୍ଣ କ୍ରୁଜ୍ ଜାହାଜ ଏକ କଣ୍ଟେନର ଜାହାଜ ସହିତ ଧକ୍କା ହୋଇଥିଲା। ଧକ୍କା ଏତେ ଭୟଙ୍କର ଥିଲା ଯେ କ୍ରୁଜ୍ ଜାହାଜର ଅନେକ ଲାଇଫବୋଟ୍ କ୍ଷତିଗ୍ରସ୍ତ ହୋଇଥିଲା। ରିପୋର୍ଟ ଅନୁଯାୟୀ କଣ୍ଟେନର ଜାହାଜର ହୁଲ୍‌ର ବହୁ କ୍ଷତି ହୋଇଛି। ଆଶ୍ୱସ୍ତିର ବିଷୟ ଯେ ଏଥିରେ ଥିବା କେହି ଆହତ ହୋଇ ନାହାନ୍ତି। ଜାହାଜଟି ଟାଇଟାନିକ୍ ପରି ବୁଡ଼ିବାରୁ ରକ୍ଷା ପାଇଯାଇଛି। ଟାଇଟାନିକ୍ ମଧ୍ୟ ଯାତ୍ରା ସମୟରେ ଏକ ବରଫଖଣ୍ଡ ସହିତ ଧକ୍କା ହୋଇଥିଲା।

ଜର୍ମାନ ଉତ୍ତର ସାଗର ଉପକୂଳରେ ଝଡ଼ବର୍ଷା
ଟିୟୁଆଇ କ୍ରୁଜ୍‌ର ୨୯୩ ମିଟର ଲମ୍ବା କ୍ରୁଜ୍ ଜାହାଜ, ମେନ୍ ସ୍କିଫ୍ ୩, ସ୍ପେନ୍‌ର କାନାରି ଦ୍ୱୀପପୁଞ୍ଜକୁ ୨୦ ଦିନର ଯାତ୍ରାରେ ଥିଲା। ସ୍ଥାନୀୟ ସମୟ ପ୍ରାୟ ସନ୍ଧ୍ୟା ୫ ଟା ୧୦ ରେ ଜାହାଜଟି ବନ୍ଦର ଛାଡିଥିଲା। ପ୍ରାୟ ୨୦ ମିନିଟ୍ ପରେ, ଏହା ବନ୍ଦରରେ ଲାଗିଥିବା କଣ୍ଟେନର ଜାହାଜ ଏମଏସସି ଭିକ୍ଟୋରିନ୍ ସହିତ ଧକ୍କା ହୋଇଥିଲା। ଦୁର୍ଘଟଣା ସମୟରେ, ଜର୍ମାନ ଉତ୍ତର ସାଗର ଉପକୂଳରେ ଝଡ଼ବର୍ଷା ହେଉଥିଲା।

ସୌଜନ୍ୟ ସମ୍ବାଦ