Abhijit Dipke: ଇନ୍‌ଷ୍ଟାଗ୍ରାମ୍‌ରେ ସରକାର ବିରୋଧୀ ମତ ଦମନ ଅଭିଯୋଗ, କେନ୍ଦ୍ରକୁ ଘେରିଲେ ଅଭିଜିତ ଦୀପ୍‌କେ

ବୁଧବାର ସାମାଜିକ ଗଣମାଧ୍ୟମ ‘ଏକ୍ସ’ରେ ଏକ ପୋଷ୍ଟ କରି ଦୀପ୍‌କେ ଅଭିଯୋଗ କରିଛନ୍ତି ଯେ, ପ୍ରତିଦିନ ହଜାର ହଜାର ପୋଷ୍ଟ ଓ ଆକାଉଣ୍ଟ ହଟାଯାଉଛି। ଲୋକେ ଇନ୍‌ଷ୍ଟାଗ୍ରାମ୍‌ ଭଳି ମାଧ୍ୟମରେ ନିଜର ପ୍ରଶ୍ନ ଉଠାଉଛନ୍ତି। କିନ୍ତୁ ସେହି ପ୍ରଶ୍ନ ପଛରେ ଥିବା ପ୍ରକୃତ ସମସ୍ୟାଗୁଡ଼ିକ କେବଳ ପୋଷ୍ଟ ହଟାଇଦେଲେ ଦୂର ହୋଇଯିବ ନାହିଁ। ଏଭଳି ପଦକ୍ଷେପ ସରକାରଙ୍କ ଉପରେ ଲୋକଙ୍କ ଅବିଶ୍ୱାସକୁ ଅଧିକ ବୃଦ୍ଧି କରିବ ବୋଲି ସେ ଚେତାଇଛନ୍ତି।

ହଜାର ହଜାର ପୋଷ୍ଟ ଓ ଆକାଉଣ୍ଟ ହଟାଯାଉଥିବା ଦାବି

ସିଜେପିର ଅନ୍ୟ ଜଣେ ସଦସ୍ୟ ଆଶୁତୋଷ ରାଙ୍କା ମଧ୍ୟ ଦେଶରେ ହଜାର ହଜାର ଇନ୍‌ଷ୍ଟାଗ୍ରାମ୍‌ ଆକାଉଣ୍ଟ ଉପରେ କଟକଣା ଲାଗିଥିବା ଓ ଲକ୍ଷ ଲକ୍ଷ ଭିଡିଓ ହଟାଯାଇଥିବା ଦାବି କରିଛନ୍ତି। ବ୍ୟଙ୍ଗକାର ଓ ଗୀତିକାର ବରୁଣ ଗ୍ରୋଭର ମଧ୍ୟ ସରକାରଙ୍କ ‘୨୦୪୭ର ବିକଶିତ ଭାରତ ଲକ୍ଷ୍ୟ’କୁ ନେଇ ରଚିଥିବା ବ୍ୟଙ୍ଗ କବିତାର ଗୀତ ରୂପ ଇନ୍‌ଷ୍ଟାଗ୍ରାମ୍‌ରୁ ହଟାଯାଇଥିବା ଅଭିଯୋଗ କରିଛନ୍ତି। ଆଇନଗତ ଅନୁରୋଧ ଆଧାରରେ ଏହି ପଦକ୍ଷେପ ନିଆଯାଇଥିବା ସୂଚନା ମିଳିଛି। ତେବେ ଏହି ଅଭିଯୋଗଗୁଡ଼ିକ ଉପରେ କେନ୍ଦ୍ର ସରକାରଙ୍କ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇ ନାହିଁ। ଆଇନଗତ ଖବର ରିପୋର୍ଟିଂ ୱେବସାଇଟ୍ ‘ଲାଇଭଲ’ ମଧ୍ୟ କହିଛି ଯେ, ସୁପ୍ରିମକୋର୍ଟରେ ଇସିଆଇ ଶପଥପତ୍ର ଉପରେ ଏହାର ପୋଷ୍ଟକୁ ଇନଷ୍ଟାଗ୍ରାମ ଦ୍ୱାରା ହଟାଇ ଦିଆଯାଇଛି।